Nyokambe la sitɛ kaso k’Ɛtɛrnɛtɛ dia mbetsha ananyu
1. Naa oyango wele l’etenyi ka sitɛ kaso k’Ɛtɛrnɛtɛ kele l’ɔtɛ a dui ɔnɛ “Enfants”?
1 Sitɛ kaso k’Ɛtɛrnɛtɛ, jw.org kekɔ l’oyango wa nkimanyiya anto wa lo nɔnga tshɛ. Etenyi kɛmɔtshi ka lo sitɛ kakɔ kekɔ l’ɔtɛ a dui ɔnɛ “Enfants” (ɔtɔ lam’ofundjiwɔ ɔnɛ La Bible et vous, oma laasɔ Enfants) ndo tɔ kimanyiyaka ana la ambutshi awɔ dia monga kaamɛ ndo ndjasukanya la Jehowa. (Euh. 6:6, 7) Ngande wakokanyu nkamba l’etenyi kɛsɔ dia mbetsha ananyu?
2. Ngande wakokanyu nsɔna awui wɔtɔnɛ la ɛnɔnyi wele l’ananyu dia mbaetsha?
2 Nyɔtɔnganyiya awui akɔ l’ehomba awɔ: Ɔna la ɔna ekɔ l’ehomba ande. (1 Kɔr. 13:11) Ngande wakokanyu nsɔna awui wɔtɔnɛ l’ɛnɔnyi wele l’ananyu dia mbaetsha? Nyoyambole ɔnɛ: ‘Awui akɔna wayɔngɛnyangɛnya anami? Awui angana wakokawɔ nkimɛ? Edja ka ngande kewɔ l’akoka wa ndjela wetshelo?’ Lo dikambo di’ana wele l’ɛnɔnyi esato kana ndekana, nyu koka nkɛtshanya la wɔ awui wele l’ɛkɔndɔ watanema lam’ofundjiwɔ ɔnɛ “Comptines bibliques.” Nkumbo kina ngɛnangɛnaka awui wele l’etenyi kata ɔnɛ “Enseignez vos enfants.” Nyu koka nto nsɛdingola awui akina wayelana.
3. Ngande wakoka ambutshi nkamba dimɛna la ɛkɔndɔ ndo awui wele l’etenyi kele l’ɔtɛ a dui ɔnɛ ““Pour le culte familial”?
3 Pour le culte familial: Ɔsɔ ekɔ etenyi kele l’awui wakoka nkimanyiya ɛtɛ wa nkumbo dia mbetsha anawɔ. Dia mbeya woho wa nkamba la ɛkɔndɔ ndo awui wele l’etenyi kɛnɛ l’ɔtɛmwɛlɔ anyu wa lo nkumbo, klikɛ butɔ kofundami ɔnɛ telesharjɛ kele l’ɛse ka lam’ofundjiwɔ ɔnɛ “Guide des parents.” Kamba la etenyi kofundami ɔnɛ “Une image, une activité” kele la kidiyɔ yele la kulɛrɛ yotshikitanyi dia mbetsha anayɛ wa tomangase. Kimanyiya anayɛ waya epalanga dia nshidiya etenyi kofundami ɔnɛ “Apprends en t’amusant.” Akambo tshɛ wa l’ɔtɛmwɛlɔ wa lo nkumbo wele lo sitɛ kɛnɛ wekɔ l’ɛkɔndɔ wa lo Bible kana wekelo wele l’oyango akɔ waamɛ, diakɔ diele vɔ koka mendana l’ana tshɛ oyadi ɛnɔnyi akɔna wele la wɔ.
4. Akambo akɔna wakokaso ntana l’etenyi kofundami ɔnɛ “Deviens l’ami de Jéhovah”?
4 Deviens l’ami de Jéhovah: Naka wɛ mbɔtɔ l’etenyi kɛsɔ, wɛ ayotana vidɛo, esambo ndo awui akina wakoka nkimanyi ambutshi dia vɔ mbetsha anawɔ w’akɛnda Ɔtɛkɛta wa Nzambi. (Euh. 31:12) Vidɛo tshɛ ya tomondo y’amɛna yele lɔkɔ mbishaka wetshelo w’ohomba. Akambo walɔmba onto dia nyanga ko ntana tɔtɔmiyaka ohomba wele la wekelo ɛsɔ. Lam’ele ana w’akɛnda nangaka memba ndo oko wele esambo kimanyiyaka ana w’akɛnda dia mbohɔ kɛnɛ kakaweki, esambo wa leemba ndo wakafundama djekoleko lo dikambo di’ana wekɔ lo mbidjama mbala la mbala lo sitɛ kɛsɔ.
5. Lande na kahomba ambutshi nɔmbaka Jehowa dia nde mbakimanyiya dia mbetsha anawɔ akambo wa mɛtɛ?
5 Ambutshi le, Jehowa kombolaka dia nyu monga ambutshi w’apami ndo wa wamato weya mbodia ana. Diakɔ diele, nyowɔlɔmbake dia nde nyokimanyiya dia nyu mbetsha ananyu akambo wa mɛtɛ. (Emb. 13:8) L’ekimanyielo ka Jehowa, nyu koka ndowanya ananyu dia vɔ monga la “lomba layo[wa]kimanyiya dia nkondja panda lo tshimbo ya mbetawɔ kendana la Kristo Yeso.”—2 Tim. 3:15; Tuk. 4:1-4.