“Mboka Ka Nzambi Ka Lɔsɛnɔ”
—Losanganya La Distrikɛ Kana La Wedja Efula 1998
1 Tukedi 10:29 tôholaka ɔnɛ: ‘Mboka ka Jehowa kekɔ longele.’ Omalɔkɔ, ɔtɛ a dui wa nsanganya ya distrikɛ y’ɔnɔnyi ɔnɛ sunganaka hakoke: “Mboka ka Nzambi ka Lɔsɛnɔ”! Ngande wayowɔmbɔla ɔtɛ a dui ɔsɔ l’edja ka nshi shato ya losanganya na? Sho tshɛ tekɔ lo kongɛ l’asolo lokoloko kɛnɛ kambowotombɛ. Tokanyi t’ohomba efula tayoshama.
2 Ondo wa misiɔnɛrɛ, ekambi weteta lo wedja efula kana anangɛso l’akadiyɛso akina wakamba lo wedja ekina wayɔtɔ lo nsanganya ya wedja efula. Tekɔ lo nongamɛ dia nunu di’atomami w’oma lo wedja ekina monga lawɔ l’esomba wayosalema nsanganya ya wedja efula. Lo losanganya lakɔ wayosha alapɔlɔ wɛnya woho watshɔkɔla Jehowa olimu lo mbilo efula yotshikitanyi.
3 Pombaka Mbidja Wolo dia Monga Lâwɔ: Anangɛso efula wa l’Afrika mongaka l’ehemba waya oma lo ta kana efukutanu wasutshasutsha tenyi dia nkɛtɛ dia lo dihonda (continent) sɔ. Le wɔ, nsanganya y’ekambi wa Jehowa yekɔ ohomba efula. Amɔtshi pombaka munda lɔkɛndɔ l’otale dia tɔtɔ lo losanganya la woke, koko, hawokanyiyaka dia mbetsha kânga ɔtɔi. Lo République démocratique du Congo (Zaïre), ɔnangɛso ɔmɔtshi lele l’ɛnɔnyi 73 akakɛndakɛnda kilɔmɛtɛlɛ 450 l’ekolo dia tɔ̂tɔ lo losanganya la woke. Nde akatshe nshi 16 lo mboka, ekolo amboda, koko nde aki l’ɔngɛnɔngɛnɔ dia monga lâwɔ. L’ɔkɔngɔ wa losanganya nde akakalola otsha lakande l’ekolo oludi tɔɔ l’ɔngɛnɔngɛnɔ ndo ambokeketshama lo nyuma. Ngasɔ mbokondotshaka ɛnɔnyi tshɛ!
4 La Mozambique, omendji ɔmɔtshi wa distrikɛ nde la wadiɛnde wakawande dikona di’otale efula ndo wakatenyanya oswe ɔmɔtshi wa shɛnga wa woke hakoke l’ekolo dia tɔ̂tɔ lo losanganya la distrikɛ. Vɔ wakatshe lɔkɛndɔ lɔsɔ la kilɔmɛtɛlɛ 90 l’edja k’eshidi a tango 45. Wanɛ tshɛ waki lo losanganya wakakeketshama heyama oma l’ɛnyɛlɔ kawɔ ka dimɛna efula. Nkumbo efula yaki lâwɔ wakatshe weolo wa ngasɔ dia monga lo losanganya lakɔ. Omendji wa distrikɛ akakɔndɔla ate anangɛso efula, ɔmɔtshi aki l’ɛnɔnyi 60, wakakɛndakɛnda kilɔmɛtɛlɛ 200 l’ekolo!
5 Onde tambɔsaka tɛdikɔ t’eshika dia mbɔtɔ lo losanganya la woke ɔnɔnyi ɔnɛ? Ondo ndo sho lawɔ tayɔkɛndakɛnda lɔkɛndɔ l’otale efula l’ekolo, koko ayohomba sho mbidja weolo ndo ndjahombia awui amɔtshi dia monga lâwɔ nkumbo k’otondo. Toyalɔngɔsɔlɛ dia monga lo losanganya l’otondo oma ko etatelo polo l’ekomelo. Anto efula weka Bible wekɔ lo tahame otsha lo batismu. Naka vɔ mbɔtɔ lo losanganya, kete wayokoka mbɔsa yɛdikɔ y’ɔlɔlɔ. Onde tambelɛ anto walanga kâmɛ ndo wanɛ weka la so Bible dia vɔ ntshɔ la so lo losanganya?
6 Losanganya la Nshi Shato: Ɔnɔnyi ɔnɛ, nsanganya ya weke 59 yayosalema lo Burundi, lo Congo-Brazzaville ndo lo Congo-Kinshasa. Lâdiko dia Falase, nsanganya yayosalema lo Kiluba, lo Kirundi, lo Lingala, lo Monokutuba, l’Ɔtɛtɛla, lo Swahili, lo Tshiluba ndo lo Uruund. Listɛ l’ahole ndo adatɛ wa nsanganya shɔ lakatshikitanyema ndo lakalɔngɔsɔma. Vɔ wekɔ lo kiombo yayela lanɛ. Etena kɛnɛ, nyambeya lɛnɛ ayotshɔ etshumanelo kanyu lo losanganya.
7 Dikambo di’Ohomba Efula: Ekɔ ohomba efula sho mbɔtɔ lo losanganya layɔtɔ etshumanelo kaso. Dilɛmiɛlɔ diashɛ yɛdikɔ shɔ ndo woho wakambayɛ la so kâmɛ ayotokimanyiya dia akambo tshɛ ntshama dimɛna ndo aha l’ofutanu.—1 Kor. 14:33, 40.
8 Lushi la Tanu, la Samalo ndo la Lomingu la pindju, losanganya layomɛka lo 9 h 30. Lushi la Tanu la la Samalo, losanganya layoshilaka l’eshidi 5 wa dikɔlɔ, ndo, Lushi la Lomingu l’eshidi 4 wa dikɔlɔ. Nkuke yayodihɔmaka nshi tshɛ l’eshidi 8 wa pindju. Paka wanɛ wele l’elimu wa ntsha mbayɔtɔka k’ɔlɔmɔ. Koko, ndoko onto layâmbɛ dihole la ntondo k’eshidi 8.
9 Sho pombaka nyanga waaso wa nsambisha lo tshakitudi lam’atatatshu kana lam’atatakalola oma lo losanganya. Losango la Diolelo koka ngɛnyangɛnya wanɛ wasondja esasɛ kana mandjoto, kɔmɛlɛsa, wanɛ wafutshanya ekanda wa mboka, wanɛ wakamba l’ɛtɛlɛ ndo wanɛ washana diangɔ dia ndɛ. Toyalɔngɔsɔlɛ dia monga la traktɛ, periodikɛ yeke ka tomba, tobukubuku kana ekanda ekina, woho wa kamba la waaso tshɛ dia nsambisha anto, wele ondo, hawokoka nsambishama lokumu l’ɔlɔlɔ lo yoho kina.—2 Tim. 3:17.
10 ‘Tênde Ɔlɔlɔ Woho Wahokamɛso’: Wanɛ wɔtɔ lo nsanganya ya weke ntshaka dimɛna dia ndjela dako diatanema lo Luka 8:18. Onto tshɛ keketshamaka dia ntshɔ la Bible kande, dibuku di’esambu ndo kalupɛ yafundaka awui w’ohomba. Tohokɛ lotui ɔlɔlɔ lo tokanyi toleki ohomba tashawɔ ndo totifunde lo tshena pe. Onto l’onto l’atei aso ayambole woho wa kamba la kɛnɛ kokaso. La dikɔlɔ dia lushi tshɛ la losanganya, la ntondo ka ntshɔ a tolala, lande na kahatavusola awui wakatafundji ndo ndjasɛdingola dia mbeya kana tekɔ lo ndjela mboka ka Jehowa ka lɔsɛnɔ dimɛna dimɛna?—Tuk. 4:10-13.
11 Takɛnyi dia, wonya wa losanganya, amɔtshi tombaka oma lɛnɛ ashama alako ko ntshɔ dia todjasɛ l’andja, ko vɔ pandjaka alako. Wakɛnyi amɔtshi wateteta anyanya lo tɔsɛsɛ, lo dihole dia vɔ mbidjasɛ ndo mpokamɛ. Elui w’ɛlɔngɔlɔngɔ wakatombe oma lo losanganya l’atei atei w’etenyi ka l’ɔkɔngɔ a midi. Ekambi ɛmɔtshi wa Jehowa wa lo nshi y’edjedja wakatshe munga ya mamba nɛ dia vɔ kopokɛ lotui ɔlɔlɔ l’awui wakawawaoholaka. Mɛtɛ, sho nangaka mbewɔ di’aha ndjonga oko vɔ. (2 Khu. 17:13-15) ‘Ɔhɔmbɔ wa kɔlamelo ndo wa kɛsɔ’ akalɔngɔsɔla wetshelo wa dimɛna efula weso sho tshɛ l’ohomba. Ekɔ ohomba efula sho ‘ndeka nkana akambo wayotoka’ l’etenyi l’etenyi ka nshi shato ya losanganya lɔsɔ. Lushi tshɛ, vwi wui mɔtshi yendana la so yayotama, djekoleko tokanyi tayonga la shɛngiya ya pudipudi lo yoho yaso ya nsɛna lo nshi yayaye. Lo mpokamɛka ɔlɔlɔ ndo lo kambaka dimɛna la kɛnɛ kayotosha Jehowa lo nyuma lo nsanganya yayaye shɔ, elongamelo kaso kayoshikikala nge, ndo dui sɔ diayotokimanyiya di’aha sho ‘ntshɔ l’elanyelo,’ mbut’ate mimɔ oma lo mboka ka Nzambi ka lɔsɛnɔ.—Mat. 24:45; Heb. 2:1.
12 Ɔlɔtɔ Washa Jehowa Nɛmɔ: Lo nshi ya pâ yasɛnaso nyɛ, diele la so dia ndeka mpokɛ lotui di’aha sho ndjɔsɛngiyama la yimba y’andja ɔnɛ. (1 Kor. 2:12) Ɔlɔtɔ aso ndo divo diaso pombaka monga kɔmba ndo mɛnya nɛmɔ diele la Nzambi katɛmɔlaso. (1 Tim. 2:9, 10) Aha paka monga l’ahɔndɔ w’oshinga wolo dia ‘ndowanya wetshelo wa Nzambi, Oshimbedi aso.’ (Tito 2:10) Nyende alako w’eshika w’oma l’Afundelo woshawɔ l’odingɔ 14 polo 18 wa Tshoto y’Etangelo ya Ngɔndɔ k’Esambele 1, 1997, lɛkɛ 11 la 12. Tatɔnyɔlake wolo w’esambishelo kayototsha lo mongaka l’ɔlɔtɔ washa Jehowa nɛmɔ.
13 Dionga Diangɛnyangɛnya Jehowa: Sho mbeyaka shate dionga diaso di’Akristo koka monga la shɛngiya lo nganɛ wɔsa anto akina ɔtɛmwɛlɔ wa mɛtɛ. Diɔ diakɔ dialangaso kɛndakɛndaka wonya tshɛ lo yoho yasungana la lokumu l’ɔlɔlɔ ndo yasha Jehowa nɛmɔ.—Fil. 1:27.
14 Ɔnɔnyi wetshi, losanganya la distrikɛ lakalɔngɔsɔma mbala ka ntondo l’Angola wa lo nɔrdɛ. Lushi la hende la losanganya, wakatome apulushi ahende wa lo ngelo kakɔ lo dihole diakɔ dia vɔ tenda kana ofutanu wekɔ. Vɔ wakatshikala lɛkɔ yanyi y’otondo. L’ekomelo ka losanganya vɔ wakɛnya lowando lawɔ lo kɛnɛ kakawoke ndo dionga di’aha l’ofutanu diakawɛnyi. Ɔmɔtshi a l’atei awɔ akate ate: “Lande na akawatotomi lanɛ na? Sho mbeyaka shate Ɛmɛnyi wa Jehowa kema l’ofutanu lam’asanganawɔ.”
15 Pami kɛmɔtshi kaki ose olui ɔmɔtshi wa pɔlitikɛ lo wodja ɔmɔ wa l’Afrika akalawɔ otsha l’Erɔpɛ, nɛ dia ase olui ande tshɛ wakadiakema. Nde akakɔmɔ hakoke oma lo lokema l’akambo waki lande. L’ɔkɔngɔ diko, nde aketawɔ mbeka Bible. Lam’akandɔtɔ lo losanganya la distrikɛ mbala ka ntondo, nde akatshikala onyɔ hwe dia mɛna anto w’oma l’ahole wotshikitanyi sangana kâmɛ lo wɔladi ndo lo diokanelo, dui diakawetawoya ɔnɛ nde ambotana sɔlɔ. Lo losanganya lɔsɔ, nde akɔshi yɛdikɔ dia tshika awui ande tshɛ wendana la pɔlitikɛ. L’ɔkɔngɔ diko nde akayobatizama ndo, ɛlɔ kɛnɛ, nde l’anande wekɔ lo kambɛ Jehowa.
16 Ɔnɔnyi ɔnɛ, naa shɛngiya yayonga la dionga diaso le anto wayɔtɔ lo losanganya ondo mbala kawɔ ka ntondo na? Onde vɔ wayɛna yimba y’anto wakamba kâmɛ yɛnyaso lo kambaka l’andjashi (volontaires) akina? Onde vɔ wayamba dia mɛna pudipudi kele lo dihole diakɔ ndo lo mɛna ɔnɛ, la ntondo ka sho ntshɔ, sho l’anaso tekɔ lo tɔngɔna mindo yayokoka monga lam’akatadjashi? Onde vɔ wayonga ɛmɛnyi wa dionga diaso di’ɔlɔlɔ lam’atshɔso otsha lo mpango kaso ndo akalolaso oya lo losanganya? Onde vɔ wayɛna ɔnɛ sho ambutshi tekɔ lo nama anaso wonya tshɛ? Tonge l’eshikikelo ɔnɛ tekɔ lo ntsha tshɛ dia mbisha wanɛ wayotoshishimaka kanyi y’ɔlɔlɔ.
17 Tokaloya Falanga Yakatombe dia Nɔngɔsɔla Losanganya: L’andja wa nshi nyɛ, tikɛ dia mbɔtɔ lo sɛkɛ dia ponde dia tênda tɔkɛnyɔ tɔmɔtshi kana dikambo dikina tshɛ lo mbalasa kɛmɔtshi ka losanganya ekɔ oshinga wolo hakoke. Dikambo sɔ ndjaka ndo oma lo oshinga a wolo wafutɛwɔ dihole diakɔ l’esomba. Dia nsanganya ya weke, la Société mbɔtshiyaka anto nshi tshɛ “Wɔɔtɔtɔ—Aha ɔkɔngɔ.” Ko, oma lende ayotomba akuta wakawafutɛ dihole diakɔ ndo akuta akina wakatombe dia nɔngɔsɔla losanganya na? Oma l’ekimanyielo ka weshasha wa la lokaho wakimɔ wanɛ wɔtɔ lo losanganya. Tekɔ l’eshikikelo ɔnɛ nyayɛnya yimba ya lokaho oko akɛnya ekambi wa Nzambi waki lo nshi ya ntondo, wanɛ wakôkoya Jehowa la Yeso Kristo. (2 Kor. 8:7) Sho namaka ɔlɔlɔ dia momba weshasha tshɛ lo dihole dia dimɛna, mbadia ndo kamba lawɔ olimu wakawakimɔma.
18 Ahole wa Mbidjasɛ: Alako wokowoshaka ɛnɔnyi l’ɛnɔnyi wekɔ ohomba efula: AHA MOMBƐ ANTO AKINA AHOLE, ONYAKE EWOTƆ AYƐ WA KA SUKE LA WANƐ WOYE LAYƐ. Ekɔ ɔlɔ efula dia mɛna ɔnɛ ɛnɔnyi wetshi ɛnɛ, ampokami efula wekɔ lo ndjela dui sɔ, ko keketshaka ngandji katotokanaka l’assemblée. L’ahole efula wasalema assemblée, ahole amɔtshi kema okakatanu dia todjasɛ lɛkɔ. Nyokane anto akina wele la pâ lo mbâtshikɛ ahole wosunganyi la wɔ dia vɔ mbidjasɛ. Tatohɛke ɔnɛ ‘ngandji hayange wahɔ ande hita.’—1 Kor. 13:4, 5; Fil. 2:4.
19 Appareils wa Fɔtɔ, caméscopes la magnétophones: Kokaka onto kamba la appareils wa fɔtɔ la dihomɔ dikina diasangola awui. Koko, sho la dia kanɛ ampokami akina di’aha mbafukutanya. Hatohombe monɛ wonya washama dako dia tonda fɔtɔ, nɛ dia ayonga wɔɔnganu wa fukutanya anto akina wasala tshɛ dia nonga. Ndoko ehomɔ ɔtɔi kasangola awui, oyadi ka woho akɔna, kahomba kɔhama lo kiɔkɔ y’atɔtɔ kana lo ekongelo ka sɔnɔrizasiɔ ka assemblée, kânga kitshama lo tɔsɛsɛ sɛsɛ kana lɛnɛ enda ampokami akina.
20 Esakelo ka Ntondo: Olimu w’esakelo ka ntondo kimanyiyaka paka lo dikambo dia wanyandja. Kotshu la aspirinɛ ayɛ, ekanga ayɛ wa l’otema, diangɔ diayɛ dia sola kana mbifɛ mpota, mpɛngɛlɛ y’ana w’ashashi ndo diangɔ dikina dia ngasɔ diahatanema l’assemblée. Wanɛ tshɛ watata hemɔ ya diowe kana kardiyakɛ, wanɛ wokoki tondama shashimoya la hemɔ ka diabɛtɛ, la weho ekina wa hemɔ, pombaka monga l’ekanga wahombama. Ose nkumbo kawɔ kana ose etshumanelo kawɔ ɔmɔtshi leya pâ kele lawɔ pombaka mbâlamaka wonya tshɛ dia mbâkimanyiyaka wonya wewɔ l’ohomba. Lo assemblées ɛmɔtshi, anto waki la hemɔ yahakɔnɔ ko kondjala la wanɛ wâlama wakayondamaka la hemɔ wolo, ko akambo wakayoyala wolo. Naka onto ekɔ l’ohomba w’esakelo kɛmɔtshi ka lânde ko ndoko ose nkumbo kande kânga ɔtɔi lakoka mbokimanyiya, kete pombaka mbewoya dikumanyi dia l’etshumanelo kande dia vɔ mbɔsa tɛdikɔ tahombama dia mbôkimanyiya. Hawotomba mvudu mɔtshi ya lânde ya mbidjaka paka anto wele la weho ɛmɔtshi wa hemɔ.
21 Olelo: Onto l’onto ayohomba ndja la mbo yande hita ya ndɛ lo dihole dia tomba oma lo sɛkɛ dia losanganya ko ntshɔ dia tosomba yangɔ l’andja lo tshenyi ya wonya tshitshɛ ya diomuyelo dia midi. Yangɔ ya ndɛ y’osadi, yasha demba wolo ndo yele bu pâ efula lo mɛmba ambokokaka. Dikatshi di’okotsha di’Olimu Aso wa Diolelo wa Ngɔndɔ ka Nɛi 1996, tɛnyaka mbo ya ndɛ mɔtshi l’odingɔ 6 la 7. Tatɔ̂tɔke lo dihole dia losanganya l’elangi wakoka mbolɛ kânga wanu wadjoya. Pombaka ntshɔ la diangɔ kana atapa womba tshitshi wa totshitshɛ wakoka mbɔtɔ la tshina dia kɔsa kana okala wodjashiyɛ. Wakɛnyi ampokami amɔ walɛ diangɔ wonya wa losanganya, koko ɔsɔ ekɔ dikambo dia lɔsɛndji.
22 Ande ɔlɔ wele laso lam’akanyiyaso losanganya laya suke “Mboka ka Nzambi ka Lɔsɛnɔ” lee! Onde tambɔsaka tɛdikɔ dia mbɔtɔ lɔkɔ? He katotshu lɔkɛndɔ l’ɔlɔlɔ ndo katokalole lawakaso nge, la kanyi ya tetemala la kambɛ Jehowa olimu aso w’ohomba efula ndo tetemala la ndjela mboka ka Nzambi ka lɔsɛnɔ, dia ɔngɛnɔngɛnɔ aso wa pondjo!
▪ Batismu: Wanɛ wayobatizama wayodjasɛ l’ekala wakawâlamɛ la ntondo ka assemblée tatɛ lushi la Samalo la pindju. Onto l’onto kâye l’ɛsiyamɛ ande ndo l’ahɔndɔ wasungana dia ndjɔ̂tɔ lawɔ l’ashi. Nshi ya ntondo, takɛnyi di’amɔtshi wakalɔtaka ɛlɔtɔ wa kɔlɔ ko mbetshaka batismu ɔlɛlɔ oto. Dikumanyi diayɔsɛdingola wembola wele lo biukubuku Atshina a Wekelo kâmɛ la wanɛ wayobatizama kawoyashikikɛ dia kana onto tshɛ l’atei awɔ ambohotɔ akambo asɔ ɔlɔlɔ. Batismu ka djembetelo yɛnya ɔnɛ onto amboyakimɔ le Nzambi ekɔ dikambo dia l’asa onto ndamɛ la Jehowa. Omalɔkɔ, ndoko yɛdikɔ mɔtshi yɔsami dia “batismu ya l’olui” ya kandinda hiende kana ndekana kimanɛ l’anya wonya wa dindjamawɔ l’ashi.
▪ Kitadi: Kanyɔlɔtake kitadi ka 1998 oyadi l’assemblée kana lo mboka lo ntshɔ la kalola. Dikambo sɔ kimanyiyaka tena efula dia nsambisha dimɛna. Nyayokondja ntadi la totapatapa tatɔ lo tshimbo y’etshumanelo kanyu, nɛ dia hadiotonga l’assemblée. Tokongake tshikima nshi y’assemblée yambosukana dia ndjɔlɔmba ntadi diayɛ wɛ la nkumbo kayɛ. Tanyohɛke dia mongaka la kartɛ kanyu ka “Instructions médicales — Pas de sang”.
▪ Mpango: Tambonyɔlɔmba nyu tshɛ dia kamba kâmɛ lo ndjela PAKA listɛ l’ahole wakalɔngɔsɔla Bilɔ w’assemblée dia mpangia anto. Tena efula ase losanganya tohangaka laka anto. Sho pombaka mɛnya lowando laso le anangɛso l’akadiyɛso wetawɔ todjasha lawakawɔ. Ndo nto, hosungana dia anto walongolawɔ ngasɔ nanya ɔlɔlɔ ɔsɔ ndo tohika ɔnɛ wawasha luudu nshi efula la ntondo kana l’ɔkɔngɔ wa losanganya. Mpango mbishamaka paka LO NSHI ya losanganya. Wanɛ washawɔ pango ya ngasɔ pombaka mbɔsa diangɔ dia kanga luudu la nɛmɔ, aha nanya ndoko ema, aha ntshɔ l’ahole wewɔ hawowaele, ndo nama dia ndo anawɔ ntsha woho akɔ wâmɛ. Naka akanga a mvudu yohangi anto wekɔ l’okakatanu ɔmɔtshi lo dikambo sɔ, vɔ pombaka mbewoya esadi wanɛ wakamba olimu wa mpangia anto, vɔ wayɔngɛnangɛna dia mbâkimanyiya.
Kânga mbasɛnaso lo ‘tena dia pâ dia wolo mbikikɛ’ sho koka mbetawɔ ɔnɛ anto efula wayodihola nkuke yawɔ dia wanɛ wayanga mpango mbɔtɔ, oko akatshe ase Kinshasa kana ase ngelo nkina, lam’akalawɔ anangɛso ta. Ekɔ kandji efula dia mboka ɔnɛ ahole efula anto hawolange pangia ase losanganya lawakawɔ. Mɛtɛ, sho hatotolanga dia ekakatanu wa nshi nyɛ kitshakitsha ngandji kokanaso la tona nongɔna naka tekɔ l’akoka wa nongɔna.—2 Tim. 3:1; Heb. 13:1, 2; Joa. 13:35.
▪ Olimu w’Andjashi: Onde wɛ koka ndjâombɛ yema y’etena lo assemblée dia mbisha lonya l’olimu ɔmɔtshi? Sho kokaka ndjaetɛ ohomba efula ndo ndjakondjiyɛ ɔngɛnɔngɛnɔ wa woke naka sho kambɛ anangɛso, kânga wenya engana eto. Naka wɛ kokaka mbisha ekimanyielo kayɛ, kete toyaɛnya l’olimu w’andjashi (volontaire) lo assemblée. Ana wele l’ɛse k’ɛnɔnyi 16 kokaka mbisha lonya ndo vɔ lawɔ lo yoho y’ɔlɔlɔ l’ɛlɔmbwɛlɔ k’ambutshi awɔ kana k’opalanga okina wele l’ɔkɛndɛ akɔ.
▪ Toyale Suke dia Nongɔna: Anto efula wɔtɔ lo nsanganya ya distrikɛ yasalema lo mbilo kaso ntshɔka l’ahole wanganyi yema etale la lawakawɔ. Vɔ mongaka l’ohomba wa dihole dia tomuyaka l’otsho woho wa vɔ kondja wolo wa ndjoyela losanganya la wedi a pindju. Naka tekɔ lo mbidjasɛ l’osomba wayosalema losanganya, bonde kahatokana la wanɛ wakamba Olimu wa mpangia anto dia mbaɛnya dihole dimɔtshi dia mpangia ase losanganya wayonga l’ohomba a mpango na? Lâsɔ kayotokondja diaaso di’ɔlɔlɔ efula dia mɛnya ɔnɛ sho nongɔnaka, ndo dui sɔ diayokeketsha amama aso w’onto l’anango ko nyomoleka tombola Jehowa.—1 Pet. 4:9; Heb. 13:1, 2.
▪ Toyale la Lokanyi l’Ɔlɔlɔ l’Olimu wa Ndjakimɔ la Lolango dia Nɔngɔsɔla Assemblées Aso: Nɔngɔsɔla losanganya la distrikɛ nɔmbaka wolo wa demba ndo wonya. Naka andjashi monga efula dia kamba elimu wotshikitanyi wa nɔngɔsɔla losanganya, kete wotsho hatonga efula. Ko, elɛwɔ ondjashi na? Lo ndjela dikisiɔnɛrɛ di’oyoyo dia petit Robert, ondjashi ekɔ onto lakamba elimu lo ndjakimɔ ndâmɛ kana la lolango lande. Lâsɔ, mbokɛmaka dia ondjashi hahombe nongamɛ difuto oma l’elimu wakambande. Ekɔ mɛtɛ dia ekongelo ɛmɔtshi wa totshitshɛ mbeyaka ntshama lo ndjela kɛnɛ kele laso shâmɛ dia mbisha andjashi wakamba wolo kânga yangɔ ya ndɛ mbala ɔtɔi lo lushi dia awui tshɛ nɔngɔsɔma la ntondo ka losanganya tatɛ. Ɔsɔ pombaka monga yɛdikɔ yayotɔsaka shâmɛ ko tshumanelo mbeyaka kondja diɛsɛ dia vɔ kimɔ yema ya woshasha oyadi falanga kana diangɔ dia ndɛ. Lâsɔ, hatohombe nongamɛ ɔnɛ la Société ayotsha dui dimɔtshi lo yoho shɔ.—Osam. 110:3.
▪ Tokondja Ɛlɔlɔ oma lo Ekola Kaso: Ekola kakɔna kɛsɔ na? Wenya la weolo wahombaso mbidja dia mbɔtɔ lo losanganya. Honga dikambo dia tshundju dia sho ndjalɔngɔsɔla dimɛna efula dia mbɔtɔ lo losanganya la distrikɛ ndo ndjokalola Lushi la Lomingu la dikɔlɔ ko takahandja etenyi ka woke ka losanganya. Naka tekɔ anto wambotshunda lo nyuma, kete hatotokoka pandja ndoko ɛngɔ kakatɔlɔngɔsɔlɛ Jehowa. (1 Kor. 2:9, 10) Lushi tshɛ la losanganya, tayohombaka ntsha tshɛ dia mbidjasɛ la ntondo ka losanganya tatɛ. Oyadi kânga tekɔ lo ngɛnangɛna lale angɛnyi aso w’edjedja, etena kewoya ɔnɔmbɔdi ɔnɛ losanganya lambotatɛ, ayonga dimɛna sho nɛmiya wanɛ washa alako ndo anangɛso tshɛ lo pembola sawo ndo ntshɔ la todjasɛ mbala kakɔ ɔtɔi.
▪ Ɔhɛmwɛlɔ: Kokangake dikalo diayɛ kana nkuke ya mutuka ayɛ nshi tshɛ la sapi ndo tokalɛke ndoko ema kakotola washo. Assemblées kotolaka ase wevi la akanga a tɔ̂mɔdi. Tohembake tshika ɛngɔ k’oshinga wolo la kɔsa kayɛ. Wɛ hakoke ndjashikikɛ ɔnɛ wanɛ tshɛ wokodingi wekɔ Akristo. Bonde kadjayɛ onto l’ohemba? Takalongola alapɔlɔ w’ɔnɛ anto weso hateye wakahembe kotola ana w’akɛnda otsha l’andja. TƐNAKE ANAYƐ WATAPƆ.
Ngɔndɔ k’Enanɛi 14-16, 1998
BANDUNDU (LI): BD-1; BD-10
BUMBA (LI): EQ-4; EQ-12; EQ-15; EQ-20; EQ-22; OR-3; etenyi OR-10; OR-15
BUNIA (SW): OR-4; OR-12
KIKWIT (F, MK): BD-2; etenyi BD-19; BD-24; etenyi BD-22
KINSHASA (F): KN-4; KN-7; KN-10
MANONO (KU): Etenyi KT-10; KT-14; etenyi KT-16
MATADI (LI): BC-1; BC-5
MBANDAKA (LI): EQ-2; EQ-7; EQ-16; EQ-17; EQ-23
MBUJI-MAYI (F, SH): KA-2; KA-8; KA-16; KA-17; KA-20; etenyi KA-25
SANDOA (DR): Etenyi KT-5; KT-21
TSHIKAPA (F, SH): KA-6; KA-22; KA-23; KA-31
Ngɔndɔ k’Enanɛi 21-23, 1998
BRAZZAVILLE (F, LI): CO-1; CO-5; etenyi CO-3; etenyi CO-7; etenyi CO-8
BULUNGU (MK): BD-5; etenyi BD-19; BD-20
GOMA (F, SW): KI-2; KI-6; KI-14
IDIOFA (MK): BD-8; BD-16
ISIRO (LI): OR-2; etenyi OR-17; OR-18
KANANGA (F, SH): KA-1; KA-9; KA-14; KA-18; KA-19; KA-28; KA-30
KIMPESE (LI): BC-2; etenyi BC-3; BC-4; etenyi BC-6; BC-7; BC-8
KINDU (SW): KI-3; etenyi KI-4; KI-13; etenyi OR-5; OR-16
KINSHASA (LI 1): KN-1; KN-3; KN-8; KN-12; KN-13; etenyi BC-3
KISANGANI (F): Etenyi OR-1; etenyi OR-7; etenyi OR-8; etenyi OR-10; etenyi OR-14
LISALA (LI): EQ-8; EQ-11; EQ-18; EQ-21
LODJA (OT): KA-4; KA-11; KA-12; etenyi KA-26; KA-27; etenyi KA-32
LUBUMBASHI (F, SW): Etenyi KT-1; KT-2; KT-13
MULONGO (KU): Etenyi KT-8; etenyi KT-10; etenyi KT-16
POPOKABAKA (LI): Etenyi BC-6; BD-7; etenyi BD-13; etenyi BD-21
Ngɔndɔ k’Enanɛi 28-30, 1998
BOENDE (LI): EQ-3; EQ-6; etenyi EQ-13; EQ-24
BUKAVU (F, SW): KI-1; KI-11; KI-12
BUTEMBO (SW): KI-7; KI-9
DUNGU (LI): OR-6; OR-13; etenyi OR-17
GBADOLITE (LI): EQ-5; EQ-9; EQ-19
KABINDA (F, SH): KA-5; KA-13; etenyi KA-32
KALEMIE (SW): Etenyi KT-12; KT-18; etenyi KT-19
KENGE (MK): BD-3; BD-9; etenyi BD-21
KINKONDJA (KU): Etenyi KT-8; KT-9; etenyi KT-10; etenyi KT-16
KINSHASA (LI 2): KN-2; KN-5; KN-6; KN-9; KN-11
KISANGANI (LI, SW): Etenyi OR-1; etenyi OR-5; etenyi OR-7; OR-9; etenyi OR-14
KONGOLO (SW): Etenyi KI-4; KT-22
LIKASI (F, SW): Etenyi KT-1; KT-17; KT-20; KT-23
NIOKI (LI): BD-4; BD-6; BD-14; BD-15
POINTE-NOIRE (F, MK-Cgo): CO-2; CO-6; etenyi CO-8
UVIRA (SW): KI-8; etenyi BU-1
Ngɔndɔ ka Divwa 4-6, 1998
BENI (SW): KI-5; KI-10
BOKUNGU (LI): EQ-10; etenyi EQ-13
BUJUMBURA (RU): Etenyi BU-1; BU-2; BU-3
GEMENA (LI): EQ-1; EQ-14
ILEBO (F, SH): KA-10; KA-15; KA-29
KAMINA (SW, KU): Etenyi KT-4; etenyi KT-6; KT-7; KT-15
KIRUNGU/MOBA (SW): Etenyi KT-12; etenyi KT-19
KOLE (OT): KA-7; KA-21; etenyi KA-26
KOLWEZI (F, SW): Etenyi KT-1; KT-3; etenyi KT-5
MUKEDI (MK): BD-18; BD-23
OUESSO (F): Etenyi CO-3; etenyi CO-7
TEMBO (LI): BD-17; etenyi BD-13
Ngɔndɔ ka Divwa 11-13, 1998
BUTA (LI): Etenyi OR-8; OR-11
GUNGU (MK): BD-11; BD-12; etenyi BD-22
KABONGO (KU): Etenyi KT-4; etenyi KT-6; KT-24
MWENE DITU (F, SH): KA-3; KA-24; etenyi KA-25
PEPA (SW): KT-11; KT-25
[Caption on page 6]
[Box on page 6]
Losanganya La Woke—Awui Wa Mbohɔka
[Caption on page 5]
[List of locations on page 5]
Losanganya La Distrikɛ 1998