Onde tambeka akambo tshɛ wakokaso mbeka oma le Jehowa?

1. Ngande wayaoka Jehowa lo kɛnɛ kendana la wetshelo?

¹ Jehowa ‘Ombetsha aso a Woke,’ kombolaka dia sho mbetshama. (Is. 30:20) Nde akatatɛ mbetsha l’ɔkɔngɔ wa nde ntonga Ɔnande l’enondo. (Joa. 8:28) L’ɔkɔngɔ w’ɔtɔmbɔkwɛlɔ wa Adama, Jehowa kopekɔ dia mbetsha, koko la ngandji tshɛ nde aketsha anto wele kema kokele.—Is. 48:17, 18; 2 Tim. 3:14, 15.

2. Olimu akɔna wa wetshelo wasalema ɛlɔ kɛnɛ?

² Ɛlɔ kɛnɛ, Jehowa ekɔ lo nɔmbɔla olimu wa wetshelo woleki woke l’ɔkɔndɔ w’ana w’anto. Oko wakadiewoya Isaya, miliyɔ y’anto wa l’andja w’otondo wekɔ lo mbidɛ lo yoho ya didjidji lo “ukungu wa luudu la [Jehowa].” (Is. 2:2) Lande na kahombaso mbidɛ l’okongo wa luudu la Jehowa? Dia sho tetshama mboka ya Nzambi, eelo, dia tetshama oma le Jehowa. (Is. 2:3) L’ɔnɔnyi w’olimu 2010, Ɛmɛnyi wa Jehowa waketsha wenya ndekana miliyara 1 la miliyɔ 600 lo nsambisha ndo lo mbetsha anto akambo wa mɛtɛ wa lo Bible. Lâdiko dia lâsɔ, lomingu tshɛ wetshelo wa lo nyuma wekɔ lo mbishama lo tshumanelo ndekana 105 000 dia l’andja w’otondo, ndo ekanda w’Akristo wekɔ lo tondjama oma le ɔhɔmbɔ wa kɔlamelo ndo wa kɛsɔ l’ɛtɛkɛta ndekana 500.

3. Wahɔ akɔna wambotokondja onto l’onto oma lo wetshelo watosha Jehowa?

³ Tambokondja wahɔ lo yɛdikɔ y’efula: Ande wahɔ wambotokondja oma lo wetshelo waki Nzambi lee! Takeke dia Nzambi ekɔ la lokombo lande hita ndo ɔnɛ nde ndjakiyanyaka lo dikambo diaso. (Osam. 83:18; 1 Pet. 5:6, 7) Tambokondja ekadimwelo lo ambola amɔtshi w’ohomba efula wa lo lɔsɛnɔ wele oko: Lande na kasowa anto ndo kavɔwɔ? Ngande wakokaso ntana ɔngɛnɔngɛnɔ wa mɛtɛ? Naa oyango wa lɔsɛnɔ? Jehowa akatosha nto ɛlɛmbɛ wendana la lɔkɛwɔ watokimanyiya dia sho ‘ndowanya mboka yaso.’—Jash. 1:8.

4. Naa kalasa mɔtshi yɔtɔ ekambi waki Nzambi ndo lande na kahombaso mbeka kɛnɛ tshɛ kakokaso mbeka oma le Jehowa?

⁴ Lâdiko dia lâsɔ, Jehowa ambɔlɔngɔsɔla kalasa ya lânde dia nkimanyiya ekambi ande efula dia vɔ mpamia olimu wôkambɛwɔ. Lo lɛkɛ 4-6, sho tanaka listɛ la kalasa yɔtɔ apandjudi amɔtshi. Oyadi akambo wele laso hatosha diaaso dia sho nongola olowanyelo ɔmɔtshi l’atei a wɛnɛ woshilami, onde sho kondjaka wahɔ tshɛ lo tshɛ oma lo wetshelo waki Nzambi weso l’akoka wa nongola? Onde sho keketshaka ɛlɔngɔlɔngɔ l’esekaseka wa sɛngiyama mbala efula oma le embetsha awɔ wa la kalasa ndo anto akina dia mbesa kalasa ya lâdiko ya l’andja ɔnɛ, dia vɔ ndjadjɛ eyango wa lo nyuma ndo mbesa wetshelo woleki dimɛna, mbuta ate wetshelo waki Nzambi? Mbeka kɛnɛ tshɛ kakokaso mbeka oma le Jehowa ayotokimanyiya dia sho monga la lɔsɛnɔ l’ɔngɛnɔngɛnɔ oma ko kakianɛ ndo nshi yayaye yaha l’ekomelo.—Osam. 119:105; Joa. 17:3.

Kalasa mɔtshi yele lo okongamelo wa Jehowa

Kalasa ka mbeya mbadia la mfunda

• Oyango: Mbetsha anto woho wa mbadia la mfunda dia vɔ monga l’akoka wa salaka wekelo wa Bible w’onto ndamɛ ndo mbetshaka anto akina akambo wa mɛtɛ.

• Edja kaviya wekelo: Nemanɛka l’ehomba wele l’ambeki.

• Dihole diasalematɔ: Lo Mbalasa ka Diolelo ka lo ngelo kanyu.

• Wanɛ wakoka mbɔtɔ lɔkɔ: Apandjudi tshɛ ndo anto wayasha l’akambo wa mɛtɛ.

• Woho wasalematɔ: Dikumanyi dia l’etshumanelo kongɛka kalasa ka mbeya mbadia la mfunda lo ndjela ehomba wa l’etshumanelo kawɔ ndo vɔ keketshaka anto tshɛ wakoka nkondja wahɔ dia vɔ mbɔtɔ.

Kalasa k’olimu wa Teokrasi

• Oyango: Dia ndowanya apandjudi woho wa vɔ monga esambisha ndo embetsha wa tomanamana wa lokumu l’ɔlɔlɔ.

• Edja kaviyatɔ: Kayotetemala salema.

• Dihole diasalematɔ: Lo Mbalasa ka Diolelo ka lo ngelo kanyu.

• Wanɛ wakoka mfundja nkombo: Apandjudi tshɛ, mbidja ndo wanɛ wayasha l’elimu wa l’etshumanelo, wetawɔ wetshelo wa lo Bible ndo wele yoho yawɔ ya lɔsɛnɔ mbɔtɔnɛka l’atɔndɔ w’Akristo.

• Dia mfundja lokombo: Sawola la omendji wa Kalasa k’olimu wa teokrasi.

Kalasa ka mbeka ɔtɛkɛta w’angɛndangɛnda

• Oyango: Dia mbetsha apandjudi woho wa nsambisha lokumu l’ɔlɔlɔ l’ɔtɛkɛta okina.

• Edja kaviyatɔ: Ngɔndɔ nyɛi kana tshanu. Mbala efula kalasa kɛnɛ salemaka Lushi la samalo la pindju l’edja ka oshidi a tango ɔtɔi kana ehende.

• Dihole diasalematɔ: Mbala efula lo Mbalasa ka Diolelo kele suke.

• Wanɛ wakoka ndjafundja: Apandjudi wele la dionga dia dimɛna wakombola tosambisha l’ɔtɛkɛta okina.

• Woho wasalematɔ: Bɛtɛlɛ mbakongɛ kalasa kɛsɔ lo ndjela ohomba wele la dui sɔ.

Wokelo wa Mbalasa ya Diolelo

• Oyango: Dia mbika ndo nɔngɔsɔla Mbalasa ya Diolelo. Ɔnɛ kema kalasa, koko oma lo yɛdikɔ nyɛ, anto wayakimɔ la lolango mbetshamaka woho wa nkondja diewo dia tosha lonya lo dikongelo dia wokelo.

• Edja kaviya olowanyelo: Nemanɛka l’akambo wele l’anto wakayakimɔ la lolango.

• Dihole diasalemawɔ: Dihole tshɛ diasɔna Kɔmite rɛjiɔnalɛ ka wokelo wa Mbalasa ya Diolelo. Anto amɔtshi wayakimɔ la lolango mbelamɛka dia tosha lonya l’olimu l’ahole efula wa tale etena katomba mpokoso.

• Wanɛ walowanyawɔ: Paka anangɛso l’akadiyɛso wambobatizama ndo wambetawɔma oma le olui wa dikumanyi. Vɔ mbeyaka monga la diewo l’awui wa wokelo kana bu.

• Woho wasalemawɔ: Lodia fɔrmilɛrɛ Questionnaire pour les volontaires (S-82) ko wɛ mbisha dikumanyi dia l’etshumanelo kana naka wɛ ekɔ lo Congo ko wɛ ndodia Demande d’admission dans l’ordre international des serviteurs spéciaux à plein temps Témoins de Jéhovah en tant que serviteurs pour la construction de Salles du Royaume (A-12) katomama oma lo Bɛtɛlɛ.

Kalasa k’ambatshi mboka

• Oyango: Dia nkimanyiya ambatshi mboka dia vɔ ‘nkotsha olimu awɔ w’esambishelo dimɛna dimɛna.’—2 Tim. 4:5.

• Edja kaviyatɔ: Mingu hiende.

• Dihole diasalematɔ: Bɛtɛlɛ mbɔsa yɛdikɔ; mbala efula lo Mbalasa ka Diolelo kele suke.

• Wanɛ wɔtɔ lɔkɔ: Apandjudi wambokamba oko ambatshi mboka wa pondjo l’edja k’ɔnɔnyi ɔtɔi.

• Dia mbɔtɔ lɔkɔ: Bɛtɛlɛ mbasɔna ambatshi mboka wa pondjo ndo vɔ mbewoyaka omendji awɔ w’otshimbedi.

Kalasa k’ase Bɛtɛlɛ weke eyoyo

• Oyango: Kalasa kɛnɛ nɔngɔswamaka dia nkimanyiya ase nkumbo ka Bɛtɛlɛ weke eyoyo dia vɔ ntondoya olimu awɔ wa lo Bɛtɛlɛ.

• Edja kaviyatɔ: Oshidi a tango ɔtɔi lomingu tshɛ l’edja ka mingu dikumi la shamalo.

• Dihole diasalematɔ: Lo Bɛtɛlɛ.

• Wanɛ wɔtɔ lɔkɔ: Pombaka monga ose nkumbo ka Bɛtɛlɛ lamboyakimɔ dia nkamba pondjo kana lo tshanda mɔtshi (ɔnɔnyi ɔtɔi kana ndekana).

• Dia mbɔtɔ lɔkɔ: Ase nkumbo ka Bɛtɛlɛ sɔnamaka mbala kakɔ ɔtɔi dia mbɔtɔ.

Kalasa k’olimu wa Diolelo

• Oyango: Dia ndowanya dikumanyi la ekambi wakimanyiya dia nkokɛ anto walɔmbɔlawɔ dimɛna ndo nkotsha ɛkɛndɛ wele lawɔ l’okongamelo. (Etsha 20:28) Kalasa kɛnɛ salemaka l’ɔkɔngɔ w’ɛnɔnyi engana naka Olui-walɔmbɔla ambokikongɛ.

• Edja kaviyatɔ: L’ɛnɔnyi weke ka mbeta, tɔ kakasalema lushi ɔtɔi l’etenyi lo dikambo dia dikumanyi ndo lushi ɔtɔi lo dikambo dia ekambi wakimanyiya.

• Dihole diasalematɔ: Mbala efula, lo Mbalasa ka Diolelo kana Mbalasa ka nsanganya ya weke kele suke.

• Wanɛ wɔtɔ lɔkɔ: Paka dikumanyi kana ekambi wakimanyiya.

• Dia mbɔtɔ lɔkɔ: Omendji w’otshimbedi mbelɛ dikumanyi la ekambi wakimanyiya.

Kalasa dikambo dia dikumanyi dia l’etshumaneloa

• Oyango: Dia nkimanyiya dikumanyi dia vɔ nkotsha ɛkɛndɛ awɔ wa l’etshumanelo dimɛna.

• Edja kaviyatɔ: Nshi tshanu.

• Dihole diasalematɔ: Bɛtɛlɛ mbashikikɛ dihole; mbala efula lo Mbalasa ka Diolelo kana Mbalasa ka nsanganya ya weke kele suke.

• Wanɛ wɔtɔ lɔkɔ: Paka dikumanyi.

• Dia mbɔtɔ lɔkɔ: Bɛtɛlɛ mbelɛ dikumanyi.

Kalasa k’emendji weteta la wadiɛwɔb

• Oyango: Dia nkimanyiya emendji w’etshimbedi la emendji wa distrikɛ dia ndeka mbeya kambɛ tshumanelo ndo ndeka ndjasha lo “ulimu wa nsambisha ndu wa mbetsha” ndo mbeya nkokɛ wanɛ walamawɔ.—1 Tim. 5:17; 1 Pet. 5:2, 3.

• Edja kaviyatɔ: Ngɔndɔ hiende.

• Dihole diasalematɔ: Bɛtɛlɛ mbashikikɛ.

• Wanɛ wɔtɔ lɔkɔ: Paka emendji w’etshimbedi la wa distrikɛ.

• Dia mbɔtɔ lɔkɔ: Bɛtɛlɛ mbelɛ emendji weteta la wadiɛwɔ.

Kalasa ka Bible k’anangɛso w’enyembac

• Oyango: Dia ndowanya dikumanyi l’ekambi wakimanyiya wahatatshukana dia vɔ mbeya mɛmba ɛkɛndɛ ekina. Efula ka wanɛ walongola apɔlɔmɛ tomamaka dia tokamba l’ahole wewɔ l’ohomba w’ekimanyiyelo lo ngelo yawɔ. Amɔtshi mbeyaka tomama lo wodja okina naka vɔ mbewoya Bɛtɛlɛ.

• Edja kaviyatɔ: Ngɔndɔ hiende.

• Dihole diasalematɔ: Bɛtɛlɛ mbashikikɛ dihole; mbala efula lo Mbalasa ka nsanganya ya weke kana lo Mbalasa ka Diolelo.

• Wanɛ wɔtɔ lɔkɔ: Anangɛso w’enyemba wele l’ɛnɔnyi lam’asa 23 ndo 62, wele la yônge ya dimɛna walanga ntshɔ dia tokambɛ anangɛso ndo sukɛ wahɔ wa Diolelo l’ahole wewɔ l’ohomba w’ekimanyiyelo. (Mako 10:29, 30) Vɔ pombaka monga anto wambokamba l’ɛkɛndɛ awɔ l’edja k’ɛnɔnyi ehende aha la memadia.

• Dia mbɔtɔ lɔkɔ: Naka kalasa kɛnɛ kakalɔngɔswama lo filialɛ kanyu, kete losanganya lendana la wanɛ walanga mbɔtɔ lɔkɔ layosalema lo Losanganya l’otshimbedi. Awui akina wendana la dikambo sɔ wayɔtɛkɛtama lo losanganya lakɔ.

Kalasa ka Bible k’atshukanyi w’Akristod

• Oyango: Dia mbisha atshukanyi wele bu l’ana olowanyelo wa lânde wayowakimanyiya dia Jehowa la okongamelo ande ndeka nkamba lawɔ. Efula ka wanɛ walongola apɔlɔmɛ tomamaka dia tokamba l’ahole wewɔ l’ohomba w’ekimanyiyelo lo ngelo yawɔ. Amɔtshi mbeyaka tomama lo wodja okina naka vɔ mbewoya Bɛtɛlɛ.

• Edja kaviyatɔ: Ngɔndɔ hiende.

• Dihole diasalematɔ: Kalasa ngana ya ntondo yambosalema la Patterson, l’osomba wa New York, lo dihole diasalema Kalasa ka Ngiliyadɛ. L’ɔkɔngɔ wa lâsɔ, kalasa kakɔ kayosalema lo dihole diayoshikikɛ Bɛtɛlɛ, koko mbala efula tɔ salemaka lo Mbalasa ya nsanganya ya weke kana lo Mbalasa ya Diolelo.

• Wanɛ wɔtɔ lɔkɔ: Atshukanyi wele l’ɛnɔnyi lam’asa 25 la 50 ndo wele la yônge ya dimɛna wakoka ntshɔ dia tokamba l’ahole wewɔ l’ohomba w’ekimanyiyelo ndo wele la yimba y’ɔnɛ: “Dim’one, untumi.” (Is. 6:8) Lâdiko dia lâsɔ, vɔ pombaka monga anto wambotshukana l’edja k’ɛnɔnyi ehende ndo wambokamba olimu wa lo tena tshɛ l’edja k’ɛnɔnyi ehende aha la memadia.

• Dia mbɔtɔ lɔkɔ: Naka kalasa kɛnɛ kakalɔngɔswama lo filialɛ kanyu, kete losanganya lendana la wanɛ walanga mbɔtɔ lɔkɔ layosalema lo Losanganya la lânde la lushi ɔtɔi. Awui akina wendana la dikambo sɔ wayɔtɛkɛtama lo losanganya lakɔ.

Kalasa ka Ngiliyadɛ ka Bible ka Ɛmɛnyi wa Jehowa

• Oyango: Dia ndowanya ambatshi mboka ndo ekambi ekina wa lo tena tshɛ dia vɔ nkamba olimu wa misiɔnɛrɛ.

• Edja kaviyatɔ: L’edja ka ngɔndɔ tshanu.

• Dihole diasalematɔ: La Patterson, l’osomba wa New York, dihole diasalema Kalasa ka Ngiliyadɛ.

• Wanɛ wɔtɔ lɔkɔ: Atshukanyi wambobatizama l’edja k’ɛnɔnyi esato ndo waya l’ɛnɔnyi lam’asa 21 la 38 etena kalodiawɔ dɛmandɛ diawɔ dia ntondo. Vɔ pombaka ntɛkɛta Angɛlɛ, monga anto wambotshukana l’edja k’ɛnɔnyi ehende ndo wambokamba olimu wa lo tena tshɛ ɛnɔnyi ehende aha la memadia. Vɔ pombaka monga la yônge ya dimɛna. Ambatshi mboka wakamba lo wodja okina, (mbidja ndo wanɛ wele waa misiɔnɛrɛ); emendji weteta; ase nkumbo ka Bɛtɛlɛ; ndo wanɛ wakalongola apɔlɔmɛ lo kalasa kakelamɛka ntondo ɔnɛ Kalasa k’olowanyelo w’ekambi, Kalasa ka Bible k’anangɛso w’enyemba ndo Kalasa ka Bible k’atshukanyi w’Akristo ndo vɔ lawɔ mbeyaka ndodia dɛmandɛ naka vɔ nangaka mbɔtɔ lɔkɔ.

• Dia mbɔtɔ lɔkɔ: Lo Bɛtɛlɛ yambɔsɔnama, losanganya lendana la wanɛ wayasha dia mbɔtɔ lo kalasa kakɔ salemaka lo Losanganya la distrikɛ. Awui akina wendana la dikambo sɔ tɛkɛtamaka lo losanganya lakɔ. Naka losanganya lendana la dikambo sɔ hatosalema lo Losanganya la distrikɛ la lo ngelo kanyu ko wɛ kombolaka ndodia dɛmandɛ, kete wɛ mbeyaka fundɛ Bɛtɛlɛ ka lo wodja anyu dia mbeya awui akina wendana la dikambo sɔ.

Kalasa k’ase kɔmite ka filialɛ la wadiɛwɔ

• Oyango: Dia nkimanyiya wanɛ wakamba lo Kɔmite ka filialɛ dia vɔ nkotsha ɔkɛndɛ awɔ wa mendaka woho wakɛndakɛnda Bɛtɛlɛ dimɛna, mbidjaka yimba lo akambo wendana la tshumanelo ndo mendaka emendji w’etshimbedi la wa distrikɛ lo bɛtshi diawɔ dia nkɛtɛ, mendaka olimu w’okadimwelo, w’otondjelo ndo w’otomelo w’ekanda ndo mendaka adepartɛma akina.—Luka 12:48b.

• Edja kaviyatɔ: Ngɔndɔ hiende.

• Dihole diasalematɔ: La Patterson, l’osomba wa New York, lo dihole diasalema Kalasa ka Ngiliyadɛ.

• Wanɛ wɔtɔ lɔkɔ: Ase Kɔmite ka filialɛ kana ase Kɔmite ka wodja kana wanɛ wambowelɛ dia mbɔtɔ.

• Dia mbɔtɔ lɔkɔ: Olui-walɔmbɔla mbelɛ anangɛso wakoka mbɔtɔ la wadɛwɔ.

[Nɔtɛ ya l’ɛse ka dikatshi]