Tokoya ɛnyɛlɔ k’amvutshi—Jɔɛlɛ
1. Ngande wakokaso mbokoya ɛnyɛlɔ k’okitshakitsha k’omvutshi Jɔɛlɛ etena kasambishaso?
1 Omvutshi Jɔɛlɛ akinde? Nde akɛnya tsho dia nde aki “on’a Petuele.” (Joe. 1:1) Omvutshi waki l’okitshakitsha ɔsɔ akasambisha akambo wendana la Jehowa, koko aha wande. Woho akɔ waamɛ mbele, lo dihole dia sho nyanga lotombo laso kana nyanga dia mbeyama, sho kotolaka yambalo y’anto otsha le Jehowa ndo lo Bible etena katatasambisha. (1 Kɔr. 9:16; 2 Kɔr. 3:5) Laadiko dia laasɔ, sho kondjaka ekeketshelo lo losango latatɛmbɛ. Awui akɔna wendana la prɔfɛsiya kakewoya omvutshi Jɔɛlɛ wakoka tosha ohetoheto ndo elongamelo ɛlɔ kɛnɛ?
2. Woho wamboleka ekomelo k’andja ɔnɛ nsukana pombaka totshutshuya dia sho nsala na?
2 “Lushi la [Jehowa] laya suki.” (Joe. 1:15): Kaanga mbakafundama ɛtɛkɛta ɛsɔ ambeta ɛnɔnyi nunu, tekɔ lo nsɛnɔ l’etena kakotshamawɔ. Woho wataleke akambo wa l’andja ɔnɛ ndana, wendjudi wele l’anto ndo woho watɔnyɔlawɔ l’ɛtshi kaso ka nkɛtɛ mɛnyaka dia tekɔ lo nsɛna lo nshi y’ekomelo ka dikongɛ nɛ di’akambo wa kɔlɔ. (2 Tim. 3:1-5; 2 Pet. 3:3, 4) Oko wɛnaso woho wamboleka ekomelo k’andja ɔnɛ sukana, tekɔ l’ɔkɔkɔ w’oshika wa mbetsha olimu w’esambishelo lo dihole dia ntondo lo nsɛnɔ yaso.—2 Pet. 3:11, 12.
3. Lande na kele olimu w’esambishelo ekɔ ohomba oko wambosukana mfɔnu ka woke?
3 “[Jehowa] eli eshamelu ka wudja andi.” (Joe. 3:16): Sotshasotshama yatɛkɛtama lo divɛsa nɛ mendanaka paka la elombwelo kaki Jehowa kayosalema lo mfɔnu ka woke. Sho keketshamaka etena keyaso ɔnɛ Jehowa ayoshimbɛ ekambi ande wa kɔlamelo l’etena kɛsɔ. (Ɛny. 7:9, 14) Etena kayashaso l’olimu w’esambishelo, sho mɛnaka woho watosukɛ Jehowa, watokeketshande, ndo dui sɔ keketshaka mbetawɔ ndo elongamelo kaso k’ɔnɛ Jehowa ayotokimanyiya etena kayoya mfɔnu ka woke.
4. Lande na kakokaso nkongɛ nshi yayaye l’ɔngɛnɔngɛnɔ ndo l’eshikikelo tshɛ?
4 Kaanga mbele Jɔɛlɛ akashisha elongamelo etena kakandasambishaka, losango lande mbishaka ekambi waki Nzambi elongamelo k’ɔnɛ vɔ wayoshimbamɛ. (Joe. 2:32) Ɔnkɔnɛ, nyɛsɔ totetemale nkongɛ nshi yayaye l’eshikikelo ndo totetemale nsambisha lokumu l’ɔlɔlɔ la Diolelo diaki Nzambi l’ohetoheto tshɛ, etena kohɔso ɛtɛkɛta wa lo Joele 2:23 wata ɔnɛ: “Nyongenengene utamanya le [Jehowa Nzambi k]anyu.”