Etena kakɔna kahombaso nkalola dia tenda wanɛ wakɛnya nsaki?
1. Kakɔna kalɔmbama dia mbetɛ anto ambeki?
1 Mbetɛ anto ambeki nɔmbaka dia nkalola dia tenda wanɛ tshɛ walanga mbeka awui wendana la Diolelo diaki Jehowa. (Mat. 28:19, 20) Mbala efula, etena koleki dimɛna kakokaso nkalola dia tembola onto lakɛnya nsaki nɛmanɛka la ekongelo kaso ndo k’onto akɔ. Lande na kahombaso nkalola esadi eto l’ɔkɔngɔ wa sho nsawola l’onto mbala ka ntondo?
2, 3. Lande na kahombaso nsala la wolo dia nkalola esadi eto dia tembola wanɛ wakɛnya nsaki?
2 Lande na kahombaso nkalola esadi? Olimu wa nsambisha “lukumu l’ololo lone la diulelu” wayanga nkomɛ ndo ekomelo ka dikongɛ nɛ di’akambo kaya suke. (Mat. 24:14; 1 Pet. 4:7) Ɔnkɔnɛ, lam’ele “lushi la panda” leke la ntondo ka wanɛ wɛnya nsaki, sho pombaka nkitanyiya dako diatɔlɔmba dia ‘nsambisha ɔtɛkɛta l’etete,’ ndo dui sɔ mendanaka nto la nkalola dia tembola esadi eto wanɛ wakɛnya nsaki.—2 Kor. 6:1, 2; 2 Tim. 4:2.
3 Satana ekɔ lo nomɔlomɔ dia monola lɔtɔngɔ la Diolelo tshɛ lakoka monɛma l’otema wa onto lɛnya nsaki. (Mako 4:14, 15) Mbala efula, ase nkumbo ya wanɛ wɛnya nsaki, asekawɔ wa l’olimu, angɛnyi awɔ ndo anto akina mbeyaka mbasɔka. Nkalola esadi eto tokimanyiyaka dia ntatshiya sawo diaso lo awui wakatasawola l’ompokami aso mbala ketshi la ntondo k’anto akina ndjɔdia nsaki kakawɛnya.
4. Etena kahomanaso l’onto mbala ka ntondo, kakɔna kakokaso nsala dia ndjalɔngɔsɔla dikambo dia wendelo w’oyoyo?
4 Toshane la nde randevu: Ekɔ dimɛna sho tôkanyi l’ompokami aso lushi lahombaso nkalola towenda la ntondo ka sho ndjokalola dia tosala wendelo w’oyoyo. Towoke dimbola diayotoyokadimola lo wendelo w’oyoyo wa mbala kayaye. Ekɔ ohomba dia sho mfunda lushi lakatasale wendelo wa ntondo ndo lushi layotoyosala wendelo wa hende. Naka ekongelo kaso toshaka diaaso, kete sho kokaka mbɔlɔmba dia nkalola dia ndjowenda la wedi a pindju kana nshi ngana l’ɔkɔngɔ. Naka takasale wendelo wa ntondo lo wikɛndɛ ndo ɔnɛ lɛnyisha nsaki kambaka olimu l’atei atei a lomingu, kete ondo nde mbeyaka tɔlɔmba dia sho nkalola dia ndjowenda wikɛndɛ wayela. Etena kashaso onto randevu, toyashikikɛ dia tayokotsha ɛtɛkɛta aso.—Mat. 5:37.
5. Ngande wele woho wayotokalolaka dia tembolaka wanɛ wakɛnya nsaki esadi eto ayotokimanyiya dia sho nkotsha ɔkɛndɛ wakatosha Yeso wa mbetɛ anto ambeki?
5 Tekɔ l’ɛkɔkɔ w’amɛna wakalolaso dia tenda anto wakɛnya nsaki aha la ntshimbatshimba. Ɔnkɔnɛ, towasha randevu ndo tokalole esadi eto nɛ dia ‘etena kambotshikala kaya mondo.’ (1 Kor. 7:29) Lo yɛdikɔ yayotokalolaka esadi dia tembolaka wanɛ wakɛnya nsaki lo losango la Diolelo, mbayoleka welo wadjaso monga l’etombelo w’ɛlɔlɔ.