Nsanganya yaso ya distrikɛ yekɔ esambishelo ka wolo k’akambo wa mɛtɛ
1. Tena dia fɛtɛ diakasanganaka ase Isariyɛlɛ diakawashaka diaaso dia vɔ nkana yimba ndo nkɛtshanya akambo wa mɛtɛ akɔna w’ohomba?
1 Ase Isariyɛlɛ w’edjedja wakasanganaka mbala shato l’ɔnɔnyi l’afɛstɔ wakasalemaka mbala la mbala. Kânga mbele apami ato mbakawalɔmbaka dia nsangana, mbala efula nkumbo k’otondo tshɛ wakatshɔka la Jerusalɛma lo nsanganya shɔ yakawashaka ɔngɛnɔngɛnɔ. (Euh. 16:15, 16) Nsanganya shɔ yakawashaka diaaso dia vɔ nkana yimba ndo nkɛtshanya akambo wa mɛtɛ w’ohomba wa lo nyuma. Naa akambo amɔtshi l’atei awɔ? Dui dimɔtshi ele yɔ yakɛnyaka ɔnɛ Jehowa mbele kanga lokaho ndo Ɔnɛ lakotsha ehomba aso. (Euh. 15:4, 5) Dui dikina ele nde kokaka nɔmbɔla ndo nkokɛ ekambi ande. (Euh. 32:9, 10) Ase Isariyɛlɛ wakakoke mɛnya nto dia oko wakiwɔ wodja wakelamɛ lokombo la Jehowa, vɔ wakahombe nkitanyiya ɛlɛmbɛ ande wosembwe. (Euh. 7:6, 11) Ɛlɔ kɛnɛ sho kondjaka wahɔ akɔ wâmɛ lo nsanganya yaso ya distrikɛ yasalema ɔnɔnyi tshɛ.
2. Ngande wayongamula ekongelo ka Losanganya laso la distrikɛ osase w’akambo wa mɛtɛ?
2 Ekongelo katongamulɛ osase w’akambo wa mɛtɛ: Lo nsanganya yaso ya distrikɛ, sho ndjelaka asawo, adramɛ, wɛnyɛlɔ ndo ɛkɔnya watongamulɛ osase w’akambo wa mɛtɛ w’ohomba wa lo Bible. (Joa. 17:17) Elimu wa mamba wekɔ lo salema dikambo dia Losanganya laso la distrikɛ layaye. Okongamelo waki Jehowa wekɔ lo nɔngɔsɔla ekongelo kendana lo yoho ya lânde l’ehomba wa nshi nyɛ wa l’andja w’otondo. (Mat. 24:45-47) Onde wɛ nomɔlomɔka dia tɛna ndo toka kɛnɛ kayotama lo losanganya lɔsɔ?
3. Kakɔna kahombaso nsala dia nkondja wahɔ lo losanganya?
3 Lo mɛtɛ, tayokondja wahɔ woleki naka sho monga lawɔ ndo mbidja yimba dimɛna l’asawo wayoshama lo nshi yakɔ shato tshɛ. Naka wɛ atayalɔngɔsɔla, kete nsawola l’owandji ayɛ w’olimu dia wɛ mbɔsa vakashi. Yâlɔngɔsɔla dia momuyaka efula l’otsho woho wa wɛ ndjoyela ekongelo dimɛna. Anto efula mɛnaka dia mendaka ɔtɛkɛtshi ndo mbɔsaka nɔtɛ ya tomondo, mbakimanyiyaka diaha vɔ ndala djɔ. Tatetawɔke dia telefɔnɛ kaso tofukutanya kana fukutanya anto akina. Tewɔ dia ntɛkɛta, fundanɛ mesajɛ kana ndɛ wonya wasalema losanganya.
4. Ngande wakoka ambutshi nkimanyiya anawɔ dia vɔ nkondja wahɔ wonya wasalema losanganya?
4 Lo ɛnɔnyi wakasalemaka Sabato, etena kakasanganaka nkumbo y’ase Isariyɛlɛ dia mpokamɛ Ɛlɛmbɛ wa Mɔsɛ wakawâdiaka lo fɛtɛ ya Totombotombo, vɔ waki kâmɛ la ‘ana wa totshitshɛ dia vɔ mboka la mbeka.’ (Euh. 31:12) Ekɔ mɛtɛ dui di’ekeketshelo dia mɛna nkumbo yodjashi kâmɛ wonya washama asawo lo losanganya ndo ana wahokamɛ asawo washama la yambalo tshɛ! La dikɔlɔ tshɛ, lande na kahanyasɛdingola nɔtɛ yanyu ndo nsawola kâmɛ akambo w’ohomba wa lo losanganya wakanyɔngɛnyingɛnyisha? “Akambu w’enginya watukelekamaka l’utema wa dikenda,” ɔnkɔnɛ ambutshi pombaka namaka anawɔ dimɛna, mbidja ndo wanɛ waya l’ɛnɔnyi dikumi l’ɛmɔtshi wonya wa diomuyelo dia la midi, lo dihole dia mbatshika dia vɔ ‘tekekɔka.’—Tuk. 22:15; 29:15.
5. Ngande wakoka lɔkɛwɔ laso la dimɛna nɛnga akambo wa mɛtɛ lo dihole diodjashiso?
5 Lɔkɛwɔ laso la dimɛna nɛngaka akambo wa mɛtɛ: Lɔkɛwɔ laso la dimɛna etena keso lo ngelo kasalema Losanganya la distrikɛ nɛngaka akambo wa mɛtɛ. (Tito 2:10) Apulushi ndo ɛnɛnɛ ekina wa lɛɛta nembetɛka anto wayela ɛlɛmbɛ w’Akristo ndo wakɛnɛmɔla solo dia lotutsha ndo wele la memakana le onto tshɛ. (Kol. 4:6) Ɔnɔnyi wetshi, owandji ɔmɔtshi w’awui wa tɔkɛnyɔ wa l’osomba wakasalema losanganya la distrikɛ lɔmɔtshi akafundɛ kɔmite ate: “Lambolanga nyɛnya lowando lami lo menda loshilambo ndo pudipudi k’anto anyu l’etena kosadimi losanganya la woke lɔnɛ.”
6. Ngande wakokaso nɛnga akambo wa mɛtɛ oma l’ɔlɔtɔ aso etena keso lo ngelo kasalema Losanganya la distrikɛ?
6 Etena kalɔtaso tshapa yaso ya losanganya, yɔ hayewoya tsho dia losanganya laso ndo nkimanyiya angɛnangɛnda dia vɔ teya, koko yɔ yekɔ nto tshondo y’esambishelo le anto watenda. Anto wa lo dihole diasalema Losanganya la distrikɛ wayɛna di’anto wɔlɔtshi tshapa ndɔta dimɛna ndo la wɛdimu, koko aha lo yoho y’epakapaka ndo y’emula nsaki ya demba yambokokanɛ l’andja ɔnɛ. (1 Tim. 2:9, 10) Ɔnkɔnɛ, sho pombaka mbidja yimba l’ɔtɔlɔ ndo l’ɔlɔngɔswɛlɔ aso wa divo etena keso lo dihole diasalema losanganya laso la distrikɛ, mbidja ndo l’ahole wodjashiso. Ndja lo losanganya l’ahɔndɔ wa tomondo ndo l’epila hɛnya dia tekɔ la dilɛmiɛlɔ. Oyadi losanganya lekɔ lo salema lo dihole dia hwe, sho pombaka ndɔta dimɛna. Naka sho nangaka mengola ahɔndɔ l’ɔkɔngɔ wa losanganya ndo ntshɔ lo rɛstora, sho pombaka mbohɔ dia hatohombe ndɔta lo yoho y’epakapaka.
7. Naa yoho mɔtshi yakokaso ngɛnangɛna kâmɛ kaso k’Akristo wonya wasalema Losanganya la distrikɛ?
7 Lo tena dia fɛtɛ, ase Isariyɛlɛ wakangɛnangɛnaka lɔngɛnyi laki lam’asawɔ l’atɛmɔdi akina wakayaka oma l’ahole akina wa lo wodja ndo dui sɔ diakâkimanyiyaka dia monga kâmɛ. (Etsha 2:1, 5) Etena kasalema nsanganya yaso ya distrikɛ, dimama dia lo nkumbo kaso k’Akristo k’onto l’ɔnango ka l’andja w’otondo mɛnamaka. Mbala efula, dimama dia lo paradiso kaso ka lo nyuma sɔ, mambiyaka anto watɔsɛdingola. (Osam. 133:1) Lo dihole dia sho mimɔ lo dihole diasalema losanganya dia tosomba mbo ya ndɛ wonya wa diomuyelo, ayonga dimɛna sho tshɔka la yangɔ ya ndɛ dia tokondja wahɔ waya lo nsawola l’anangɛso l’akadiyɛso wodjashi suke la so!
8. L’ɔtɛ w’ɛkɔkɔ akɔna wahombaso ndjakimɔ la lolango dia nkamba elimu naka kokaka?
8 Mbala efula, anto watenda mambaka lo woho wakongɛma nsanganya yaso dimɛna, djekoleko etena keyawɔ dia elimu tshɛ salemaka oma le anto wayakimɔ la lolango. Onde hatokoke ndjakimɔ la lolango dia nkamba elimu lo Losanganya la distrikɛ? (Osam. 110:3) Mbala efula ase nkumbo tshɛ ndjakimɔka la lolango dia nkamba elimu nɛ dia ɔsɔ ekɔ yoho ya vɔ ndowanya anawɔ dia kambɛ anto akina. Naka tekɔ ɛsɔnyi, kete ayonga dimɛna sho nkamba elimu wa lo Losanganya la distrikɛ nɛ dia ɔsɔ ekɔ yoho ya dimɛna ya mbeya anto akina. Kadiyɛso kɛmɔtshi akate ate: “Dimi kombeyaka anto efula lâdiko dia ase nkumbo kami la angɛnyi ami angana ato. Koko etena kakamasha lonya lo wɔmbɛlɔ wa dihole dia losanganya, lakateyanaka la anangɛso ndo la akadiyɛso efula! Ɔsɔ aki mɛtɛ diaaso di’ɔngɛnɔngɛnɔ efula!” Monga l’angɛnyi efula ndo mbakimanyiya lo Losanganya la distrikɛ toshaka ɔngɛnɔngɛnɔ efula. (2 Kor. 6:12, 13) Naka tatakambaka oko anto wayakimɔka la lolango, tombole dikumanyi dia l’etshumanelo woho wakokaso ndjalowanya dia tosha ekimanyielo.
9. Ngande wayotelɛ anto akina dia ndjɔtɔ lo Losanganya la distrikɛ?
9 Tele anto akina dia vɔ ndjoka akambo wa mɛtɛ: Oko wakatadisale ɛnɔnyi wetshi, mingu shato la ntondo ka Losanganya laso la distrikɛ ntatɛ, tayokahanya akatshi wa leeta dia mbelɛ anto akina oya lo losanganya. Tshumanelo pombaka nkidjakindja bɛtshi diawɔ dia nkɛtɛ dia kahanya akatshi awɔ wa leeta, naka kokaka. (Enda kiombo yele l’ɔtɛ a dui ɔnɛ: “Ngande wayotosha anto akatshi wa leeta?”) Kanyoye l’akatshi wa leeta tshɛ wayotshikala oya lo dihole diayosalema Losanganya la distrikɛ. Apandjudi wakaye lo losanganya wayoyokamba lawɔ dia nsala esambishelo ka tshakitudi lo ngelo kasalema losanganya.
10. Kɔndɔla akambo amɔtshi wakete wɛnya dia esambishelo ka lânde kasalaso l’ɔnɔnyi dia kahanya akatshi wa leeta mongaka l’etombelo w’ɛlɔlɔ.
10 Onde anto mbetawɔka akatshi wa leeta etena kasalaso esambishelo ka lânde kasalema l’ɔnɔnyi? Lo losanganya lɔmɔtshi la distrikɛ, ɔnangɛso ɔmɔtshi lashana ahole akakimanyiya atshukanyi amɔtshi dia vɔ ntana dihole dia mbidjasɛ. Vɔ wakawotɛ dia vɔ wakalongola dikatshi dia leeta ndo “diɔ diakalomialomia nsaki kawɔ.” Ɔnkɔnɛ, vɔ wakakɛndakɛnda kilɔmɛtɛlɛ 320 dia ndjɔtɔ lo losanganya! Lo dihole dikina, kadiyɛso kɛmɔtshi kakatasambishaka lo luudu la luudu akasha pami kɛmɔtshi dikatshi dia leeta ndo pami kakɔ akalomɔlomɔ dia mbeya akambo amɔtshi wendana la Losanganya la distrikɛ. Ɔnkɔnɛ, kadiyɛso akôlembetshiya dikatshi dia leeta diakandawosha. Nshi ngana l’ɔkɔngɔ, etena kakiwɔ lo Losanganya la distrikɛ, kadiyɛso akɛnyi pami kakɔ nde l’ɔngɛnyi ande lo losanganya wokime dibuku dimɔtshi di’oyoyo diakatondjama lo losanganya lɔsɔ.
11. Lande na kele ekɔ ohomba efula dia sho mbɔtɔka lo nsanganya yaso ya distrikɛ yasalema ɔnɔnyi tshɛ?
11 Tena dia fɛtɛ diaki tɛdikɔ toludi la ngandji takɔshi Jehowa dia nkimanyiya ase Isariyɛlɛ dia vɔ mbokambɛ “ulimu lo mete ndu la kolamelu.” (Jas. 24:14) Woho akɔ wâmɛ mbele, wɔtwɛlɔ wa lo nsanganya yaso ya distrikɛ yasalema ɔnɔnyi tshɛ tokimanyiaka ‘dia sho nkɛndakɛnda l’akambo wa mɛtɛ’ ndo yɔ yekɔ etenyi k’ohomba k’ɔtɛmwɛlɔ aso. (3 Joa. 3) Jehowa atshɔkɔlɛ welo tshɛ wayodja anto walanga akambo wa mɛtɛ dia mbɔtɔ ndo nkondja wahɔ tshɛ lo tshɛ.
[Efundelo wa l’etei w’odingɔ wa lo lɛkɛ 4]
Lɔkɛwɔ laso la dimɛna etena keso lo ngelo kasalema Losanganya la distrikɛ nɛngaka akambo wa mɛtɛ
[Efundelo wa l’etei w’odingɔ wa lo lɛkɛ 5]
Mingu shato la ntondo ka Losanganya laso la distrikɛ ntatɛ, tayokahanya akatshi wa leeta dia mbelɛ anto akina oya lo losanganya
[Kiombo ya lo lɛkɛ 3-6]
Waohwelo wendana la losanganya la distrikɛ la lo 2012
◼ Ekongelo ka wenya: Nshi yakɔ shato, losanganya layomɛka lo eshidi 8:20 wa pindju. Koko lo kɛnɛ kendana la nsanganya yayosalema lo esomba wa weke ɛnɛ: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lumbumbashi, Matadi, Mbandaka, Mbuji Mayi, Mwene Ditu, Pointe Noire ndo la Tshikapa, ekongelo kayotatɛka lushi tshɛ l’eshidi 9:20 wa pindju. Nkuke yayodihɔmaka lo eshidi 7:00 kana l’eshidi 8:00 wa pindju lo ndjela dihole la dihole. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo ntatɛ lo yoho ya dimɛna yasha Jehowa lotombo. Ekongelo kayokomɛka l’eshidi 3:55 wa l’ɔkɔngɔ a midi wa Lushi la tanu la la samalo ndo Lushi la lumingu ekongelo kayokomɛ l’eshidi 2:40 wa l’ɔkɔngɔ wa midi. L’esomba wa weke ɛsɔ, ekongelo kayokomɛka wonya ɔtɔi l’ɔkɔngɔ wa dɔmbɛlɔ dia ndjihelo.
◼ Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu lâmɛ kana ambeki ayɛ wa Bible mbahombayɛ namɛ ahole wa mbidjasɛ.—1 Kor. 13:5.
◼ Olelo wa la midi: Sho nɔmbaka anto tshɛ dia ndjâka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. Mbewɔ dia nsomba diangɔ dia ndɛ le anto asɔ ayokimanyiya dia pudipudi monga lo dihole dia losanganya. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Joa. 2:13-17.)
◼ Pudipudi: Akɛnama dia mbala efula, wanɛ watosombaka mbo ya ndɛ mbikashaka mposo kana akatshi wa diangɔ sɔ lo sɛkɛ. Lâsɔ sɛkɛ di’otondo ndjololanɛka tɔɔ la akatshi, mposo, kana ɛlɔndɔ wa ponde la mindo nkina. Naka onto ambolanga somba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa lânde dia tshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ sala kɛnɛ kahombande sala, kete sɛkɛ dia losanganya diayotshikala pudipudi. Sho nangaka kɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Weshasha: Sho kokaka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo. Lo shɛkɛ tshɛ, nyɛnya dia “ Association ‘ Les Témoins de Jéhovah ’ ” mbahomba nongola falanga.
◼ Aksida ndo awui wa wanyandja: Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo Departɛma diendana la esakelo ka wanyandja. Lâsɔ anto asɔ wa tomanamana wele lo losanganya wendana la olimu ɔsɔ wayoya ndjenda woke woke wa dikambo diakɔ ndo wayosha ekimanyielo kahombama.
◼ Ekanga: Naka wɛ ekɔ lo mbɔsa ekanga, kete tohɛke dia ndja la wɔ nɛ dia ekanga wa mbisha anto bu lo dihole dia losanganya. Tɛdi yakawɔ wanɛ wele la diabɛtɛ pombaka mombama dimɛna ndo aha ndjidja lo diangɔ diakashawɔ mindo diokitshami lo dihole nɛ dia losanganya.
◼ Wondelo wa foto: Lam’alangayɛ, naka wate munde foto wonya wa losanganya, kete tokambake la angadimu. Lam’alanganyu, tanyelɛke anto wanda waa foto lo dihole dia losanganya. Naka nyambowaɛna lo dihole dia losanganya, kete tanyâlɔmbake dia vɔ nyonda foto.—Joa. 2:13-17.
◼ Fɔrmilɛrɛ Veuillez suivre l’intérêt (S-43): Lo esambishelo ka lo tshakitudi kayonyosala lo nshi ya losanganya la woke lɔnɛ, kanyokambe la fɔrmilɛrɛ kɛnɛ dia mbewoya nsaki tshɛ kɛnyisha anto. Opandjudi tshɛ katshu la fɔrmilɛrɛ (S-43) ɔtɔi kana hiende. Oma l’ɔkɔngɔ wa nde ndjilodja, ko nde mbisha wanɛ wakamba l’awui w’ekanda kana sekeletɛlɛ ka l’etshumanelo kande.—Enda Olimu aso wa Diolelo wa ngɔndɔ ka Tanu 2011, lɛkɛ 3.
◼ Rɛstora: Nyɔlɛmiya lokombo la Jehowa oma lo lɔkɛwɔ lanyu l’ɔlɔlɔ. Kanyotshike yema ya dikuta l’ɔtɛ wonyokimanyishawɔ naka mbekelo kɛsɔ kekɔ l’ɛtshi kanyu ka nkɛtɛ.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la tshimbatshimba. 3) La ntondo ka wɛ katɛ, tambodi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami. 4) Aha wɛ kamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga ladiɔ ele wɛdimo ndo kanɛ anto akina. 5) Pudipudi kakatana la omamemelo le Nzambi. Kotshikake pango kayɛ wonya tshɛ kɔmba ndo pudipudi. Dikambo sɔ mendanaka ndo la Mbalasa ka Diolelo, kakokawɔ pangiya anangɛso la akadiyɛso w’oma lo tshumanelo dia tale. 6) Kɛnɛmɔla olowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka panga la yɛ dihole ɔtɔi.—Ngal. 5:22, 23.
◼ Olimu wa wanɛ wayakimɔ la lolango: Onto tshɛ lalanga nsala dikambo sɔ kokaka nkimɔ lokombo lande lo Departɛma di’anto wayakimɔ la lolango. Ana wele l’ɛse k’ɛnɔnyi 16 kokaka mbisha ekimanyielo ka dimɛna efula lo nkamba l’ɛlɔmbwɛlɔ k’ombutshi awɔ ɔmɔtshi, olami ɔmɔtshi wa dihole sɔ kana l’ɛlɔmbwɛlɔ k’opalanga okina wambetawɔma oma le ombutshi kana olami ɔsɔ.
[Kiombo ya lo lɛkɛ 6]
Ngande wayotosha anto akatshi wa leeta?
Dia nkindjakindja ɛtshi kaso ka nkɛtɛ, mbeyaka monga ohomba sho tɛkɛtaka lo tshena pe. Sho kokaka mbutɛ onto ɔnɛ: “Akemwe. L’andja w’otondo, tekɔ lo nsala la wolo dia mbisha anto dikatshi dia leeta nɛ. Dikatshi diayɛ diɔ nɛ. Wɛ ayotana awui akina lɔkɔ.” Onga la waasaso. Etena kakahanyaso akatshi anɛ lo wikɛndɛ, sho kokaka mbisha anto ndo periodikɛ naka kokaka.