Dionga diatombola Nzambi
1. Lande na kahandjɔnɛ lokumu lendana la Losanganya la distrikɛ l’Ɛmɛnyi wa Jehowa naka laya suke?
1 Etena kɔtɔso lo nsanganya ya distrikɛ, anto efula mbeyaka aha l’okakatanu ɔnɛ tekɔ lo losanganya la woke. L’ahole efula wasalema nsanganya shɔ, ase ngelo efula mbeyaka ndo mbutanɛka dia losanganya laso lɔsɔ. Anangɛso l’akadiyɛso efula welamɛ lo nsanganya shɔ pangaka l’ɛtɛlɛ, lo mvudu ya restora, ndo ase ngelo efula mbeyaka angɛndangɛnda asɔ oma lo totshapa tawɔ tofundami ɔtɛ wa losanganya. Yema ya waohwelo wayela anɛ wayotokimanyiya dia sho ntombola Nzambi oma lo lɔkɛwɔ laso lo dihole diayotosala losanganya lakɔ.—1 Pet. 2:12.
2. Ngande wakokaso ntombola Nzambi l’ɔlɔtɔ aso etena katshɔso lo nsanganya ya weke?
2 Ɔlɔtɔ wa dimɛna: Lo mɛtɛ, yoho yaso ya ndɔta etena katshɔso lo nsanganya yaso mambiyaka anto efula. Koko yoho yalɔtaso lo waaso akina, ɛnyɛlɔ etena kakomaso l’ɔtɛlɛ, kalɛso yangɔ lo restora, kasombaso diangɔ ndo kasalaso akambo akina, mbeyaka monga la shɛngiya ya wolo le anto akina watɔsɛdingola. Oyadi hatɔlɔtshi ahɔndɔ w’oshinga wolo lo waaso asɔ, sho pombaka ndɔta lo yoho ya dimɛna, ya shunganyi, ndo yele la wɛdimo. Anto akina wateenda pombaka mɛna dia sho ntshikitana l’anto wele bu ambetawudi. (Rɔmɔ 12:2) Ndo nto, sho pombaka ndɔta tshapa yaso ya losanganya la woke, nɛ dia dui sɔ ayotokimanyiya dia sho mpandjola lokumu lendana la losanganya lɔsɔ, nkondja diaaso dia nsambisha anto akina ndo dia wanɛ wakelamɛ lo losanganya teeya.
3. Ngande wakokaso mɛnya ndjakimɛ ndo loshilambo laso etena keso lo nsanganya ya weke?
3 Ndjakimɛ ndo loshilambo: L’etena kɛnɛ kamboleka anto wa l’andja ɔnɛ ndjalanga ndo kayawɔ bu la kɔlamelo, ekɔ dui di’ekeketshelo dia sho mɛnya ndjakimɛ ndo loshilambo laso le ase ɔtɛlɛ kana ase restora wohangiso. (2 Tim. 3:1-5) Ndo nto, etena kalangaso mbidjasɛ kana kalangaso nkondja dibuku di’oyoyo diotondjishami lo losanganya, sho pombaka nsɛna dimɛna diaha mɛna wahɔ aso oto, koko ndo w’anto akina. (1 Kɔr. 10:23, 24) L’ɔkɔngɔ wa nde mbɔtɔ lo losanganya la woke mbala ka ntondo, pami kɛmɔtshi akate ate: “Kaanga mbahamayoohɔ ndoko sawo ɔtɔi diakashama lo losanganya lɔsɔ, hambohɛki pondjo lo lɔsɛnɔ lami lɔkɛwɔ la dimɛna lakamɛɛnyi Ɛmɛnyi wa Jehowa la lɔ.”
4. Lande na kahombaso ndjakimɔ la lolango dia tokimanyiya lo Losanganya la distrikɛ naka kokaka?
4 Ndjakimɔ la lolango: Yimba ya ndjakimɔ la lolango ekɔ djembetelo mɔtshi yeyama Akristo wa mɛtɛ. (Osam. 110:3) Onde wɛ hakoke ndjakimɔ la lolango dia tokimanyiya lo Losanganya la distrikɛ layaye? Lo losanganya lɔmɔtshi la woke, anangɛso l’akadiyɛso oko 600 wakayakimɔ la lolango dia tɔlɔngɔsɔla dihole diakahombe losanganya salema. Anto efula wakaye wakate la diambo tshɛ ɔnɛ: “Tatɛnaka dui dia nganɛ ndoko lushi. Nyemba nyemba y’anto nyɛ tshɛ ko ɔnɛ wakayakimɔ la lolango!” Tekɔ lo kongɛ l’asolo walomɔlomɔ Losanganya la distrikɛ la 2013 layotosha, aha tsho diaaso dia mpokamɛ dia nkondja wetshelo oma le Nzambi, koko ndo dia sho mbotombola.
[Kiombo ya lo lɛkɛ 3-6]
Waohwelo wendana la Losanganya la distrikɛ la lo 2013
◼ Ekongelo ka wenya: Nshi yakɔ shato, losanganya layomɛka lo eshidi 8:20 wa pindju. Koko lo kɛnɛ kendana la nsanganya yayosalema lo esomba wa weke ɛnɛ: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ndo la Tshikapa, ekongelo kayotatɛka lushi tshɛ l’eshidi 9:20 wa pindju. Nkuke yayodihɔmaka lo eshidi 7:00 kana l’eshidi 8:00 wa pindju lo ndjela dihole la dihole. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo ntatɛ lo yoho ya dimɛna yasha Jehowa lotombo. Ekongelo kayokomɛka l’eshidi 3:55 wa l’ɔkɔngɔ a midi wa Lushi la tanu la la samalo ndo Lushi la lumingu ekongelo kayokomɛ l’eshidi 2:40 wa l’ɔkɔngɔ wa midi. L’esomba wa weke ɛsɔ, ekongelo kayokomɛka wonya ɔtɔi l’ɔkɔngɔ.
◼ Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu laamɛ kana ambeki ayɛ wa Bible mbahombayɛ namɛ ahole wa mbidjasɛ.
◼ Olelo wa la midi: Sho nɔmbaka anto tshɛ dia ndjaaka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. Mbewɔ dia nsomba diangɔ dia ndɛ le anto asɔ ayokimanyiya dia pudipudi monga lo dihole dia losanganya. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Jni. 2:13-17.)
◼ Pudipudi: Akɛnama dia mbala efula, wanɛ watosombaka mbo ya ndɛ mbikashaka mposo kana akatshi wa diangɔ sɔ lo sɛkɛ. Laasɔ sɛkɛ di’otondo ndjololanɛka tɔɔ la akatshi, mposo, kana ɛlɔndɔ wa ponde la mindo nkina. Naka onto ambolanga nsomba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa laande dia ntshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ nsala kɛnɛ kahombande nsala, kete sɛkɛ dia losanganya diayotshikala pudipudi. Sho nangaka nkɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Weshasha: Sho kokaka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo. Lo shɛkɛ tshɛ, nyɛnya dia “ Association ‘ Les Témoins de Jéhovah ’” mbahomba nongola falanga.
◼ Aksida ndo awui wa wanyandja: Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo Departɛma diendana la esakelo ka wanyandja, ko vɔ wayosha ekimanyielo kahombama.
◼ Ekanga: Naka wɛ ekɔ lo mbɔsa ekanga, kete tohɛke dia ndja la wɔ nɛ dia ekanga wa mbisha anto bu lo dihole dia losanganya. Tɛdi yakawɔ wanɛ wele la diabɛtɛ pombaka mombama dimɛna ndo aha ndjidja lo diangɔ diakashawɔ mindo diokitshami lo dihole dia losanganya.
◼ Wondelo wa foto: Lam’alangayɛ, naka wate munde foto wonya wa losanganya, kete tokambake la angadimu. Lam’alanganyu, tanyelɛke anto wanda foto lo dihole dia losanganya. Naka nyambowaɛna lo dihole dia losanganya, kete tanyaalɔmbake dia vɔ nyonda foto.—Jni. 2:13-17.
◼ Fɔrmilɛrɛ Veuillez suivre l’intérêt (S-43): Lo esambishelo ka lo tshakitudi kayonyosala lo nshi ya losanganya la woke lɔnɛ, kanyokambe la fɔrmilɛrɛ kɛnɛ dia mbewoya nsaki tshɛ kɛnyisha anto. Opandjudi tshɛ kaatshu la fɔrmilɛrɛ (S-43) ɔtɔi kana hiende. Oma l’ɔkɔngɔ wa nde ndjilodja, ko nde mbisha wanɛ wakamba l’awui w’ekanda kana sekeletɛlɛ ka l’etshumanelo kande.—Enda Olimu aso wa Diolelo wa Ngɔndɔ ka dikumi l’ɔtɔi, 2009, lɛkɛ 4.
◼ Rɛstora: Nyɔlɛmiya lokombo la Jehowa oma lo lɔkɛwɔ lanyu l’ɔlɔlɔ. Kanyotshike yema ya dikuta l’ɔtɛ wonyokimanyishawɔ naka mbekelo kɛsɔ kekɔ l’ɛtshi kanyu ka nkɛtɛ.
◼ Lɛnɛ ohangiso:
1) Tohangiyake anto efula oleki lofulo laketawɔ kanga luudu.
2) Naka wɛ aya bu l’ohomba wa luudu, lam’alangayɛ ewoya dikambo sɔ aha la ntshimbatshimba.
3) La ntondo ka wɛ katɛ, tambodi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami.
4) Aha wɛ nkamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga la diɔ ele wɛdimo ndo kanɛ anto akina.
5) Pudipudi kakatana la omamemelo le Nzambi. Kotshikake mpango kayɛ wonya tshɛ kɔmba ndo pudipudi. Dikambo sɔ mendanaka ndo la Mbalasa ka Diolelo, kakokawɔ npangiya anangɛso la akadiyɛso w’oma lo tshumanelo dia tale.
6) Kɛnɛmɔla olowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka npanga la yɛ dihole ɔtɔi.—Ngal. 5:22, 23.
◼ Olimu wa wanɛ wayakimɔ la lolango: Onto tshɛ lalanga nsala dikambo sɔ kokaka nkimɔ lokombo lande lo Departɛma di’anto wayakimɔ la lolango. Ana wele l’ɛse k’ɛnɔnyi 16 kokaka mbisha ekimanyielo ka dimɛna efula lo nkamba l’ɛlɔmbwɛlɔ k’ombutshi awɔ ɔmɔtshi, olami ɔmɔtshi wa dihole sɔ kana l’ɛlɔmbwɛlɔ k’opalanga okina wambetawɔma oma le ombutshi kana olami ɔsɔ.