Onde wɛ ekɔ lo ndjalɔngɔsɔla dikambo dia Eohwelo?

Dambo di’Elekanelo dia komelo dia Yeso diakahombe monga la kitshimudi y’ohomba efula. Lam’ele nde aki nsuke la mvɔ, nde akalɔngɔsɔla dia ndɛ dambo di’Elekanelo kaamɛ la apɔstɔlɔ ande ndo akɔtshiya dui di’oyoyo di’ohomba diahomba mbohɔmaka ɔnɔnyi la ɔnɔnyi, mbuta ate Dambo dia dikɔlɔ dia Nkumadiɔndjɔ. Ko nde akatome Petero la Joani dia tɔlɔngɔsɔla luudu. (Luk 22:7-13; enda osato wa lo lohoso.) Dui sɔ toholaka ohomba wa ndjalɔgɔsɔlaka lo Eohwelo ka ngɔndɔ ka sato 27. Etshumanelo mbeyaka mbɔsa tɛdikɔ tendana l’onto layosha sawo, woho wa nkondja mapa la vinyɔ ndo awui akina. Ko kakɔna kakokaso nsala dia ndjalɔngɔsɔla onto ndo l’onto lo dikambo dia Eohwelo?

Lɔngɔsɔla otema ayɛ. Adia ndo kanaka yimba la wadielo wa Bible wendana la Eohwelo. Ekongelo koka tanema lo Tɔsɛdingolake Afundelo lushi la lushi. Apandisɛ B12 wele lo Bible–Ekadimwelo k’andja w’oyoyo, kambovusɔma wekɔ la ekongelo kɛnya awui wakete. (Enda nto Dikatshi dia Lɔsɛnɔ ndo olimu aso w’Okristo dia Ngɔndɔ ka nɛi 2020.) Ase nkumbo koka ntana awui wa mbeka etena kasalawɔ ɔtɛmwɛlɔ awɔ wa lo nkumbo wɛnya ohomba w’oshinga w’etshungwelo lo nsala eyangelo lo Index des publications Watch Tower kana Dibuku di’eyangelo di’Ɛmɛnyi wa Jehowa.

Elɛ anto akina oya lo Eohwelo. Yasha tshɛ l’okahanyelo w’akatshi wa leeta l’oya lo Eohwelo. Kanyiya dikambo di’anto wakokayɛ mbelɛ, ɛnyɛlɔ anto wokoyotshɔka dia tembola, ambeki wa Bible w’edjedja, anto weyaso ndo ewotɔ aso. Dikumanyi pombaka mbelɛ wanɛ wambɔla lo nyuma. Ohɔ dia naka onto ɔmɔtshi hadjasɛ lo ɛtshi kanyu ka nkɛtɛ, kete wɛ koka nyanga wonya ndo dihole diayosalema Eohwelo lo dihole diodjashinde lo klikɛ lam’ofundjiwɔ ɔnɛ AWUI WENDANA LA SO la diko ka jw.org, ko tshɔ lam’ofundjiwɔ ɔnɛ “Eohwelo.”

Ko awui akɔna akina wakokaso nsala l’oyango wa ndjalɔngɔsɔla?