Kamba la jw.org l’esambishelo

Sitɛ kaso kekɔ ehomɔ k’ohomba efula katokimanyi dia dianganya lokumu l’ɔlɔlɔ polo “l’ahole woleki etale wa lo nkɛtɛ.” (Ets. 1:8) Efula k’ampokami aso haweye mbɔtɔ lo sitɛ jw.org vɔamɛ. Koko, vɔ koka ndjeya paka l’ɔkɔngɔ w’opadjudi ɔmɔtshi mbaɛnya.

Omendji weteta ɔmɔtshi akatelesharjɛ vidɛo yele l’ɔtɛ a dui ɔnɛ: Lande na mbeka Bible? lo telefɔnɛ kande ndo nde ndjɛnyaka lo diaaso tshɛ diakondjande. Ɛnyɛlɔ, etena katshɔnde l’esambishelo ka lo luudu la luudu, nde mbutɛka anto ɔnɛ: “Lekɔ lo tasawola l’anto lo tshena pe dia mbakimanyiya dia nkondja ekadimwelo lo ambola asato w’ohomba anɛ: Lande na kambolola andja ɔnɛ l’ekakatanu? Ngande wayonya Nzambi ekakatanu ɛsɔ? Ndo ngande wakokaso ndɔshana la wɔ l’etena kɛnɛ? Vidɛo ya mondo nyɛ kadimolaka ambola asɔ.” Nde minaka butɔ dia ndjiɛnya mbala kakɔ ɔtɔi ndo nde mendaka kɛnɛ kayosala ompokami ande. Anto efula hawonya washo oma lo vidɛo shɔ polo l’ekomelo nɛ dia yɔ kutolaka yambalo yawɔ. Oma laasɔ, ko omendji weteta mbutɛ ompokami ande ɔnɛ: “Wɛ mɛtɛ amboka dia wɛ koka nɔmba wekelo wa Bible l’Ɛtɛrnɛtɛ. Kakianɛ, layanga kɛnya lo tshena pe woho wasalema dui sɔ.” Naka ompokami ambetawɔ, ko nde mbɛnya woho wasalema wekelo lo nkamba la biukubuku Lokumu l’ɔlɔlɔ. Naka ompokami bu l’etena, ko nde mbokana la nde dia ndjosala dui sɔ mbala kayaye. Etena katshɔnde lo dihole diasondjawɔ eloko dia tomuya, nde salaka woho akɔ waamɛ l’onto ɔmɔtshi lodjashi suke la nde l’ɔkɔngɔ wa nsawola la nde oko ɔngɛnyi. Onde wɛ kambaka la jw.org l’esambishelo?