Ngande wɛnamami le Jehowa?
1. Lo ngande wɛdikama Bible la talatala?
1 Mbala ngana yatotoyaendaka lo talatala? Efula ka l’atei aso ndjaendaka lushi la lushi, nɛ dia talatala tokimanyiyaka dia mɛna awui wele lo ɛnamelo ka demba diaso wahombaso nɔngɔsɔla. Bible mbɛdikamaka la talatala. Wadielo w’Ɔtɛkɛta wa Nzambi tokimanyiyaka dia mɛna lonto laso la l’etei k’otema lenda Jehowa. (1 Sam. 16:7; Jak. 1:22-24) Ɔtɛkɛta wa Nzambi koka “nshihodia tokanyi ndo eyango wele l’otema.” (Hɛb. 4:12) Ngande wakoka wadielo wa Bible ndo okanelo wa yimba wa lushi la lushi tokimanyiya dia mɛna awui wahombaso ndjalowanya l’oyango wa ndeka monga esambisha wa tomanamana?—Osam. 1:1-3.
2. Ngande wakoka Bible tokimanyiya dia sho ndjasɛdingola?
2 Tokambe la Bible oko talatala: Ɛkɔndɔ wa lo Bible w’ekambi wa Jehowa wa kɔlamelo, tokimanyiyaka dia mbeya waonga w’amɛna walangande. Ɛnyɛlɔ, Davidɛ akɛnya ohetoheto lo dikambo dia lokombo laki Nzambi. (1 Sam. 17:45, 46) La dihonga tshɛ, Isaya aketawɔ la lolango dia nsambisha lo ɛtshi ka nkɛtɛ ka wolo. (Is. 6:8, 9) Ngandji k’efula kooka Yeso She akotshutshuya dia mbɔsa olimu w’esambishelo oko kiɔkɔ y’ekeketshelo ndo y’ɔngɛnɔngɛnɔ lo dihole dia mbɔɔsa oko oshikɔ wa wotsho. (Jni. 4:34) Akristo waki lo ntambe ka ntondo wakasambishaka l’ohetoheto, wakayaɛkɛka le Jehowa ndo wakayashikikɛ diaha mpekɔ. (Ets. 5:41, 42; 2 Kɔr. 4:1; 2 Tim. 4:17) Nkana yimba lo bɛnyɛlɔ dia ngasɔ, ayotokimanyiya dia sho ndjasɛdingola l’oyango wa ndowanya olimu aso w’ekila.
3. Lande na kahatahombe ntshimbatshimba dia nsala etshikitanu wahombama?
3 Lɔngɔsɔla awui wahombama: Lo mɛtɛ, honga dui dia dimɛna naka sho ndjaenda lo talatala ko sho minya yimba lo kɛnɛ kahalɔngɔswami. Sho koka nɔmba Jehowa dia tokimanyiya dia sho ndjasɛdingola shoamɛ ndo nsala etshikitanu wahombama. (Osam. 139:23, 24; Luka 11:13) Lam’ele etena kambotshikala kaya mondo ndo nsɛnɔ y’anto yekɔ lo waale, hatokoke ntshimbatshimba dia nsala etshikitanu wahombama.—1 Kɔr. 7:29; 1 Tim. 4:16.
4. Kakɔna kakomɛ onto laka washo lo Ɔtɛkɛta wa Nzambi ko nsala akambo lo yoho yɔtɔnɛ la kɛnɛ koshodinde?
4 Jehowa ndekaka mbɔsa lonto laso la l’etei k’otema leendande la nemɔ di’efula oleki ɛnamelo kaso ka demba. (1 Pet. 3:3, 4) Kakɔna kakomɛ onto laka washo lo Ɔtɛkɛta wa Nzambi ko nsala akambo lo yoho yɔtɔnɛ la kɛnɛ koshodinde? Nde mongaka “onto lakitanyiya ɔtɛkɛta, koko aha ɔnɛ loka ko mbohɛ, ndo nde ayonga l’ɔngɛnɔngɛnɔ lo nsala dui sɔ.” (Jak. 1:25) Ɔnkɔnɛ, tayonga l’ɔngɛnɔngɛnɔ ndo tayonga esambisha wa tomanamana nɛ dia “tekɔ lo nkɛnɛmɔla lotombo la Jehowa oko talatala.”—2 Kɔr. 3:18.