Mbishaka anto periodikɛ mbala la mbala—Tokimanyiaka dia ndjotatɛ mbeka la wɔ Bible
1. Lande na kakeketsha okongamelo wa Jehowa apandjudi dia mbishaka anto periodikɛ mbala la mbala?
1 Anto efula hawetawɔ mbeka Bible la so, koko vɔ ngɛnangɛnaka mbadia periodikɛ yaso. Diakɔ diele, aya edja kele okongamelo wa Jehowa nkeketshaka apandjudi dia mbishaka anto periodikɛ mbala la mbala. Etena kadia anto periodikɛ yaso mbala la mbala, dui sɔ nomialomiaka nsaki kawɔ mbala efula oya l’Ɔtɛkɛta wa Nzambi. (1 Pet. 2:2) Ndo awui amɔtshi wadiawɔ ndjangɛnyangɛnyaka ndo ndjakonyaka dia mbetawɔ wekelo wa Bible.
2. Ngande wakokaso nomialomia nsaki k’anto washaso periodikɛ mbala la mbala?
2 ‘Tote ashi’ lo ntɔngɔ y’akambo wa mɛtɛ: Lo dihole dia mbisha onto periodikɛ tsho ko mbotshika, ekɔ ohomba nkɛtshanya la nde ndo mpemba dia mbɔtɔnganɛ la nde. Dui sɔ diayokokimanyiya dia mbeya akambo wele la nde, nsaki kande ndo dietawɔ diande ndo kɛsɔ ayokokimanyiya dia nsawola la nde la shɛnɔdi. (Tuk. 16:23) Ekɔ ohomba ndjalɔngɔsɔlaka mbala tshɛ la ntondo ka tembola onto. Naka kokaka, lembetshiya lo tshena pe dui dimɔtshi ndo adia divɛsa dimɔtshi di’oma lo periodikɛ kakɔ. Lo nsala ngasɔ, wɛ ayotɛ ashi lo ntɔngɔ y’akambo wa mɛtɛ yele l’otema ande. (1 Kɔr. 3:6) Fuda datɛ diakanyokana di’oseka wembwelo tshɛ, okanda wakayotshikɛ, sawo ndo divɛsa diakanyakɛtshanya.
3. Mbala ngana yahombaso membola anto washaso periodikɛ mbala la mbala?
3 Mbala ngana yahombayɛ membola onto? Wɛ pombaka membola mbala ɔtɔi lo ngɔndɔ onto latoyoshaka periodikɛ mbala la mbala dia towosha nyɛ yeke katomba. Koko, wɛ koka membola onto mbala efula lo ndjela awui ndo nsaki kele la nde. Ɛnyɛlɔ, lomingu ɔtɔi kana hiende l’ɔkɔngɔ wa mbotshikɛ periodikɛ, wɛ koka nkalola dia towotɛ ɔnɛ: “Lakaye dia ndjokɛnya lo tshena pe dui dimɔtshi diele lo periodikɛ kakamakotshikɛ.” Kɛsɔ, ayowotshutshuya dia nde mbadia asawo akina. Naka nde akashile kiada, kete wɛ koka mombola kɛnɛ kakandoke lɔkɔ ndo nkɛtshanya la nde lo tshena pe. Naka onto akɔ ngɛnangɛnaka mbadia ekanda aso, kete wɛ koka nkalola dia towosha traktɛ, biukubuku, kana dibuku diashaso anto ngɔndɔ kakɔ.
4. Akokaso salaka mbala la mbala dia nshikikɛ kana wanɛ watotoshaka periodikɛ mbala la mbala koka mbetawɔ dia mbeka Bible?
4 Tokongake dia paka ompokami ambokɔlɔmba dia mbeka la nde Bible. Lɔmbande dia nsala dui sɔ. Oyadi nde okotonaka mbeka Bible, wɛ koka mbɔtɔlɛka mbala la mbala Tshoto y’Etangelo yele la sawo diata ɔnɛ: “Ekadimwelo lo ambola w’oma lo Bible” ndo menda kana nde ayetawɔ dia wɛ nkɛtshanya la nde. Ondo nde mbeyaka ndjetawɔ mbeka Bible lo tshena pe. Koko, naka nde atonge suke dia mbeka Bible, wɛ koka ntetemala mbɔtɔlɛ periodikɛ dia nomialomia nsaki kande.