Toho totanu dia nkondja ombeki wa Bible
1. Naka ekɔ wolo nkondja ombeki wa Bible l’ɛtshi kanyu ka nkɛtɛ, ahombaso nsala ndo lande na?
1 Onde wɛ ekɔ l’okakanu dia nkondja ombeki ɔmɔtshi wa Bible? Naka eelo, kete tetemala nyanga. Jehowa tshɔkɔlaka wanɛ wahahekɔ dia nsala lolango lande. (Ngal. 6:9) Toho totanu tele lanɛ l’ɛse tayotokimanyiya.
2. Ngande wakokaso nɔmbaka anto mbala kakɔ ɔtɔi dia mbeka la wɔ Bible?
2 Tɔlɔmbɛ onto mbala kakɔ ɔtɔi dia mbeka la nde Bible: Anto efula mbeyaka dia sho mbashaka Tshoto y’Etangelo la Réveillez-vous !, koko haweye dia sho nɔmbaka anto dia mbeka la wɔ Bible. Etena katatasambisha lo luudu la luudu, lande na kahatalɔmbɛ anto mbala kakɔ ɔtɔi dia mbeka la wɔ Bible? Sho kokaka mimbola anto watototshɔka tembola dia kana vɔ nangaka mbeka Bible. Naka vɔ wambotona, kete sho kokaka ntetemala mbatshikɛka ekanda aso ndo nomialomiaka nsaki kawɔ. Ɔnangɛso ɔmɔtshi akatshikɛka wadi l’omi amɔtshi periodikɛ l’edja k’ɛnɔnyi. L’ɔkɔngɔ wa nde mbasha periodikɛ yeke katomba, nde akakadimɔ dia ntshɔ, koko kanyi mɔtshi yakoyɛ ya nde mimbola atshukanyi asɔ ɔnɛ: “Onde nyayolanga mbeka Bible?” Aha la nde nongamɛ, vɔ wakokadimola ɔnɛ eelo. Ɛlɔ kɛnɛ, vɔ wambobatizama.
3. Onde sho pombaka mfɔnya di’anto tshɛ waya lo nsanganya wekɔ lo mbeka Bible la onto ɔmɔtshi? Lembetshiya.
3 Wanɛ waya lo nsanganya: Tatɔfɔnyake dia wanɛ tshɛ waya lo nsanganya wamboshilaka la ntatɛ mbeka Bible. Ɔnangɛso ɔmɔtshi mbutaka ɔnɛ: “Ndekana kahende ɔtɔi k’anto weka la mi Bible, lakatatɛ nsawola la wɔ lo nsanganya.” Kadiyɛso kɛmɔtshi akɔshi yɛdikɔ ya nsawola la womoto ɔmɔtshi laki ɔsɔnyisɔnyi laki l’ana wa wamato ahende wambobatizama. Laasɔ ko aya ɛnɔnyi oko 15 wayande lo nsanganya. Nde akakomaka kanɛ watatɛ nsanganya ndo akatshɔka kanɛ washila nsanganya. Womoto ɔsɔ aketawɔ dia mbeka Bible ndo akayobatizamaka. Kadiyɛso akafunde ate: “Lekɔ lo nyanga woho wakamakonge ɛnɔnyi 15 w’etondo dia ndjowombola dia kana nde nangaka mbeka Bible!”
4. Ngande wakokaso nkondja ombeki wa Bible lo mimbola anto akina?
4 Lo mimbola anto akina: Kadiyɛso kɛmɔtshi salaka la wolo dia ntshindɛ apandjudi akina le ambeki awɔ wa Bible. La lotshungɔ l’opandjudi weka l’onto, l’ekomelo nde mimbolaka ombeki akɔ dia kana nde mbeyaka anto akina wakoka ngɛnangɛna mbeka Bible. Etena kashayɛ onto lotshweyɛ tembola dibuku Bible etshatɔ, wɛ koka mombola ɔnɛ: “Onde wɛ mbeyaka onto ɔmɔtshi lakoka ngɛnangɛna nkondja dibuku nɛ?” Tena dimɔtshi, apandjudi kana ambatshi mboka amɔtshi mongaka ko bu l’etena ka mbeka l’anto amɔtshi wakahomana la wɔ l’ɛtshi kawɔ ka nkɛtɛ. Laasɔ, paka sho mbutɛka apandjudi akina dia tekɔ l’ohomba w’ombeki wa Bible.
5. Ngande wakokaso mimbola elonganyi wele bu ambetawodi wotshukanyi l’apandjudi wa l’etshumanelo dia kana vɔ nangaka mbeka Bible?
5 Elonganyi wele bu ambetawudi: Onde ekɔ apandjudi amɔtshi wa l’etshumanelo kanyu wotshukanyi l’anto wele kema ambetawudi? Anto amɔtshi wele bu ambetawudi mbokaka wolo nsawola awui wa lo Bible kaamɛ l’elonganyi awɔ wele Akristo, koko vɔ kokaka mbetawɔ mbeka Bible l’onto ɔmɔtshi lele bu ose nkumbo kawɔ. Mbala efula ndeka dimɛna nsawola l’olonganyi wele Okristo dia nde totɛ nganɛ wakokaso nɔmba olonganyi ande dia mbeka la nde Bible la ntondo ka sho ndjɔlɔmba onto dia mbeka la nde Bible.
6. Ngande watokimanyiya dɔmbɛlɔ etena kasalaso la wolo dia nkondja ombeki wa Bible?
6 Dɔmbɛlɔ: Tatɔnyɔlake wolo wele la dɔmbɛlɔ. (Jak. 5:16) Jehowa ndakaka dia mpokamɛ kɛnɛ kɔlɔmbaso naka tɔ mbɔtɔnɛka la lolango lande. (1 Jni. 5:14) Ɔnangɛso ɔmɔtshi laki l’awui efula wa nsala akatatɛ nɔmbaka Jehowa dia nde nkondja ombeki wa Bible. Wadɛnde akayambola dia kana omɛnde ayokondja etena kandjasha le ombeki ande, djekoleko naka ombeki akɔ ekɔ l’ekakatanu efula. Ɔnkɔnɛ, nde akadje akambo asɔ lo dɔmbɛlɔ, etena kakandalɔmbaka Jehowa dia nkimanyiya omɛnde dia nkondja ombeki wa Bible. Mingu oko hiende l’ɔkɔngɔ, alɔmbɛlɔ awɔ wakakadimɔma etena kakatane ombatshi mboka ɔmɔtshi pami kɛmɔtshi kakalangaka mbeka Bible ndo kakandasha ɔnangɛso laki l’ohomba w’ombeki pami kɛsɔ dia ntatɛ mbeka lande Bible. Wadɛnde akafunde ate: “Lambotɛ apandjudi tshɛ wafɔnya dia nɔmbɔla wekelo wa Bible ayonga wolo le wɔ nte: Nyonge shikaa lo alɔmbɛlɔ anyu ndo tanyohekɔke dia nɔmba lo dikambo sɔ. Takakondja ɔngɛnɔngɛnɔ wahateye mbuta.” Naka nyu monga l’etete, kete nyu lawɔ kokaka nkondja ombeki ɔmɔtshi wa Bible ndo monga l’ɔngɛnɔngɛnɔ waya lo nkimanyiya onto dia nde ntana “mboka k’otsha lo lɔsɛnɔ.”—Mat. 7:13, 14.