Toyalɔngɔsɔlɛ lo dikambo dia Eohwelo l’etema w’ɔngɛnɔngɛnɔ
1. Nshi ya Eohwelo toshaka diaaso diakɔna?
1 Eohwelo ka nyɔi ka Yeso kayosalema Lushi la hende, Ngɔndɔ ka sato 26 kayotosha diaaso dia dimɛna efula dia sho ngɛnangɛna lo kɛnɛ kakasale Nzambi dia tosha panda. (Is. 61:10) Kaanga la ntondo ka Eohwelo kakɔ koka, monga l’otema w’ɔngɛnɔngɛnɔ ayotokimanyiya dia sho mbeya ndjalɔngɔsɔla dimɛna. Lo ngande?
2. Kakɔna katotshutshuya dia ndjalɔngɔsɔla dikambo dia Eohwelo?
2 Toyalɔngɔsɔlɛ dia tenda kɛnɛ kayosalema: Dambo dia dikɔlɔ dia Nkumadiɔndjɔ diekɔ ohomba efula, ndo hatohombe ntshɔ tsho dia tenda kɛnɛ kayosalema. Dui sɔ tɔlɔmbaka dia sho ndjalɔngɔsɔla dimɛna la ntondo diaha sho ndjohandja kaanga dui ɔtɔi. (Tuk. 21:5) Wonya ndo dihole diayosalema dikambo sɔ pombaka shikikɛma la ntondo ndo mapa la vinyɔ pombaka tanema la ntondo. Dihole diayosalema losanganya lɔsɔ pombaka nɔngɔswama dimɛna. Ɔtɛkɛtshi pombaka tayalɔngɔsɔdi dimɛna la ntondo, wanɛ wayonga l’ɔkɛndɛ wa nongola anto ndo ampokami akina pombaka ndjalɔngɔsɔla dimɛna. Aha la taamu, akambo asɔ tshɛ wokosalemaka ndo sho pombaka mbasala aha la lonyangu. Lowando lele la so l’olambo w’etshungwelo mbatotshutshuya dia ndjalɔngɔsɔla dimɛna lo dikambo dia Eohwelo kakɔ.—1 Pet. 1:8, 9.
3. Ngande wakokaso nɔngɔsɔla etema aso dikambo dia Dambo dia dikɔlɔ dia Nkumadiɔndjɔ?
3 Tɔlɔngɔsɔlɛ etema aso: Ekɔ nto ohomba sho nɔngɔsɔla etema aso dia sho nshihodia kitshimudi yele la Eohwelo ka nyɔi ka Yeso le so. (Ez. 7:10) Dia nkotsha oyango ɔsɔ, sho pombaka ndjatshungolɛ etena ka mbadiaka ɛkɔndɔ wa lo Bible wendana l’Eohwelo ndo kanaka yimba lo kɛnɛ kendana la nshi y’ekomelo ya lɔsɛnɔ laki Yeso lanɛ la nkɛtɛ. Nkana yimba lo woho waki Yeso la yimba ya ndjahombia, ayototshutshuya dia mbokoya ɛnyɛlɔ kande.—Ngal. 2:20.
4. Wahɔ akɔna wamboyokondja diɛsɛ l’olambo w’etshungwelo waleka kosha ɔngɛnɔngɛnɔ?
4 Nyɔi ka Kristo akayindja lowandji laki Jehowa la l’andja w’otondo ndo kakatotshungola oma lo pɛkato la nyɔi. (1 Jni. 2:2) Tɔ kakatodiholɛ mboka dia sho monga la diɔtɔnganelo dia dimɛna la Nzambi ndo tɔ katɔla otsha lo lɔsɛnɔ la pondjo. (Kɔl. 1:21, 22) Nyɔi kakɔ tokimanyiyaka nto dia sho nsɛna lo yoho yɔtɔnɛ la ndjakimɔ kaso le Jehowa ndo ntshikala nge oko ambeki wa Kristo. (Mat. 16:24) Etena kayalɔngɔsɔlaso ndo kakongɛɛso dia ndjɔtɔ lo Eohwelo ka nyɔi ka Yeso, nyɛsɔ sho tshɛ totetemale mfudia ɔngɛnɔngɛnɔ aso.