Tônge Tomanamana L’olimu Aso W’esambishelo

¹ Olongo aya hitɔɔ, ndo lɔɔka la mamba lambotɛ, edja ndo atui aya nyɛ. Dinge dimɔtshi diele oko edinga diamboholɔ. Ɛngɔ kakɔna kɛsɔ na? Toko olui w’ɛndjɔ wayanga nanya wodja vwa! Ɛnɛlɔ kɛsɔ kakafunde omvutshi Jɔɛlɛ, kakotshamakɔ ɛlɔ kɛnɛ oma l’esambishelo kasala ekambi wa Nzambi w’akitami vɔ la lemba la woke l’asekawɔ.

² Tshoto y’Etangelo ya Ngɔndɔ ka Tanu 1, 1998, lɛkɛ 17, odingɔ 19, mbutaka ɔnɛ: “Ɛndjɔ waki Nzambi wa nshi nyɛ wambosambisha efula l’‘osomba’ wa Lokristokristo. (Joele 2:⁠9) . . . Vɔ wekɔ lo tatambe wekamu tshɛ ndo wekɔ lo tɔtɔ lo miliyɔ ya mvudu, watasambisha anto l’ɛsɛsɛ, wâsambisha lo wa telefɔnɛ, ndo vɔ pomanaka l’anto lo weho ekina tshɛ wakoka, dia mbaewoya losango la Jehowa.” Kema ekɔ diɛsɛ dia woke le so dia kamba olimu ɔsɔ walɔmbwama oma le Nzambi?

³ Otshikitanyi l’ɛndjɔ wa mɛtɛ, weya paka dia ndɛ to, sho ekambi wa Jehowa ndjakiyanyaka efula lo dikambo dia lɔsɛnɔ la wanɛ wasambishaso. Sho kombolaka mbâkimanyiya dia vɔ mbeka akambo wa mɛtɛ wa diambo wele l’Ɔtɛkɛta a Nzambi ndo mbâkeketsha dia vɔ takula wanya wayowâtɔla otsha lo panda ka pondjo. (Joa. 17:3; 1 Tim. 4:16) Ɔnkɔnɛ, sho nangaka kamba olimu aso dimɛna efula. Oyadi woho akɔna w’esambishelo kɔsɔniso, sho pombaka ndjambola kana tekɔ lo sambisha lo yoho ndo l’etena kayotondja etombelo w’ɔlɔlɔ. Lam’ele ‘andja ɔnɛ wɛnaso wekɔ lo tatshikitana,’ ayoleka dimɛna sho sɛdingola toho taso ta sambisha ndo mbɔtwɛlɔ y’asawo aso dia sho ndjashikikɛ ɔnɛ tekɔ lo ntsha tshɛ mɛtɛ dia kondja elowa w’olimu aso.​—⁠1 Kor. 7:⁠31.

⁴ Kânga mbatshaso tshɛ dia pomana l’anto lo weho wotshikitanyi, esambishelo ka lo soko la soko mbele nshi tshɛ etshina k’olimu aso. Onde sho mɛnaka dia tena efula anto hawotanema lawakawɔ kana wekɔ lo djɔ etena katshɔso atowaenda? Demba kɔmɔka mɛtɛ naka hatowaewoyisha lokumu l’ɔlɔlɔ! Ngande wokokiso shidiya okakatanu ɔsɔ na?

⁵ Totshikitanyake Wenya ndo Tokanake Yimba: L’eleko ka ntondo l’Isariyɛlɛ, amundji a nse wakakambaka olimu awɔ l’otsho. Lande na na? Mɛtɛ, aha l’ɔnɛ l’otsho mbakiwɔ l’etena, koko wonya ɔsɔ mbakawandaka nse efula. Etena kɛsɔ mbakawalekaka kondja elowa w’olimu awɔ. Lo dikambo sɔ, Tshoto y’Etangelo ya Ngɔndɔ ka Samalo 15, 1992, mbutaka ɔnɛ: “Sho lawɔ pombaka mbeka mbilo kaso woho wa sho ntshɔka la nse, mbut’ate la tosambisha, etena kaleka tanema anto lawakawɔ ndo kewɔ la wangasanu dia tolonga.” Lo menda mbekelo yele l’anto wadjasɛ la tokoma t’osomba la l’ahata wadjasɛ anto, sho mɛnaka dia ondo efula kawɔ tanemaka la ngelo la pindju ka pɛ Lushi la Samalo la la Lomingu, koko vɔ hawotolangaka tolonga lo wonya ɔsɔ. Naka ngasɔ mbele lo ngelo kanyu, bonde kahayete naka wonya ambowanda yema kana l’ɔkɔngɔ a midi? Ɔsɔ ayonga yoho y’ɔlɔlɔ ya sho kamba olimu aso dimɛna efula ndo ya nɛmiya onyaso, dui diɛnya ɔnɛ tekɔ Akristo wokana ngandji k’oshika.​—⁠Mat. 7:⁠12.

⁶ Lo Filipi 4:​5, ɔpɔstɔlɔ Paulo toholaka ɔnɛ ‘eongelo kaso k’anto wakana yimba kêyame le anto tshɛ.’ Lo ndjela dako sɔ diakasambiyama oma le Nzambi, sho nangaka monga la wɛdimo ndo kanaka yimba ɔlɔlɔ lam’atatasambisha l’ohetoheto ndo la wangasanu. Dui sɔ hɛnya ɔnɛ ‘totshike ndakanya lo sɛkɛ la lo luudu la luudu,’ koko sho nangaka ndjashikikɛ ɔnɛ tekɔ lo kamba olimu aso lo tena diasungana ndo diasha etombelo w’ɔlɔlɔ. (Etsha 20:20) Oko amundji wa nse w’Ase Isariyɛlɛ wa l’eleko ka ntondo, ekɔ ohomba sho ‘sambisha’ etena kakokaso kondja etombelo w’ɔlɔlɔ, koko aha wonya wasungana le so.

⁷ Naa etshikitanu wahomba ntshama na? Mbala efula, randevu w’esambishelo salemaka Lushi la Samalo la la Lomingu l’eshidi 9 kana 9 h 30, l’ɔkɔngɔ ko apandjudi ntshɔ mbala kakɔ ɔtɔi otsha lo soko la soko. Omalɔkɔ, elui ɛmɔtshi wa dikumanyi mbɔsaka tɛdikɔ dia apandjudi sambisha lo weho ekina, oko l’ɛsɛsɛ, l’ahata a waa kɔmɛlɛsa, ndo membola anto la ntondo ka ntshɔ lo soko la soko l’ahata wadjasɛ anto. Lo tshumanelo dikina, randevu w’esambishelo ndjosalemaka naka wonya ambowanda, l’eshidi 10, 11 kana 12. L’ɔkɔngɔ, ko apandjudi ntshɔ lo soko la soko polo l’ɔkɔngɔ a midi. Lo mbilo mɔtshi, sambisha l’ɔkɔngɔ a midi ndeka la pindju dimɛna. Etshikitanu wa ngasɔ mɛtɛ ayosha esambishelo ka lo soko la soko etombelo w’ɔlɔlɔ efula.

⁸ Tônge la Shɛnɔdi ndo la Yewo: Anto wahomana la so lo soko la soko hawolongola losango laso woho wamɛ. Amɔtshi mpokɛka lotui, akina mendjolaka, atɔi amɔtshi mamanɛka la so kana nyangaka tɔlɔsha. Lo dikambo sɔ, dibuku Comment raisonner à partir des Écritures tôholaka lo lɛkɛ 7 ɔnɛ sho hatoyange dia “mbetawoya wanɛ wahɔshi akambo wa sɔlɔ la nɛmɔ.” Naka onto lasawola la so olanga tondja londjo, kete ndeka dimɛna sho minya demba. Aha sho tɛtɛ pondjo ɔnɛ paka anto sawola la so kana mbetawɔ kanyi yaso. Hatotshutshuya ndoko onto la wolo. Ɔsɔ bu dui dia yimba ndo diɔ kokaka mbidja Ɛmɛnyi ekina kânga olimu w’otondo w’esambishelo l’ekakatanu.

⁹ La ntondo ka kindola lo mbilo, ekɔ dimɛna menda kana lo tshapatapa ya mbilo kayɛ kiatshi yekɔ yofundami adrɛsɛ w’anto wahayolanga sho ntshɔ atowaenda. Naka ekɔ ngasɔ, kete pombaka mbewola opandjudi tshɛ wasambisha l’ɔsɛsɛ akɔ. Aha onto ntshɔ dia tênda anto asɔ naka omendji w’olimu hawosha dikimɔ.​—⁠Enda l’Olimu Aso wa Diolelo wa Ngɔndɔ k’Esambele 1994, Ekadimwelo lo Wembola Anyu.

¹⁰ Tayonga tomanamana naka sho monga la shɛnɔdi lam’atatasambisha lo soko la soko. Toshishime ɔlɔlɔ etena katatasukana otsha lo luudu l’onto. Onde nkuke l’adidishi ndo erido tshɛ wakadihami? Onde lawɔ ekɔ tshɛtshɛlɛ? Ondo akanga a luudu wekɔ lo djɔ. Omalɔkɔ, ondo tayokondja etombelo w’ɔlɔlɔ lam’ayotoyɛnana lawɔ wonya okina. Mɛtɛ, ayoleka dimɛna funda numɛlɔ ka luudu lakɔ ko tomba aha kɔkɔla wonya ongo. Sho koka ndjokalola la ntondo ka mimɔ oma lo mbilo kakɔ kana funda ɔnɛ pombaka kalola wonya okina.

¹¹ Koko, tena dimɔtshi sho mbeyaka memula kana futanya onto aha la mbeya. Onto akɔ koka momala. Ayototsha na? Tukedi 17:27 mbishaka dako nɛ: “One latuyakimelaka lu aui andi, ele kanga yimba.” Sho hatɔlɔmbɛ edimanyielo nɛ dia tambokamba olimu aso, koko sunganaka sho nɔmba edimanyielo nɛ dia taketshi lo wonya wahasungana. Sho kokaka nɔmba la loshilambo dia kana kokaka sho mbeta lo wonya wasungana. Ɛtɛkɛta wa la yambalo ndo la dui dia lotutsha totutshaka anto wa ngasɔ. (Tuk. 15:⁠1) Naka onto ambototɛ ɔnɛ nde ndalaka djamu, sho koka funda dui sɔ lo nɔtɛ kayotokimɔ la kartɛ ka mbilo, woho wa ndjowenda lushi lokina lo wonya wasungana.

¹² Dia manyamanya mbilo, ekɔ ohomba nto monga la shɛnɔdi. Lam’ele anto efula komonga lawakawɔ lam’akatête mbala ka ntondo, sho pombaka mbidja weolo nto dia mbâsambisha losango la panda. (Romo 10:13) Tena dimɔtshi apandjudi mbetetaka mbala efula lushi lakɔ lâmɛ ɔnɛ kana wahomanaka l’anto lawakawɔ. Asukanyi mbaɛnaka ndo vɔ koka mɛna kɔlɔ ɔnɛ Ɛmɛnyi wa Jehowa têtetaka l’ɛsɛsɛ ‘wonya tshɛ l’asoko w’anto.’ Ngande wokokiso mbewɔ dikambo sɔ na?

¹³ Pombaka monga la shɛnɔdi. Etena kakalolaso nto lo soko di’onto lahongi lâwɔ, tênde kana ɛngɔ kɛmɔtshi kekɔ kɛnya ɔnɛ nde ambokalola. Naka tambɛna lokuke ndihama l’epole kana la kengete, kete lâsɔ nde ataye; ndoko ohomba wa kɔkɔla nto lo soko diakɔ. Naka tambokalola mbala efula ndo la dikɔlɔ lushi lakɔ lâmɛ ko hatôtanyi, kete sho kokaka mbêlɛ lo telefɔnɛ. Naka aha ɔsɔku, tôtshike traktɛ kana kiatshi ya leeta la soko aha l’anto mɛna, djekoleko naka mbilo kakɔ kambokindjakindjama efula. Mbala kekina, sho mbeyaka ndjonga la diɛsɛ dia pomana l’onto akɔ lam’ayotoyosambisha lo mbilo kakɔ nto.

¹⁴ Pombaka sho mbewɔ sawo di’ɔtshɔlɔlɔ naka onto ekɔ lo yanyi. Naka wambototɛ dia mbɔtɔ lo luudu, tohome ekolo dimɛna di’aha mɛmba nkɛtɛ. Tônge totshundju naka mfɔ otohangwɛ. Naka tekɔ lo sambisha lo luudu lele l’asoko efula, tɔtɛkɛtɛ ɔkɔkɛ ndo aha mbidja londjo, di’aha futanya anto akina wadjasɛ lâwɔ ndo aha vɔ mboka ɔnɛ sho asɔ lâsɔ.

¹⁵ Toyalɔngɔsɔlɛ ndo Toyalɛnya: Naka sho ndjalɔngɔsɔla yema, kete tayokoka mbewɔ shambu y’anto tɛnaka elui elui lo mbilo. Anto koka mboka wɔma dia mɛna elui w’apandjudi wotshumanyi la ntondo ka mvudu yawɔ. Hatolange anto mɛna ɔnɛ tekɔ lo “talolanɛ” lo waa kartie. Ndeka dimɛna tayalɔngɔsɔlaki lo Mbalasa ka Diolelo, lo losanganya l’otsha la tosambisha. Tolui ta totshitshɛ t’apandjudi, tele oko nkumbo ɔtɔi, haleke mbotsha ase mbilo wɔma ndo bu wolo kahola nto etena katanyakindola mbilo.

¹⁶ Dia mbewɔ ofukutanu, ambutshi pombaka nama lɔkɛwɔ l’anawɔ dimɛna etena katawasambisha. Ana pombaka monga la loshilambo etena katawatshindɛ epalanga lo soko la soko. Aha tshika ana w’akɛnda dia vɔ takɛnyaka kana têtetaka woho walangawɔ, ko ase kartie l’ambetshitshi tawatanganɛka.

¹⁷ Sunganaka nto mumuyaka woho wakoka. Olimu Aso wa Diolelo wa Ngɔndɔ ka Dikumi l’Ahende 1995, lɛkɛ 5, mbutaka ɔnɛ: “Lam’asambishaso, ondo sho shishaka wenya ɛmɔtshi w’ohomba la tomuyaka. Tena efula naka yanyi amboleka wolo, kete sho mbeyaka mumuya yema dia kondja wolo wa tetemala la elimu aso. Koko apandjudi efula ndekaka nanga sambisha ndo hawɔshi wenya wakawalɔngɔsɔdi lo dikambo di’esambishelo dia mumuya kâmɛ l’anangɛwɔ ndo akadiyɛwɔ akina.” Kânga mbele ɔsɔ ekɔ dikambo diendana l’onto ndamɛ, sho tɛnaka dia anangɛso efula tohomanaka l’ɛrɛstora. Vɔ mbetshaka wenya la konga diangɔ diɔlɔmbiwɔ, ndo nto waa kidiya nkina koka mboka kɔlɔ dia mɛna lemba l’anto. Tena dimɔtshi, anangɛso mbidjaka londjo efula l’ɛkɔndɔ wa woho wakawasambishisha la pindju, dui sɔ shidiyaka nɛmɔ di’olimu aso ndo mbêtɛka ɔlɛlɔ. Apandjudi wonge la shɛnɔdi di’aha talolanɛka lo mvudu ndo tetshaka wenya wotowosambisha wetshetsha.

¹⁸ Efula kondjaka etombelo w’ɔlɔlɔ lo sawolaka l’anto l’ahole tshɛ wewɔ: l’ɛsɛsɛ, l’ahole wemadiawɔ mituka ndo l’asɛlɔ wemala anto elui elui. Ndo lɛsɔ nto, sho nangaka sambisha aha paka l’onyɔ oto koko ndo lo kanaka yimba ɔlɔlɔ. Apandjudi w’etshumanelo tshɛ pombaka nɛmiya olelo wa mbilo kawɔ, di’aha membiya anto l’ahole wasalawɔ ekanda kana wanɛ wasondja esasɛ la mandjoto wonya w’otondo. Dia sho ndjashikikɛ ɔnɛ tekɔ lo kamba olimu aso la kɔmba ndo la nɛmɔ, hatototamba elelo wa mbilo kaso, paka kana tɛdikɔ tɔmɔtshi ta lânde tambɔsama oma le kɔmite k’olimu k’etshumanelo kekina kele l’ohomba w’ekimanyielo.​—⁠Enda lo 2 Koreto 10:​13-15.

¹⁹ Tshumanelo dimɔtshi diekɔ l’ahole efula wakokawɔ sambisha lo tshakitudi. Ɔnkɔnɛ, vɔ wakâtanya ahole akɔ oko waa mbilo. Omalɔkɔ, vɔ mbishaka opandjudi kana olui w’apandjudi kartɛ ɔtɔi ka mbilo, woho wa kikindjakindja dimɛna ndo mbewɔ di’aha apandjudi efula sambisha wonya akɔ wamɛ lo dihole diamɛ lo ndjela kɛnɛ kofundami lo 1 Koreto 14:40: ‘Akambo tshɛ watshami la dimɛna ndo l’ɔnɔngɔ.’

²⁰ Nshi tshɛ, sho pombaka monga l’ɛnamelo kasunganaka kɛnya ɔnɛ tekɔ ekambi wɛmba lokombo la Jehowa. Ngasɔ mbahomba monga ndo diangɔ diaso. Atapa la Bible y’emusu efula hasha losango la Diolelo nɛmɔ. Onto ɔmɔtshi akate ɔnɛ ɔlɔtɔ aso ndo divo diaso “mɛnyaka anto wotodingi mbala kakɔ ɔtɔi woho w’onto weso ndo dihole diele laso lo tshunda di’anto.” Omalɔkɔ, ɔlɔtɔ aso hahombe monga epakapaka kana tshambandeko, koko ‘wasunganake nshi tshɛ la lokumu l’ɔlɔlɔ.’​—⁠Enda 1 Timote 2:​9, 10.

²¹ Lo 1 Kɔrɛtɔ 9:​26, NW, ɔpɔstɔlɔ Paulo ate: “Kele enda woho watomolawɔka: dimi halawɔ lowango olawɔlawɔ; enda woho wokami akɔfi ami: dimi halawaoke oko onto lakɔmɔla lɔpɛpɛ.” Oko Paulo, tamboyashikikɛ dia monga tomanamana ndo ntɔ elowa l’olimu aso. Oko wasambishaso l’ohetoheto l’atei “w’ɛndjɔ” waki Jehowa, tokanake yimba ɔlɔlɔ ndo tonge la shɛnɔdi lam’ewoyaso anyaso losango la panda!