Onde wɛ amboyalɔngɔsɔla dikambo dia Eohwelo?

Tekɔ lo Ngɔndɔ ka Nisana 13, 33 T.D. Yeso akeye dia ɔsɔ mbaki otsho w’ekomelo wakandahombe mbetsha la angɛnyi ande wa ma ma la ntondo ka nde ndjakema. Nde akasale Dambo di’Elekanelo di’ekomelo kaamɛ la wɔ, ko akahɔhɔla dambo dikina di’oyoyo dielamɛ Dambo dia dikɔlɔ dia Nkumadiɔndjɔ. Lo mɛtɛ, dikambo di’ohomba sɔ diakahombe nɔngɔswama. Diakɔ diakandasha Petero nde la Joani ɔkɛndɛ wa nɔngɔsɔla diangɔ. (Luka 22:7-13) Ɔnɔnyi tshɛ ntatɛ oma laasɔ, ekɔ dui di’ohomba efula le Akristo tshɛ wakombola nsala Eohwelo dia nɔngɔsɔla dikambo sɔ. (Luka 22:19) Naa awui woleki ohomba wahombaso nɔngɔsɔla dikambo dia Eohwelo kayaye kayosalema lo Ngɔndɔ ka nɛi 3?

Woho wakoka dikumanyi ndjalɔngɔsɔla:

Nyoshikikɛ dia kana nyayosala lo Mbalasa ka Diolelo ko kana lo dihole dikina diakoka. Dihole sɔ pombaka monga dihole dieta hiɛlɛlɛ, diele l’ahole wa mbidjasɛ wayokoka l’anto ndo la osase. Nyokongɛ dia mbetɛ dihole diakɔ pudipudi la ntondo.
Nyɔsɔnɛ ɔtɛkɛtshi wa manamana, ɔnɔmbɔdi ndo anangɛso wahomba nsala dɔmbɛlɔ dikambo dia mapa la vinyɔ.
Naka tshumanelo efula diayosala Eohwelo lo Mbalasa ɔtɔi, kete diɔ pombaka nɔngɔsɔla akambo dimɛna dia mbewɔ efukutanu lo wɔtwɛlɔ kana l’otombelo w’anto ndo l’ahole wa mbɛkɛ mitutu kana akalo.
Nyɔsɔnɛ ndo nyokongɛ wanɛ wayolongola anto la wayetshetsha mapa.
Nyoyange mapa la vinyɔ yahombama, alɔnga w’akale, tɔvɛrɛ ta mbidja vinyɔ, mɛsa wa dimɛna ndo dihɔndɔ dia mɛsa.

Woho wakoka apandjudi ndjalɔngɔsɔla:

Yalɔngɔsɔla dia ndjasha efula l’okahanyelo w’akatshi wa leeta l’oya lo Eohwelo.
Sala listɛ l’ambeki wa Bible, ewotɔ ayɛ, asekayɛ wa la kalasa, asekayɛ wa l’olimu ndo anto akina weyayɛ dia ndjowaelɛ.
Adia ndo kana yimba la wadielo wa Bible wendana la Eohwelo.
Koma la wonya lo Eohwelo dia ndjolongola angɛndangɛnda.