Kamba Dimɛna la Wenya Ayɛ
1 Sho tshɛ tekɔ la lofulo lamɛ la wenya lomingu tshɛ. Yema ya wenya yetshaso l’esambishelo ka lokumu l’ɔlɔlɔ ekɔ la nɛmɔ di’efula nɛ dia takawaetsha l’olimu washimbɛ nsɛnɔ y’anto. (Romo 1:16) Sho mɛnyaka woho wɔsaso olimu ɔsɔ la nɛmɔ lo woho wayalɔngɔsɔlaso dimɛna otsha l’olimu akɔ, lo komaka la wonya lo nsanganya y’otsha l’esambishelo ndo lo tshɔka esadi otsha lo mbilo kaso. Ndeka dimɛna sho sambishaka esadi lo dihole dia tshimbatshimba lo losanganya l’otsha l’esambishelo. Lam’ele Jehowa akatetsha ɔnɛ ‘ɛngɔ tshɛ kekɔ l’etena katɔ shikaa’ sho la dia kamba dimɛna la wenya wakatombe dikambo di’esambishelo.—Und. 3:1.
2 Kongɛ Wenya Ayɛ la Lomba: Sho kondjaka ɛtshɔkɔ efula etena kashikimalaso l’ekongelo katosha diaaso dia sambishaka mbala la mbala. Nshi tshɛ, etombelo w’ɔlɔlɔ wakondjaso l’olimu aso la dia mbɛdima la wenya wetshaso l’esambishelo. Ko naka tayotshikitanya ekongelo kaso yema, onde hatotoleka kondja wenya wa tombaka l’olimu w’esambishelo oka? Oko ɛnyɛlɔ: l’ɔkɔngɔ wa kahɛ anto periodikɛ Lushi la Lomingu, onde hatokoke mbɔsa yema ya wenya nto dia tênda kânga anto angana ato? Ko naka taketshisha tshanda mɔtshi l’olimu w’esambishelo Lushi la Samalo, onde hatokoke mbetsha yema ya wenya nto lo membola anto kana mbeka la wɔ Bible? Lâdiko dia sho sambisha luudu la luudu, onde hatokoke mbɔsa yema ya wenya dia sambisha lo toshinga? Lo toho tɔsɔ kana tokina mbakokaso pamia olimu aso.
3 Lam’eso l’esambishelo, sho kokaka shisha wenya aso w’oshinga wolo naka hatendi ɔlɔlɔ. Mɛtɛ, etena kele yanyi efula, naka sho momuya yema kete tayokondja wolo wa tetemala la sambisha. Koko, aha tɛkɔya nɛ dia aha mbala tshɛ mbatondongaka ohomba wa pembola esambishelo ko momuya.
4 Lo ɛnɔnyi ɛnɛ wêke kambeta, aki wolo efula dia tana anto lawakawɔ. Ɔnkɔnɛ, dia ndɔshana la dikambo sɔ, apandjudi efula wakɛnyi ɔlɔlɔ salaka esambishelo ka soko la soko lo wenya wotshikitanyi. Lande na kahayahembe sambisha la dikɔlɔ dia yɔɔ kana kam’adja wonya na?
5 Hatonga dimɛna efula, naka tayotatɛtaka sawo wonya watatasambisha lo shinga. Omalɔkɔ, paka sho kakitɔnaka ndo tatɛ sawola l’anto. Yoho shɔ mbahatatoshisha wenya oshishashisha ndo mbayotokondja ɔngɛnɔngɛnɔ w’efula oma l’olimu aso.
6 Tokambe la Waaso wa Sambisha: Lam’akatɛ womoto ɔmɔtshi Ɔmɛnyi wa Jehowa ɔnɛ awui asɔ hawɔngɛnyangɛnya, kadiyɛso akawombola dia kana onto okina ekɔ lo luudu lakoka sawola la nde. Ko nde akayosawola la kanga ngelo la pami lambodiɛnɛ la hemɔ ɛnɔnyi efula ndo latshikala paka lo mbeto oto. Nde akangɛnangɛna efula lo mboka elongamelo kɛnɛ kasha Dui dia Nzambi ko nde akoke ɔlɔ wa lɔsɛnɔ nto. Kombeta edja, nde akayɔkɔlɔnganaka, ndo ndjomɛ ndja lo nsanganya lo Mbalasa ka Diolelo ndo mbewoya anto akina elongamelo k’oyoyo kambondoyoshola!
7 Kadiyɛso kɛmɔtshi k’osekaseka akakambe l’alako wakashama w’ɔnɛ ekɔ ɔlɔlɔ tshɔka l’esambishelo la ntondo ka wonya wa Wekelo wa Dibuku koka. Lo soko dia ntondo, nde akatani osekaseka ɔmɔtshi w’ɛnɔnyi 13 wakôlongamɛ la yambalo tshɛ ndo akɔshi ekanda aso. La wedi a pindju, kadiyɛso kɛsɔ akɛnyi yana yakɔ la kalasa. Yema tshitshɛ l’ɔkɔngɔ, kadiyɛso akɔsɛngɔla dia vɔ tatɛ mbeka Bible ko nde aketawɔ.
8 Tɔshi Wenya Wetshaso l’Esambishelo la Nɛmɔ: Esambishelo ka mbala la mbala tokimanyiyaka dia sho ndowanya akoka aso wa sambisha lokumu l’ɔlɔlɔ. Onde wɛ kokaka ndowanya akoka ayɛ wa tatɛ sawola l’onto lo soko lo kamba la mbɔtwɛlɔ ka dimɛna efula? Onde wɛ kokaka koma ombetsha wa manamana lam’etshayɛ onto Bible la ngelo? Lo ntsha ngasɔ, wɛ ayokamba dimɛna la wenya ayɛ ndo ayokondja etombelo w’ɔlɔlɔ l’olimu ayɛ.—1 Tim. 4:16.
9 Lam’ele ‘etena kambotshikala kambosusama,’ sho la dia mangema l’elimu w’Akristo. (1 Kor. 7:29) Tetsha olimu w’esambishelo lo dihole dia ntondo. Nyɛsɔ toyakimɔ l’ohetoheto tshɛ l’esambishelo. Wenya ekɔ ɛngɔ ka dimɛna efula kakatosha Jehowa. Teyake kamba nshi tshɛ la wenya aso ndo tatashishake oshishashisha.
[Caption on page 4]
[Box on page 4]
Toyele Alako Anɛ:
◼ Kôkomake la wonya lo nsanganya y’otsha l’esambishelo.
◼ Tosambishake lo tolui ta totshitshɛ.
◼ Tatotshimbatshimbake dia ntshɔ otsha lo mbilo kaso.
◼ Tshɔka lo mbilo kayɛ etena keyɛ ɔnɛ anto efula wekɔ la ngelo.
◼ Sambishaka wɛmɛ naka ndoko wâle.
◼ Totshimbatshimbake dia membola anto lo mbilo kayɛ l’ɔkɔngɔ wa wɛ sambisha lo soko la soko.
◼ Tetemala la sambisha naka anto amɔtshi wa l’olui anyu wakatshimbatshimba lo soko dimɔtshi.
◼ Naka kokaka, toomuyake ndekana wonya wa tango.