Teeke akambo oma le apandjudi wa tomanamana

Sho mɛtɛ mbɔsaka la nɛmɔ apandjudi wa tomanama wa l’etshumanelo. Amɔtshi wekɔ lo kambɛ Jehowa la kɔlamelo l’edja k’ɛnɔnyi efula. Akina koka monga ko wambookondjaka akoka w’amɛna edja efula l’olimu w’esambishelo. Apandjudi asɔ wambɛnaka woho walɔmbɔla Yeso etshumanelo k’Akristo lo nshi y’ekomelo nyɛ lo mpamiya olimu w’esambishelo ndo wa mbetɛ anto ambeki. (Mat. 28:19, 20) Lo ndjasha l’olimu ɔsɔ, vɔ wakalongola “wolo woleki wɔnɛ wokongaka l’onto” etena kakawahomana l’ekakatanu ndo la ehemba. (2 Kɔr. 4:7) Tekɔ l’awui efula wa mbeka oma le apandjudi asɔ. Etena kakondjawɔ diaaso, vɔ ngɛnangɛnaka mbetsha anto akina kɛnɛ kakaweke. (Osam. 71:18) Diakɔ diele, sho pombaka nyanga waaso wa mbeka awui oma le wɔ. Ngande wakoka dui sɔ salema?

Lo esambishelo. Dia nkondja etombelo w’ɛlɔlɔ l’esambishelo, apandjudi w’eyoyo kana wa tomanamana wekɔ l’ohomba wa ndowanyema. Yoho ya dimɛna ya nsala dui sɔ ele lo nsɛdingola woho wasambisha apandjudi wambotshunda. (Enda sawo diele lo Tshoto y’Etangelo ya Ngɔndɔ ka hende 15, 2015, diele l’ɔtɛ a dui ɔnɛ: “Tetemala monga la ohetoheto l’esambishelo”, odingɔ wa sato l’ɔtɛ a dui wata ɔnɛ: “Kimanyiya wanɛ wahataleke mpokɔ akambo.”) Naa wahɔ wamboyokondja lo ntomba l’apandjudi asɔ l’esambishelo?

Onde wɛ koka nɔmba opandjudi ɔmɔtshi wa manamana dia ntomba kaamɛ la yɛ l’esambishelo? Naka opandjudi akɔ ekɔ la ɛkɔmɔ, kete ondo wɛ koka nɔmbɔlaka mbala la mbala wekelo wa Bible lakande. L’ɔkɔngɔ wa wekelo, lɔmba opandjudi akote kɛnɛ kakandɛnyi ndo akosha alako.

Etshaka wenya kaamɛ la wɔ: Yanga dia mbeya apandjudi wa tomanamana lo mbetshaka wenya kaamɛ la wɔ. Elɛ ɔmɔtshi lo ɔtɛmwɛlɔ anyu wa lo nkumbo ndo kɔnyande awui amɔtshi. Naka opandjudi akɔ ekɔ la ɛkɔmɔ, onde hanyokoke nkongɛ dia tosala ɔtɛmwɛlɔ wa lo nkumbo lakande? Yanga dia mbeya woho wakandeye akambo wa mɛtɛ? Naa ɛtshɔkɔ wamondokondja? Ehamelo akɔna wamondɛna lo ngelo kanyu? Ɔngɛnɔngɛnɔ akɔna wamondotana lo kambɛ Jehowa?

Onga la eokelo ndo la ekanelo k’ɔlɔlɔ lo ekimanyielo kakokawɔ kosha. Oko weso sho tshɛ, mbele ndo apandjudi wambokamba edja wekɔ la weshasha wotshikitanyi l’olimu w’esambishelo. (Rɔmɔ 12:6-8) Amɔtshi waya esombe ndo kɛsɔ hawasha diaso dia vɔ mbetsha wenya efula kaamɛ la so. Koko, sho koka mbeka awui efula oma le wɔ nɛ dia diewo diaya la wɔ lo kambɛ Jehowa la kɔlamelo.