Tolowanya akoka aso wa nsambisha—Lo ntshika dui dimɔtshi dia ndjosala wendelo w’oyoyo
Ohomba wa dikoka sɔ: Etena kahomanaso l’onto ɔmɔtshi lambɛnya nsaki, sho kombolaka nkalola towenda lɛnɛ adjasɛnde l’oyango wa totɛ lɔtɔngɔ l’akambo wa mɛtɛ lakatonɛ ashi. (1 Kɔr. 3:6) Mbala efula dui sɔ nɔmbaka dia ntshikɛ onto dui dimɔtshi la ntondo ka nkakitɔna la nde, dia ndjosala wendelo w’oyoyo lam’ayotokalola dia ndjowembola. Laadiko dia laasɔ, ekɔ ohomba ntshikɛ ompokami dimbola dia ndjɔkɛtshanya la nde mbala kayaye. Dui sɔ diayolomialomia nsaki kande ndo naka dimbola diakɔ kadimɔma lo periodikɛ kakatotshikɛ, kete nde ayoleka ngɛnangɛna kiadia. Ntshika dui dimɔtshi dia ndjosala wendelo w’oyoyo ayotokimanyiya nto dia ndjɔkɛtshanya l’ompokami aso aha l’okakatanu, nɛ dia takashile nsɔna ɔtɛ a dui ndo kɛsɔ ayowokimanyiya dia mbeya kɛnɛ kayotoyosawola. Etena kakalolaso, sho koka mbotɛ ɔnɛ tamboya ndjokadimola dimbola diakatonyiya mbala ketshi ndo oma laasɔ, ko sho tetemala la sawo.
Woho wa nsala dui sɔ:
• Etena kalɔngɔsɔlayɛ mbɔtwɛlɔ kayotokamba la yɛ lo luudu la luudu, lɔngɔsɔla ndo dimbola dimɔ diayoyokadimɔma mbala kayaye. Diɔ koka mbɔsama oma lo sawo dimɔtshi diele lo periodikɛ kakatombi la yɛ kana diɔ koka monga dimbola dimɔtshi diambokadimɔmaka l’ekanda aso wekaso l’anto diakokayɛ ndjokamba la diɔ mbala kayaye.
• Naka wɛ ambokomiya sawo l’onto ɔmɔtshi lɛnyisha nsaki, tɛnde dia wɛ kombolaka ndjosawola la nde mbala kekina ndo okande dimbola diakayatalɔngɔsɔdi. Lo bɛtshi dia nkɛtɛ dimɔtshi, anto mongaka l’elimu efula ndo mengengaka dia mbokana l’onto dia ndjowembola nto. Lo tena dia ngasɔ, wɛ koka mimbola onto ɔnɛ: “Onde wonya ɔnɛ mbalekayɛ tanema laa ngelo? [Tshikande akadimole.] Oma laasɔ, tɛnde ɔnɛ dimi kombolaka sho ndjosawola lomingu layaye lo tshena pe ndo ndjokadimola dimbola nɛ . . . Naka wɛ ayonga l’awui efula wa nsala, ko wɛ mbutɛmi.”
• Naka wɛ ambotɛ ompokami ayɛ dia wɛ ayoyowembola lo wonya kapanda, kete kɔlɛnya ɛtɛkɛta ayɛ. (Mat. 5:37) L’ekomelo ka sawo dianyu, kotshike dui dimɔtshi dia ndjosala wendelo w’oyoyo.
Hemba nsala nganɛ lo ngɔndɔ kɛnɛ:
• Etena kalɔngɔsɔlayɛ mbɔtwɛlɔ ya tokamba la yɔ l’esambishelo, kɔlɔngɔsɔlɛ ndo dimbola dimɔtshi dia ndjokadimola mbala kayaye. Kɛɛnya ndo opandjudi watasambisha la yɛ dimbola diakɔ.