Ekadimwelo lo Wembola Anyu
◼ Ngande wahombaso mambalɛka lam’atatasambisha lo mbilo ka wâle?
1 Tekɔ lo mboka anto wanyanya dia akambo wa ngala, ɔhɔtwanelo wa diangɔ ndo ɔtɔmbɔkwɛlɔ, djekoleko l’esomba a weke. Dikambo sɔ tonyangiyaka, koko sho mbeyaka ɔnɛ, kânga l’ahole wele ofukutanu efula, anto walanga ndjashaka lo losango la Diolelo. Ɔnkɔnɛ, lo etena kasungana, sho pombaka ndjâla la dihonga dia ntshɔ otsha la ntondo, tayashikikɛ ɔnɛ Jehowa ekɔ lo tolama.—Tok. 29:25; 1 Tes. 2:2.
2 Lam’atshɔso lo dihata dimɔtshi diokoki ndjâla wâle, Jehowa kongɛka oma le so dia sho ndjâla la yewo ndo la yimba y’ɔlɔlɔ. Tâmbalɛke. “Kanga yewo atenaka elanyelu, atuyasheka. Keli kanga enginya atokolamelaka lokendo, atusuwaka loko.” (Tuk. 22:3) Apandjudi wambekesanɛ l’olimu mbeyaka dia ekɔ dui dia tshundju sambishaka ahende ahende kânga ndekana, naka ohomba wekɔ. Sho mbalaka lo Undaki 4:9, 12 ɔnkɔnɛ: “Antu ahendi ndeka untu otoi . . . Naka pami kemotshi ayuleka one leli ndame wulu, antu ahendi mbeyaka mbuleka wulu.” Dengalenga mendaka mbala efula paka onto lele ndamɛ, nɛ dia nde kakokawɔ kesola esadi.
3 Toyale la yewo efula lam’atatasambisha l’abala a wodjima la lo towoka taheteta anto efula. Toyale la yewo lam’atotɛwɔ dia mbɔtɔ lo luudu lɔmɔtshi. Tatamanyake l’anto wɛnama oko mananɛka kana esolanyi. Towate esadi eto ɔnɛ: sho tekɔ Ɛmɛnyi wa Jehowa. L’oyango ɔsɔ mbakimɛ apandjudi Bible l’anya nshi tshɛ kana periodikɛ kɛmɔtshi: Tshoto y’Etangelo kana Réveillez-vous!
4 Tewɔ anto wateteta weteta eteta l’ɛsɛsɛ. Toyale la yewo lam’atatasambe l’anto wɛnama oko hawodjasɛ lo dihata diakɔ. Tatɔlɔtake dɛngalɛnga di’oshinga wolo. Naka sho pombaka tomba l’otsho, tatetake l’ɛsɛsɛ wa wodjima ndo waheteta anto efula. Naka wambotofumbwɛ lo demba, tatohatahatake naka wekɔ lo nyanga mbɔsa paka akuta aso kana diangɔ diaso to; lumu laso ndeka oseka ɛngɔ tshɛ ka l’emunyi oshinga wolo.—Mako 8:36.
5 Anangɛso wanɛ walɔmbɔla olimu wa l’olui ɔmɔtshi pombaka mendaka ɔlɔlɔ ndo mbeyaka wonya tshɛ lɛnɛ ele apandjudi ndo kɛnɛ kasalawɔ. Nshi tshɛ, tolekaka dimɛna dia olui w’anto sambisha lo dihata diâmɛ; ɔsɔku mbayotshikala apandjudi suke suke lam’asawɔ. Naka ofukutanu kana akambo wa ngala, wa woho akɔna tshɛ, wambotomba, pombaka tomba oma lo mbilo esadi esadi.
6 Naka tekɔ la kɛsɔ ndo la yewo, kete tayokoka tetemala la munanda etema w’anto wodjashi l’ahata wa wâle “wakhuma akhumu ndu walela, ne dia akambu tshe wa wononyi [watshama, NW] l’atei awo.”—Ezek. 9:4.