“Tônge la yêwo etena keso l’esambishelo”
1. Lande na kele ekɔ ohomba monga la yêwo etena keso l’esambishelo?
1 “Uku ekoko l’atei wa ndjaundu,” ekambi waki Nzambi wekɔ lo nsambisha “l’atei a lolonga la kolo ndu lahasimbwi.” (Mat. 10:16; Fil. 2:15) Alapɔlɔ ɛmɔtshi wa kɔlɔ mɛnyaka dia ata, awui wa ngala ndo wondelo w’anto la wolo wekɔ lo salema ahole tshɛ ndo awui asɔ mɛnyaka di’anto wa kɔlɔ wekɔ lo tahame ‘otsha lo kɔlɔ koleki.’ (2 Tim. 3:13) Atɔndɔ akɔna wa lo Bible wayotokimanyiya dia sho ‘monga la yêwo’ etena keso l’esambishelo?—Mat. 10:16.
2. Akambo akɔna wakoka totshutshuya dia sho mimɔ oma lo ɛtshi ka nkɛtɛ kɛmɔtshi ko ntshɔ l’ɛtshi kekina dia tosambisha?
2 Tônge la shɛnɔdi: Tukedi 22:3 mɛnyaka di’ekɔ dui dia lomba dia ‘ndjashɛ’ oma lo mpokoso. Tâmbalɛke. Akambo wa l’ɛtshi ka nkɛtɛ kaki bu ndoko la wâle lɔkɔ kokaka ntshikitana mbala kakɔ ɔtɔi. Sho mbeyaka mɛna di’apulushi woleka mbeteta lo toshinga kana elui w’anto wemadi lo toshinga. Mbala mɔtshi, onto ɔmɔtshi lasambishaso ndo latoka ngandji mbeyaka tewola. L’ɔtɛ wa sho kombola mbeya kɛnɛ keta, ayonga dui dia lomba sho mimɔ oma lo dihole diakɔ aha la ntshimbatshimba ko ntshɔ dihole dikina.—Tuk. 17:14; Joa. 8:59; 1 Tes. 4:11.
3. Ngande wakokaso nkamba la tɔndɔ diele lo Undaki 4:9 l’olimu w’esambishelo?
3 Tokambe kâmɛ: Undaki 4:9 mbutaka ɔnɛ: “Antu ahendi ndeka untu otoi.” Naka taki ondo la mbekelo ka tombaka shwamɛ l’esambishelo, onde ndo nshi nyɛ mbakokaso nsala dui sɔ aha la wâle ɔmɔtshi tokomɛ? L’ahole amɔtshi dui sɔ diakakoke salema. Koko l’ahole akina, ekɔ wâle dia kadiyɛso, ɔlɔngɔlɔngɔ kana osekaseka nsambisha ndamɛ lo luudu la luudu, djekoleko lo wenya w’akɔlɔ. Awui weta mɛnyaka dia onto latasambisha la so kokaka tokimanyiya efula naka nde ekɔ la shɛnɔdi. (Und. 4:10, 12) Etena katatasambisha, paka nsɛna wolo dia kokɛ wanɛ watasambisha la so. Tônge la mbekelo ka mbewoyaka anto wakatshwe la so dia tosambisha l’ɛtshi kɛmɔtshi ka nkɛtɛ dia tambokalola.
4. Ngande wakokaso nkokɛ ase etshumanelo tshɛ oma lo wâle?
4 Lam’ele vɔ ‘tetemalaka nsɛna dikambo dia anima aso,’ dikumanyi mbele l’ɔkɛndɛ wa mbisha ɛlɔmbwɛlɔ k’oshika lo ndjela akambo wele l’ɛtshi ka nkɛtɛ. (Heb. 13:17) Jehowa ayotɔtshɔkɔla naka sho monga Akristo wele l’okitshakitsha ndo wakamba kâmɛ la dikumanyi. (Mk. 6:8; 1 Kor. 10:12) Oko weso ekambi waki Nzambi, nyɛsɔ totetemale nsambisha l’ɛtshi kaso ka nkɛtɛ, koko mbala tshɛ tôngake la yêwo.