Ntɔngɔ pombaka mbitamɛ ashi dia yɔ mbola
1. Diangɔ diakɔna diahomba mbitamɛ ashi dia diɔ mbola?
1 Ntɔngɔ yonɛwɔ lo jardɛ, pombaka mbitamɛ ashi dia yɔ mbola. Ngasɔ mbediɔ ndo lo kɛnɛ kendana la ntɔngɔ y’akambo wa mɛtɛ yonɛso l’etema w’anto wa l’ɛtshi kaso ka nkɛtɛ. (1 Kor. 3:6) Sho pombaka nkalola dia towaembola ndo totɛ ashi lo ntɔngɔ ya didjidji shɔ lo nkamba la Ɔtɛkɛta wa Nzambi naka sho nangaka dia yɔ mbika edio, mbola ndo ntɔ elowa.
2. Ngande wakokaso ndjalɔngɔsɔla dikambo dia wendelo w’oyoyo?
2 Tonyiya dimbola: Etena kalɔngɔsɔlaso mbɔtwɛlɔ ka sawo, shi sho kokaka nɔngɔsɔla dimbola diakoka nkotola yambalo y’ompokami diayotokimanyiya dia sho ndjokadimola lo wendelo w’oyoyo? Tonyiya dimbola l’ekomelo ka sawo diaso dia mbala ka ntondo ndo toshikikɛ lushi layotokalola dia ndjokadimola. Anto efula mɛnaka dimɛna nsɔna dui dimɔtshi oma lo dibuku Bible etshatɔ diayoyakimanyiya dia vɔ ndjotatɛ mbeka l’onto Bible.
3. Awui akɔna wakokaso mfunda etena kɛnya onto nsaki?
3 Tofunde awui wele ohomba: Kam’amɔso oma lale ompokami aso, tofunde awui wele ohomba. Tofunde lokombo ndo adrɛsɛ ande. Ekɔ nto ohomba mfunda datɛ, wonya wakatasawodi la nde, dikambo diakatasawodi, okanda wakatawosha ndo dikambo dikina tshɛ di’ohomba. Onde nde akatshi ɔnɛ nde ekɔ l’ɔtɛmwɛlɔ ɔmɔtshi? Onde nde ekɔ la nkumbo? Onde nde akɛnyisha awui wayashande lɔkɔ ndo ekiyanu ande? Akambo asɔ wayotokimanyiya dia mbeya dui dimɔtshi diele ohomba le nde diayotoyosawola etena kayotokalola dia ndjowembola. Tofunde nto lushi layotokalola dia ndjowembola ndo dimbola diayotoyokadimola.
4. Lo kɛnɛ kendana la mbesa nsaki kakɛnya onto, lande na kahombaso monga l’etete?
4 Tonge l’etete: Satana hahekɔ lo welo wadjande wa ‘minya dui’ diakonɛma l’otema w’onto. (Mako 4:14, 15) Ɔnkɔnɛ, tatohekɔke naka hatotane onto lakɛnya nsaki lakande. Onde hatokoke mbôfundɛ mukanda kana mbotshikɛ nɔtɛ la soko? Ombatshi mboka ɔmɔtshi akatatɛ mbeka Bible la womoto ɔmɔtshi lakande, koko nde kombotana nto nshi nkina, ɔnkɔnɛ nde akôfundɛ mukanda. Etena kakayôtanaka kadiyɛso lakande, womoto ɔsɔ akɛnya lowando l’efula laki lande l’ɔtɛ wakandayasha l’otema ɔtɔi le nde. Naka sho mbitɛ ntɔngɔ y’akambo wa mɛtɛ ashi, kete sho kokaka monga l’ɔngɛnɔngɛnɔ waya lo mɛna woho watombayɔ, watshundayɔ ndo “wat[ɔyɔ] elua: emotshi akumi asatu akumi asatu, akumi asamalu akumi asamalu, ekina lukama lukama.”—Mako 4:20.