Ɔtɛkɛta wa Nzambi le so lo tshimbo ya Jeremiya
1. Dibuku diakɔna diakatondjama lo Losanganya la distrikɛ la 2010 ndo l’oyango akɔna wakadiatondjama?
1 Taki l’ɔngɛnɔngɛnɔ w’efula etena kakatombe dibuku di’oyoyo nɛ lo 2010 lo Losanganya la distrikɛ laki l’ɔtɛ a dui ɔnɛ: “Totshikale suke la Jehowa!” Dibuku nɛ diekɔ l’awui w’ohomba wɔsami oma lo dibuku dia Jeremiya la dia Delu dia Jeremiya ndo awui akɔ mendanaka la lɔsɛnɔ laso la lushi la lushi. (Romo 15:4) Diɔ diakatondjama l’oyango wa sho dieka lo Wekelo wa Bible wa l’etshumanelo ndo tayotatɛ dieka lo lomingu la Ngɔndɔ ka dikumi l’ɔtɔi 5, 2012.
2. Ngande wakokaso nkondja wahɔ lo nsɛdingola dibuku dia Jeremiya la dia Delu dia Jeremiya?
2 Diekɔ la wahɔ ɛlɔ kɛnɛ: Jeremiya, ofundji wa dibuku dia lo Bible diakasambiyama sɔ, akadifunde l’etena kaki ofukutanu wa wolo la Judeya. L’etatelo, nde akayaoke dia nde komonga l’akoka wa mɛmba ɔkɛndɛ ɔsɔ. (Jer. 1:6) Nde akahɛnyahɛnyama nto oma le asekande ndo ondo oma le ewɔtɔ ande waki l’Anatɔta, osomba ande wa lôtɔ. (Jer. 11:21, 22) Mbokɛmaka dia Jeremiya akayɔkɔmɔ l’etena kɛmɔtshi. (Jer. 20:14) Oko weso lo nkotsha olimu wakawatosha wa ‘mbetɛ anto w’oma lo wedja tshɛ ambeki,’ sho pomanaka l’akambo wa woho akɔ wâmɛ ndo sho ndjaokaka oko wakayaoke Jeremiya. (Mat. 28:19) Naka sho nsɛdingola dibuku diande sɔ, kete dui sɔ diayotokimanyiya dia sho monga la kɔlamelo ndo l’ohetoheto l’esambishelo.
3. Ngande wayotokamba l’awui amɔtshi wele lo dibuku dia Jeremiya?
3 Awui wele lɔkɔ: Avɛsa woleki ohomba wahomba mbadiema etena kasalema ɔkɛtshanyelo fundama la alɛta wa lolasha. L’ekomelo ka wekelo wa lomingu tshɛ ekɔ dimbola ɔtɔi kana ahende wele l’alɛta wedima wɛnya awui woleki ohomba wele lo wekelo. Pombaka mboka ampokami ambola asɔ dia mvusola awui wekami. Dibuku diakɔ di’otondo diekɔ l’esato w’amɛna efula wakoka etshumanelo mbisha kɔmatɛrɛ aha la tâmu.
4. Ngande wakokaso nkondja wahɔ lo nsɛdingola dibuku dia Jeremiya?
4 Dia sho nkondja wahɔ tshɛ lo tshɛ, katɔlɔngɔsɔlake wekelo la ntondo. Tende awui wakokaso nkamba la wɔ lo lɔsɛnɔ laso ndo l’olimu w’esambishelo. Katoshake kɔmatɛrɛ efula. L’ekimanyielo ka Jehowa, Jeremiya akakotsha ɔkɛndɛ ande l’ɔlɔ ndo l’ɔngɛnɔngɛnɔ w’efula. (Jer. 15:16) Ɔsɛdingwelo wa dibuku di’oyoyo nɛ wayotokimanyiya dia sho nkotsha olimu aso w’esambishelo l’ɛnyɛlɔ ka Jeremiya.