Tolowanya akoka aso wa nsambisha—Lo mbekola wekamu
Ohomba wa dikoka sɔ: Ohɔsa dia wɛ ambeya dia mpokoso kɛmɔtshi k’oma lo diangɔ diakatongama kaanga salema. Anto wayovɔ naka vɔ hawolawe dia ndjakokɛ. Wɛ ambotshɔ le osukanyi ayɛ dia tɔɔhɛmɔla, koko nde ambokohembola ɔtɛkɛta mbala kakɔ ɔtɔi ate lekɔ la wesanu. Lo mɛtɛ, wɛ honyɛ demba esadi eto nɛ dia wɛ ekɔ lo nsala la wolo dia mbokimanyiya. Anto efula wa l’ɛtshi kaso ka nkɛtɛ hawolange tohokamɛ, nɛ dia vɔ haweye ohomba wele la losango laso lashimbɛ nsɛnɔ y’anto. Etena katshɔso dia towaembola, anto efula mbutaka ɔnɛ leeke l’elimu. (Mat. 24:37-39) Kana mbeyaka monga ko vɔ wakoke awui wa kashi lo dikambo diaso. (Mat. 11:18, 19) Vɔ mbeyaka mfɔnya ɔnɛ sho hatotshikitanyi l’ase ɛtɛmwɛlɔ ekina wele la waonga wa kɔlɔ. (2 Pet. 2:1, 2) Naka ompokami aso hɛnyisha nsaki oma l’etatelo, kete tatongake esadi dia nkɔmɔ.
Woho wa sala dui sɔ:
• La ntondo ka wɛ ntshɔ l’esambishelo ka lo luudu la luudu, tɔshi etena ka nkana yimba lo wekamu wakoka tohomana la yɛ ndo tayangi woho wakokayɛ towaekola.
• Naka ompokami ayɛ ambodja wekamu, kete la loshilambo tshɛ hemba ntetemala la sawo. Ondo wɛ koka nsala dui sɔ lo mbandola. Ɛnyɛlɔ, naka nde ambota dia nde ekɔ la ɔtɛmwɛlɔ ande, wɛ koka mbuta ɔnɛ: “Lakalongamɛki dia ntana onto layasha l’akambo wa lo nyuma oko wɛ.” Lo tena dimɔtshi mbeya tokanyi kana ekakatanu wele l’ompokami ayɛ koka kokimanyiya dia wɛ ntetemala mbosambisha. Ɛnyɛlɔ, naka nde ambota dia nde ekɔ la wesanu, wɛ koka mbotɛ ɔnɛ: “Kawɔ lamboka. Koko la ntondo ka sho nkakitɔna, lakalangi kosha yangɔ nyɛ.” Yoho kina ele mumbola ompokami ayɛ dia kana nde hangɛnangɛna losango laso. Wɛ koka mbuta ɔnɛ: “Onde wɛ ekɔ lo nanga mbuta dia wɛ hetawɔ Bible ko kana awui tshɛ wendana l’ɔtɛmwɛlɔ mbahayalange?”
• Onga l’ekanelo k’ɔlɔlɔ. Ohɔ dia Jehowa hatshutshuya anto dia mbohokamɛ. (Euh. 30:19) Onto tshɛ ayɛmba wotsho ande ndamɛ la ntondo ka Jehowa. (Ngal. 6:5) Naka ompokami aso ambotona la wolo tshɛ dia mpokamɛ, kete ndeka dimɛna sho minya demba. Naka sho nɛmiya tokanyi tande, kete kɛsɔ ayosha apandjudi akina diaaso dia vɔ ndjowosambisha lushi lokina.—1 Pet. 3:15.
Hemba nsala nganɛ lo ngɔndɔ kɛnɛ:
• Naka wɛ ambohomana la wekamu, kete l’ɔkɔngɔ wa wɛ mimɔ oma lale ompokami, ko wɛ nkɛtshanya l’opandjudi watasambisha la yɛ woho wakokayɛ ndjowekola lo yoho ya dimɛna.