Tokambe la wenya aso lo yoho yoleki dimɛna l’esambishelo
Ɛmɛnyi wa Jehowa waketsha wenya 1 945 487 604 l’esambishelo l’ɔnɔnyi w’olimu wa 2014 ndo ɔnɛ kele djembetelo ya shikaa yɛnya dui sɔ, nɛ dia takɔshi yɛdikɔ ya monga l’akambo efula wa nsala l’olimu wa Jehowa. (Osam. 110:3; 1 Kɔr. 15:58) Lam’ele, “Etena kambotshikala kambosusama,” onde ayokoka sho nkamba dimɛna la wenya aso dia nsambisha anto efula?—1 Kɔr. 7:29.
Dia sho ndjatshungolɛ etena dia nsambisha, nɔmbamaka nsala etshikitanu ɛmɔtshi. Ɛnyɛlɔ, naka wɛ aketshaka wonya ɔtɔi kana efula lo yoho mɔtshi y’esambishelo aha la ntɛkɛta kaanga l’onto ɔtɔi, onde wɛ hakoke nsala etshikitanu l’oyango wa ntana ndo nsambisha anto efula? Akambo tshikitana lo ndjela dihole la dihole. Koko, alako wayela anɛ koka kokimanyiya dia wɛ nkamba la wenya ayɛ dimɛna dia mbewɔ mbaetsha lo “lɔpɛpɛ.”—1 Kɔr. 9:26.
Esambishelo ka lo luudu la luudu: Aya ɛnɔnyi akumi, wele apandjudi waki la mbekelo ka tatɛka nshi yawɔ y’esambishelo la esambishelo ka lo luudu la luudu. Koko, lam’ele anto efula kambaka la yanyi, lande na kahatakoke mpemba nsambisha lo luudu la luudu l’ɔkɔngɔ wa midi kana la dikɔlɔ etena katanemawɔ la ngelo ndo kakɔkɔlawɔ alemba? La yanyi, esambishelo ka lo toshinga ndo ka l’ahole wasalawɔ okanda koka monga la etombelo w’amɛna.
Esambishelo ka lo sɛkɛ: Mɛsa ndo diangɔ dikina dianɛwɔ ekanda pombaka kitshamaka l’ahole w’eteta anto efula wele l’ɛtshi ka nkɛtɛ k’etshumanelo. (Enda Olimu aso wa Diolelo wa Ngɔndɔ k’esambele 2013, lk. 5.) Naka anto hawoyoleka mbeteta lo dihole diakasɔnama lo dikambo di’esambishelo ka lo sɛkɛ, kete Kɔmite k’olimu ka l’etshumanelo koka mbɔsa yɛdikɔ ya nsɛkɔla mɛsa ndo diangɔ dikina dianɛwɔ ekanda otsha lo dihole dikina di’eteta anto efula.
Waendelo w’eyoyo ndo ambeki wa Bible: Onde ayonga dimɛna wɛ monga la ekongelo ka salaka waendelo w’eyoyo ndo wekelo wa Bible etena kele toho tokina t’esambishelo bu l’etombelo w’amɛna? Ɛnyɛlɔ, naka esambishelo ka lo luudu la luudu mongaka la etombelo w’amɛna Lushi la samalo la pindju, onde wɛ hakoke ndjeka l’ambeki ayɛ l’ɔkɔngɔ wa midi kana la dikɔlɔ? Etena kasalawɔ waendelo w’eyoyo, onde apandjudi hawokoke kahana tolui tolui l’oyango wa vɔ nsambisha efula?
Kɛnɛ kele mɛtɛ ele, etena kadiaso wenya wakatetshisha l’esambishelo, sho mongaka l’ɔngɛnɔngɛnɔ lo mɛna etombelo w’amɛna wakongi l’olimu akɔ. Naka wɛ ambɛna dia yoho mɔtshi y’esambishelo bu l’etombelo w’amɛna lo wonya ɔmɔtshi shikaa, kete nkamba la yoho nkina. Lɔmba Jehowa “Owandji wa dinela” dia nde kosha ɛlɔmbwɛlɔ kande dia wɛ ndjatshungolɛ etena lo olimu w’esambishelo!—Mat. 9:38.