Onde wɛ ayokamba la diaaso sɔ?
Eohwelo kayaye toshaka diaaso dia nkɛnɛmɔla lowando
1. Naa diaaso dia laande diayotokondja lo nshi ya Eohwelo?
1 Eohwelo kayosalema lo Ngɔndɔ ka nɛi 14 kayotosha diaaso dia laande dia monga ndo nkɛnɛmɔla lowando laso l’ɔlɔlɔ wa Jehowa. Ɔkɔndɔ wele lo Luka 17:11-18 mɛnyaka kanyi ya Jehowa nde la Yeso lo dikambo dia lowando. Lonyangu ko lo akanga wa sudi dikumi, paka kanga sudi ɔtɔi mbakakalola dia ndjosha losaka. Lo nshi yayaye, diɛsɛ la woshasha w’oshinga w’etshungwelo, hemɔ tshɛ yele l’anto yayɔkɔnɔ ndo tayokondja lɔsɛnɔ la pondjo. Aha la taamu, oma laasɔ tayokaloyaka Jehowa losaka lushi la lushi l’ɔtɛ w’ɛtshɔkɔ ɛsɔ. Ko ngande wakokaso mɛnya lowando laso lo mingu yayaye?
2. Ngande wakokaso monga la lowando l’oshinga w’etshungwelo?
2 Tonge la lowando: Mbala efula lowando tatɛka monga lo yimba y’onto. Dia tokimanyiya dia sho nkeketsha lowando laso l’oshinga w’etshungwelo, ekongelo ka laande ka wadielo w’avɛsa wa lo Bible wendana la Eohwelo tanemaka l’ahole efula, ɛnyɛlɔ lo apandisɛ B12 wele lo Ekadimwelo k’andja w’oyoyo kambovuswama (lo Angɛlɛ), lo alamanaka ndo lo Tɔsɛdingolake Afundelo lushi la lushi. Shi nyu koka nsɛdingola awui asɔ lo nkumbo? Sala ngasɔ, ayofudia lowando laso l’oshinga w’etshungwelo. Lo wedi okina, dui sɔ diayonga la nshɛngiya ya dimɛna lo lɔkɛwɔ laso.—2 Kɔr. 5:14, 15; 1 Jni. 4:11.
3. Lo toho takɔna takokaso mɛnya lowando laso lo nshi ya Eohwelo?
3 Tɛnya lowando: Lowando mɛnamaka oma l’etsha. (Kɔl. 3:15) Kanga sudi laki la lowando akasale la wolo dia tɛnana la Yeso ndo mbosha losaka. Aha la taamu, nde akatɛ anto akina la wangasanu tshɛ woho wakandakɔnɔ lo yoho ya dihindo. (Luka 6:45) Onde lowando lele la so l’oshinga w’etshungwelo totshutshuyaka dia mbisha lonya l’ohetoheto tshɛ l’esambishelo ka laande ka lo nshi ya Eohwelo? Nkamba oko ombatshi mboka wa tshanda kana mfudia olimu aso w’esambishelo lo nshi ya Eohwelo ekɔ yoho kina ya dimɛna ya mɛnya lowando lele la so. La dikɔlɔ dia lushi la Eohwelo, dia sho mɛnya dia tekɔ la lowando, sho pombaka nongola anto wayoya dimɛna ndo monga suke dia mbakadimola lo ambola awɔ.
4. Ngande wakokaso mbetɛ Eohwelo kɛnɛ dui di’ɔngɛnɔngɛnɔ?
4 Onde Eohwelo kɛnɛ mbele Eohwelo k’ekomelo? (1 Kɔr. 11:26) Hateye. Koko sho mbeyaka dia naka tɔ kambeta, kete diaaso sɔ dia laande dia mɛnya lowando diambeta. Onde wɛ ayokamba la diaaso sɔ? Ɔnkɔnɛ, ɛtɛkɛta w’oma l’enyɔ aso ndo ekanelo k’otema aso kangɛnyangɛnyake Jehowa lele Ombishi w’oshinga w’etshungwelo.—Osam. 19:14.