Woho wa tatɛ mbeka Bible l’anto watotoshaka periodikɛ
1. Naa oyango aso etena kashaso anto periodikɛ?
1 Nshi ya samalo sho toshaka anto Tshoto y’Etangelo la Réveillez-vous ! lo olimu w’esambishelo. Koko, ɔsɔ ekɔ paka nna dia ntondo dia kotsha oyango aso wa mbetshaka akanga w’etema ɛlɔlɔ akambo wa mɛtɛ. Lânɛ l’ɛse tekɔ la mbɔtwɛlɔ mɔtshi ya woho wa mbisha anto dibuku Bible etshatɔ lo wendelo w’oyoyo ndo tatɛ mbeka Bible la wɔ. Wɛ mbeyaka tshikitanya mbɔtwɛlɔ shɔ dia ndjiɔtɔnganyiya la ɛtshi kanyu ka nkɛtɛ ndo ta awui akɔ lo ɛtɛkɛta ayɛ hita. Tengengake dia kamba la mbɔtwɛlɔ kekina naka wɛ ambɛna dia tɔ kayonga la etombelo w’ɔlɔlɔ le yɛ.
2. Ngande wakokaso kamba la ndjɛkɛ ya mbɔtwɛlɔ ka dibuku Bible etshatɔ dia tatɛ mbeka l’onto Bible?
2 Tokambe la ndjɛkɛ ya mbɔtwɛlɔ: Etena kakalolayɛ tenda onto, wɛ kokaka mbotɛ wate: “Periodikɛ yakamakotshikɛ kotolaka yambalo otsha lo Bible. Tende lande na kele wadielo wa Bible ekɔ ohomba efula.” Adia Isaya 48:17, 18; Joani 17:3; kana divɛsa dikina diakoka. Oma lâsɔ, l’ɔkɔngɔ wa wɛ mbɔtshiya dibuku Bible etshatɔ ndo wa mbisha ompokami kɔpi kɛmɔtshi, wɛ kokaka tetemala mbuta ɔnkɔnɛ:
◼ “Bible toshaka elongamelo ka shikaa kendana la nshi yayaye.” Ɛnya ompokami lɛkɛ 4-5, ndo mbolande wate: “L’atei w’alaka anɛ, daka diakɔna diakombolayɛ mɛna ekotshamelo kadiɔ?” Kotola yambalo yande lo tshapita yatɛkɛta dia daka dia lo Afundelo diakandasɔnyi ndo lo tshena pe sɛdingola la nde odingɔ ɔtɔi kana ehende naka nde ambetawɔ.
◼ Kana wɛ kokaka mbuta ɔnɛ: “Bible kadimolaka lo ambola woleki ohomba wa lo lɔsɛnɔ.” Kotola yambalo yande lo lɛkɛ 6, ndo mbolande naka nde atayambolaka dimbola dimɔtshi l’atei wa wanɛ wele l’ɛse ka dikatshi. Fola lo tshapita yakadimola lo dimbola diakandasɔnyi ndo nyɔkɛtshanya odingɔ ɔtɔi kana ehende.
◼ Kana wɛ koka mbɛnya ɛtɛ w’awui wele lo tablo k’ɛtɛ w’awui ndo mombola ɔtɛ a dui wɔngɛnyangɛnya. Fola lo tshapita yatɛkɛta dikambo diakandasɔnyi ndo lo tshena pe ɛnyande woho wekaso l’anto Bible.
3. Ngande wakokaso tatɛ mbeka l’onto Bible l’ɔkɔngɔ wa sho mbosha periodikɛ katɛkɛta dikambo dia a) woho wataleke awui wa lo andja ɔnɛ ntshɔ otsha lo kɔlɔ? b) nkumbo? c) mɛtɛ ka Bible?
3 Tshika onto la dimbola dimɔtshi lo wendelo wa ntondo: Yoho kina ele, tshika onto la dimbola dimɔtshi diayoyokadimola lo wendelo w’oyoyo. L’ɔkɔngɔ w’ompokami mbetawɔ periodikɛ, oka dimbola dimɔtshi ndo tɛnde dia wɛ ayoya mbala kekina dia ndjokadimola lo dimbola diakɔ. Sala la wolo dia wɛ tokanyi la nde dia wɛ kalola ndjowenda ndo sala tshɛ dia kotsha daka diayɛ. (Mat. 5:37) Etena kakalolayɛ, ohola ompokami dimbola diakɔ ndo oma lâsɔ adia ndo kɛtshanya la nde lo tshena pe okadimwelo w’oma lo dibuku Bible etshatɔ. Shande kɔpi kɛmɔtshi dia mbokimanyiya dia nde takoyelaka. Bɛnyɛlɔ dimɔtshi dingana diɔ nɛ:
◼ Naka periodikɛ kakayasha onto tɛkɛtaka woho wataleke awui wa lo andja ɔnɛ ntshɔ otsha lo kɔlɔ, kete wɛ kokaka mbuta wate: “Mbala kayaye tayɛna okadimwelo washa Bible lo dimbola nɛ: Etshikitanu akɔna wayela Nzambi la nkɛtɛ?” Kamba la lɛkɛ 4-5 etena kayoyokalola. Kana wɛ kokaka mboka dimbola nɛ: “Onde Nzambi mbalanga dia mpokoso tomba?” Lo wendelo wayaye, ɛnya ompokami odingɔ 7-8 wa tshapita 1.
◼ Naka periodikɛ kakayasha onto tɛkɛtaka dikambo dia nkumbo, kete la ntondo ka wɛ mbotshika wɛ mbeyaka mboka dimbola nɛ: “Kakɔna kakoka ose nkumbo tshɛ sala dia lɔsɛnɔ la nkumbo monga l’ɔngɛnɔngɛnɔ efula?” Etena kayoyokalola, sɛdingola la nde tshapita 14 odingɔ 4.
◼ Naka periodikɛ kakayasha onto tɛkɛtaka dikambo dia mɛtɛ ka Bible, kete wɛ kokaka mboka dimbola nɛ dia nyu ndjɔkɛtshanya mbala kayaye: “Onde Bible mbutaka mɛtɛ lo dikambo dia siansɛ?” Lo wendelo w’oyoyo, sɛdingola la nde odingɔ 8 wa tshapita 2.
4. Ahombaso sala naka ompokami ambotona nongola dibuku Bible etshatɔ?
4 L’ekomelo k’ɔkɛtshanyelo tshɛ, okaka dimbola dikina diayoyokadimolaka lo wendelo okina. Naka ekongelo ka wekelo kamboshikikɛma, ko nyu ndjɔsɛdingola dibuku oma k’etatelo polo l’ekomelo. Ko kayotota naka ompokami hetawe nongola dibuku Bible etshatɔ? Wɛ kokaka tetemala mbosha periodikɛ ndo tetemala kɛtshanya Afundelo kâmɛ la nde. Lo edjedja ka wonya, nde mbeyaka ndjetawɔ mbeka Bible naka wɛ tetemala nomialomiaka nsaki kande.
5. Lande na kahatahombe komɛ lo tshikɛ tsho anto periodikɛ?
5 Tshoto y’Etangelo ndo Réveillez-vous ! mbeyaka keketsha onto dia nde mbeka kɛnɛ ketsha Bible mɛtɛ. Omalɔkɔ, tosale la wolo dia tatɛ mbeka Bible l’anto wetawɔ periodikɛ. Lo yoho shɔ mbayotokitanyiya didjango diaki Yeso diata dia ‘mbetɛ anto ambeki ndo mbaetsha.’—Mat. 28:19, 20.