Yoho ya dimɛna ndo y’oyoyo ya nsala esambishelo ka lo sɛkɛ
1. Kakɔna kakeketshama tshumanelo diele la ahole weteta anto efula dia nsala?
1 Tshumanelo diele la ahole weteta anto efula keketshamaka dia nkongɛ esambishelo ka lo sɛkɛ, lo nkamba la mɛsa kana ɛngɔ kekina kanɛwɔ ekanda. Naka ɛngɔ kekina kanɛwɔ ekanda mbakamba la nyu, kete opandjudi ɔmɔtshi ayemala kana mbidjasɛ suke la tɔ. Koko, apandjudi ahende pombaka monga lam’ele mɛsa. Wanɛ wayemala l’ahole asɔ pombaka monga la waasaso, la lɔngɛnyi ndo mbelɛka anto. Naka onto ɔmɔtshi ambodja yimba lo kɛnɛ kanemi, kete opandjudi ɔmɔtshi l’atei awɔ koka ntatɛ nsawola la nde, ondo lo mombola ɔnɛ: “Onde wɛ atayambolaka kɛnɛ kata Bible lo dikambo nɛ?” Opandjudi okina kana ahende kokaka sambishaka lo tshakitudi etena kokawɔ sso lo diangɔ diakawane.
2. Kɔndɔla dui dimɔtshi diakasalema diɛnya ohomba wa nkamba la dibaya dianɛwɔ ekanda lo esambishelo ka lo sɛkɛ.
2 Anto efula wambeka Bible diɛsɛ la yoho y’esambishelo shɔ. Ombeki ɔmɔtshi wa lo kalasa y’adidi akafunde lo dikatshi dia nyanga Ɛmɛnyi wa Jehowa, koko nde kotana ndooko Mbalasa ka Diolelo. Lomingu lakayele, nde akɛnyi mɛsa wanɛwɔ ekanda suke la kalasa yawɔ. Wekelo wa Bible wakatatɛ ndo ɛlɔ kɛnɛ ombeki ɔsɔ aya opandjudi wambobatizama ndo ekɔ lo nsala yoho y’esambishelo shɔ ndamɛ.
3. Ngande wɔsa anto amɔtshi yoho y’esambishelo ka lo sɛkɛ?
3 Kadiyɛso kɛmɔtshi kakayasha lo yoho y’esambishelo ka lo sɛkɛ shɔ akate ate: “Anto amɔtshi memalaka la ɛngɔ kanɛwɔ ekanda dia mbɔsa ekanda weke katomba. Akina watokaka dikambo di’Ɛmɛnyi wa Jehowa ndooko lushi. Dimi mɛnaka dia anto efula koka sambishama oma lo yoho y’esambishelo nyɛ.” Kadiyɛso kekina akate ate: “Ɔnɛ mɛtɛ ekɔ yoho y’esambishelo ya dimɛna ndo y’oyoyo, nɛ dia anto efula kotɔmaka oya le yɛ oyadi kaanga hawoleke ndjasha.”
4. Lande na kele ekɔ ohomba kitshaka mɛsa kana ɛngɔ kekina kanɛwɔ ekanda lo dihole diakɔ diamɛ ndo wonya akɔ wamɛ lomingu tshɛ?
4 Ekɔ ohomba efula kitshaka mɛsa kana ɛngɔ kekina kanɛwɔ ekanda lo dihole diakɔ diamɛ, nshi yakɔ yamɛ ndo wenya akɔ wamɛ lomingu tshɛ. Laasɔ anto wayekɛ dia mɛnaka dihomɔ sɔ ndo vɔ mbeyaka ndjosukana dia mboka ambola kana dia ndjɔsa ekanda. Onde etshumanelo kanyu ambokongɛ esambishelo ka lo sɛkɛ? Naka eelo, kete ondo wɛ kokaka mbisha lonya lo yoho ya dimɛna ndo yonga l’etombelo w’amɛna efula shɔ ya “[n]sambisha Diolelo dia Nzambi.”—Luka 9:60.