Woho wa nkondja wahɔ oma l’olui aso w’esambishelo
1. Ɛlɔlɔ akɔna wakatakondjaka lo Wekelo wa dibuku wa l’etshumanelo wakondjaso nshi nyɛ ndo l’elui aso w’esambishelo?
1 Onde ekɔ awui amɔtshi wakatɛnaka lo Wekelo wa dibuku wa l’etshumanelo wele hatoyowaɛna nshi nyɛ? Elui ɛsɔ waki totshitshɛ ndo onto tshɛ akayaokaka dimɛna. Kɛsɔ akatokimanyiyaka dia mbekesanɛ l’anto efula ndo dia monga nge lo mbetawɔ. (Tok. 18:24) Omendji wa wekelo wa dibuku akeyaka awui wele la so ndo akakokaka tokeketsha l’onto ndo l’onto. (Tok. 27:23; 1 Pet. 5:2, 3) Ɛlɔlɔ ɛsɔ takakoke mbakondja ndo l’elui aso w’esambishelo.
2. Ngande wakokaso mbɔsa yɛdikɔ dia mbɔtɔ l’as’olui aso w’esambishelo lɔngɛnyi latokeketsha lo nyuma?
2 Tɔshi yɛdikɔ: Elui w’esambishelo wekɔ totshitshɛ oko waki elui wa wekelo wa dibuku. Lo nsambisha “dihɛka lo dihɛka” kaamɛ l’anto akina, lɔngɛnyi la wolo mongaka lam’asaso la wɔ. (Flpɛ. 1:27) Anto angana wa l’olui wanyu wambosambishaka la yɛ? Onde wɛ kokaka nsambisha ndo la “anto akina”? (2 Kɔr. 6:13) Ndo nto, sho kokaka mbelɛ tena la tena onto ɔmɔtshi la l’olui aso oya l’Ɔtɛmwɛlɔ aso wa lo nkumbo wa la dikɔlɔ kana dia ndjosanga la nde lonya lo lokenga. Lo tshumanelo dimɔtshi, elui w’esambishelo mengɔnyanaka l’olongwelo w’ɔtɛkɛtshi w’ɔngɛndangɛnda. Lo lomingu layowolongola ɔtɛkɛtshi ɔsɔ, as’olui tshumanaka dia ndɛ yangɔ kaamɛ, oyadi ɔtɛkɛtshi ayotshikala dia ndɛ la wɔ yangɔ yakɔ kana bu.
3. Naa waaso amɔtshi wakokaso membwama l’olui aso w’esambishelo?
3 Kaanga mbele nshi nyɛ etshumanelo sanganaka paka mbala hiende lo lomingu, kɛsɔ hɛnya di’apandjudi pombaka membwama tena dimɔtshi to. Emendji w’elui wakasɔnama l’olui tshɛ dia nkeketsha as’olui ande ndo mbalowanya l’esambishelo. Naka omendji w’olui ayɛ w’esambishelo atɔsaka yɛdikɔ ya nsambisha la yɛ, kete lɔmbande dia nyu nsambisha. Ndo nto, omendji w’olimu sambishaka kaamɛ l’olui ɔmɔtshi wikɛndɛ tshɛ. Lo tshumanelo dia totshitshɛ lɛnɛ ele paka elui w’esambishelo engana, nde kokaka nɔngɔsɔla dia membola olui tshɛ mbala hiende l’ɔnɔnyi. Onde wɛ mbɔsaka yɛdikɔ ya nsambisha la nde etena kembolande olui anyu?
4. a) Ngande wasalema nsanganya y’otsha l’esambishelo? b) Lande na kahombaso nkana yimba dia nkimɔ luudu laso dikambo dia nsanganya y’otsha l’esambishelo?
4 Mbala efula ekɔ dimɛna di’olui w’esambishelo tshɛ sanganaka dihole diawɔ lo wikɛndɛ. Monga l’ahole efula wasalema nsanganya y’otsha l’esambishelo suke la lo wonya akɔ ɔtɔi kimanyiyaka apandjudi dia nkoma esadi l’ahole akɔ ndo l’ɛtshi kawɔ ka nkɛtɛ. Apandjudi koka kahanyema esadi ndo ntshɔ otsha l’ɛtshi kawɔ ka nkɛtɛ aha la ntshimbatshimba. Hatonga nto wolo le omendji w’olui dia ndjasha le anto wa l’olui ande. Koko awui amɔtshi koka nsala di’elui ehende kana ndekana salaka nsanganya y’otsha l’esambishelo dihole ɔtɔi. Naka etshumanelo k’otondo kambosangana kaamɛ dia ntshɔ l’esambishelo Lushi la samalo la ntondo la lo ngɔndɔ kana l’ɔkɔngɔ wa Wekelo wa Tshoto y’Etangelo, kete ayonga dimɛna di’olui la olui mbidjasɛ kaamɛ ndo mbisha omendji w’olui tshɛ minitɛ ngana dia nde nkahanya anto wa l’olui ande la ntondo ka dɔmbɛlɔ dia ndjihelo.—Enda kiombo yele l’ɔtɛ a dui ɔnɛ: “Onde wɛ koka nkimɔ luudu layɛ?”
5. Kaanga mbambokomɛka yɛdikɔ yendana la Wekelo wa dibuku wa l’etshumanelo, eshikikelo kakɔna kakoka monga la so?
5 Kaanga mbaya bu yɛdikɔ yendana la Wekelo wa dibuku wa l’etshumanelo, Jehowa tetemalaka tosha kɛnɛ keso l’ohomba dia nsala lolango lande. (Hɛb. 13:20, 21) L’ekimanyielo ka Jehowa, hatohombe ndoko ɛngɔ. (Osa. 23:1) Sho kondjaka ɛlɔlɔ efula oma lo tshimbo y’olui aso w’esambishelo. Naka sho mbɔsa yɛdikɔ ndo naka sho ‘monɛ efula,’ kete ‘tayona efula.’—2 Kɔr. 9:6.
[Kiombo ya lo lɛkɛ 6]
Onde wɛ koka nkimɔ luudu layɛ?
Tshumanelo dimɔtshi sanganyaka elui w’esambishelo lo wikɛndɛ nɛ dia diɔ bu la mvudu ya nsala nsanganya shɔ. Nsanganya y’otsha l’esambishelo yekɔ etenyi kɛmɔtshi ka nsanganya ya l’etshumanelo, laasɔ naka yɔ salema lakaso kete ayonga diɛsɛ dia laande. Onde wɛ koka mbetawɔ nkimɔ luudu layɛ dikambo dia nsanganya shɔ? Tengengake l’ɔtɛ w’ɔnɛ luudu layɛ tshitshɛ. Dikumanyi wayenda dihole diele luudu layɛ ndo awui akina wafɔna la wakawasɛdingolaka lo dikambo di’ahole wakahombaka salema wekelo wa dibuku. Naka wɛ nangaka nkimɔ luudu layɛ, kete ewoya omendji anyu w’olui w’esambishelo.