“Unsanganyia wudja”
1. Ngande wafɔna Losanganya la distrikɛ ndo losanganya la wedja efula la losanganya lakasale ase Isariyɛlɛ yema tshitshɛ l’ɔkɔngɔ wa vɔ ntomba l’Edjibito?
1 Yema tshitshɛ l’ɔkɔngɔ wa vɔ ntomba oma l’Edjibito, Jehowa akadjangɛ Mɔsɛ ɔnɛ “unsanganyia wudja” lo dikona dia Sinai dia vɔ ndjohokamɛ awui ande dia vɔ mbooka wɔma ndo mbetsha anawɔ ɛlɛmbɛ ande. (Euh. 4:10-13) Ande woho wahohamɛki diaaso sɔ ndo wakadiakeketsha mbetawɔ yawɔ lee! L’ɔkɔngɔ wa ngɔndɔ ngana, ekambi wa Jehowa wayosangana lo Losanganya la distrikɛ ndo lo losanganya la wedja efula dia mbetshama oma le Jehowa. Ahombaso nsala dia nkondja wahɔ tshɛ lo tshɛ?
2. Kakɔna kahombaso nsala dia ‘ndjalɔngɔsɔla’ lo dikambo dia losanganya la woke?
2 ‘Yalɔngɔsɔla’: Jehowa akadjangɛ ase Isariyɛlɛ dia ‘ndjalɔngɔsɔla’ dia tɔtɔ lo losanganya lahohamamɛki lɔsɔ lo dikona dia Sinai. (Etum. 19:10, 11) Woho akɔ waamɛ mbele, onto tshɛ layɔtɔ lo losanganya la woke nɔmbamaka dia ndjalɔngɔsɔla dimɛna, koko aha paka wanɛ wayonga l’ɛkɛndɛ ato. Ɛnyɛlɔ, anto efula wayonga l’ohomba wa mbɔsa kɔnje l’elimu awɔ. Ondo dikambo diayɛ fɔnaka la dia Nɛhɛmiya. Nde akalange tokotshika olimu ande wa mangolɛka nkumekanga Aratashasha wanu dia ntshɔ la Jɛrusalɛma ndo nyomotohika mpele diayɔ, koko nde akeyaka dia ondo nkumekanga heetawɔ. Nɛhɛmiya akasale dɔmbɛlɔ ndo oma laasɔ, la dihonga ndo la dilɛmiɛlɔ tshɛ nde akatshu dia tɔlɔmba nkumekanga. Nkumekanga aketawɔ dia nde ntshɔ ndo akasukɛ ekongelo ka wokelo kɛsɔ. (Neh. 2:1-9) Laadiko dia wɛ nɔmba kɔnje, onde wɛ amboshidiya nɔngɔsɔla awui wendana la lɔkɛndɔ ndo amboshikikɛ dihole diayoyotodjasɛ? Dikumanyi wayɔngɛnangɛna dia nkimanyiya onto tshɛ lele l’ohomba w’ekimanyielo. Yakongɛ dia komaka la wonya lo tenyi tshɛ ndo yalɔngɔsɔla dia “mbidja yimba lo yoho ya laande” lo kɛnɛ kayowetshaka.—Hɛb. 2:1.
3. Kakɔna kayotokimanyiya dia nɔngɔsɔla etema aso dikambo dia losanganya?
3 Dui dikina di’ohomba dialɔmbama ele, nɔngɔsɔla etema aso dia tohokamɛ ndo tetshama. (Ez. 7:10) Ekongelo ka losanganya la woke kayodjama lo sitɛ kaso ka jw.org ndo ɛtɛ w’asawo tshɛ ndo divɛsa ɔtɔi kana ahende wasukɛ sawo. Awui asɔ wayonga awui w’ohomba wakokaso nkamba la wɔ l’Ɔtɛmwɛlɔ wa lo nkumbo wa la dikɔlɔ lo mingu ya la ntondo ka losanganya la woke lakawatotome. Apandjudi amɔtshi ɛprimɛka (ntondja) ekongelo kɛsɔ ndo kambaka la tɔ dia mbɔsa nɔtɛ ya tomondo wonya wa losanganya la woke.
4. Ngande wakoka ambutshi nkamba l’awui wa lo losanganya la woke dia mbetsha anawɔ?
4 ‘Nyetsha ananyu’: Oyango ɔmɔtshi wakatama waki la losanganya lakasalema lo dikona dia Sinai aki wa ambutshi w’ase Isariyɛlɛ “mbetsha an’awo.” (Euh. 4:10) Losanganya la woke layosha ambutshi diaaso dia laande dia nsala woho akɔ waamɛ. Ambutshi pombaka mbidjasɛka kaamɛ l’anawɔ etena kasalema losanganya ndo mbakimanyiya dia vɔ mbidja yimba. L’ekomelo ka lushi tshɛ ndo l’ɔkɔngɔ wa laasɔ l’ɔtɛmwɛlɔ wa lo nkumbo, nkumbo tshɛ koka nkɛtshanya kaamɛ awui wendana la losanganya.
5. Wahɔ akɔna wakokaso nkondja naka sho mbɔtɔ lo losanganya la woke layaye?
5 Losanganya la woke lakasalema lo dikona dia Sinai lakakimanyiya ase Isariyɛlɛ dia ngɛnangɛna la diɛsɛ diawɔ dia laande dia monga ekambi wa Nzambi. (Euh. 4:7, 8) Woho akɔ waamɛ mbele, losanganya la woke layaye lakalɔngɔswama l’oyango wa sho nkondja wahɔ. L’edja ka nshi shato, tayonga oko anto wambotomba oma l’andja waki Satana wele oko oswe wa shɛnga ndo tayɔngɛnangɛna l’ekeketshelo ka lo nyuma ndo la lɔngɛnyi lakeketsha lo paradiso kaso ka lo nyuma. (Is. 35:7-9) Oko wamboleka lushi la Jehowa sukana, nyɛsɔ tosale la wolo diaha mpandja diaaso sɔ dia nsangana kaamɛ dia nkeketshana.—Hɛb. 10:24, 25.