Totetemale ndjasha dia mbetɛ anto ambeki
1. Kakɔna kahombama dia anto shimbamɛ?
1 Alapɔlɔ w’olimu wa lo 2014 mɛnyaka ohetoheto wele l’ekambi wa Nzambi ndo eshikikelo kele la wɔ dia nsambisha lokumu l’ɔlɔlɔ la Diolelo. (Mat. 24:14) Diɛsɛ la esambishelo ka lo luudu la luudu, okahanyelo wa traktɛ la akatshi wa leeta ndo esambishelo ka lo sɛkɛ, tekɔ lo nsambisha anto efula losango l’oma lo Bible oleki woho wakatasambishaka ntondo. Koko, dia anto shimbamɛ, sho pombaka mbakimanyiya dia vɔ nkoma ambeki wa Yeso lo mbeka la wɔ Bible.—1 Tim. 2:4.
2. Naa ambola wakokaso ndjaoka wayotokimanyiya dia mongaka nshi tshɛ suke dia mbeka l’anto Bible?
2 Tongake nshi tshɛ suke dia mbeka l’anto Bible: Etena kɛnya onto nsaki, onde wɛ salaka la wolo dia nkondja adrɛsɛ ande ndo nkalola aha la tshimbatshimba l’oyango wa ntatɛ wekelo wa Bible? Naa mbala k’ekomelo kakayɛnya onto woho wekaso l’anto Bible etena kakayahomana la nde mbala ka ntondo? Naa mbala k’ekomelo kakayeke Bible l’anto watoyoshaka periodikɛ? Onde wɛ ambɛnyaka vidɛo yele l’ɔtɛ a dui ɔnɛ: Lande na mbeka Bible? ndo Ngande wasalema wekelo wa Bible? le asekayɛ wa l’olimu, wa la kalasa, asukanyi, ewotɔ ndo anto akina weyayɛ? Etena kakambayɛ la dibaya dianɛwɔ ekanda, onde wɛ mbitɛka anto wɔsa ekanda aso ɔnɛ sho mbekaka l’anto Bible ofele?
3. Dia mbetsha akambo wa mɛtɛ lo yoho ya dimɛna, kakɔna kalɔmbama?
3 Ekimanyelo k’oma le Jehowa ndo Yeso: Lo etatelo ka didjango diande dia ‘mbetɛ anto ambeki,’ Yeso akakambe la tshɛkɛta “nyotshu” dia mɛnya ɔnɛ sho pombaka mbidja weolo ndo mbisha ɛnyɛlɔ. Koko, nde kototshika shoamɛ nɛ dia nde akatolake dia nde ayongaka kaamɛ la so. (Mat. 28:19, 20) Laadiko dia laasɔ, Jehowa akatosha nyuma kande k’ekila mbidja ndo dihomɔ kaamɛ l’olowanyelo weso l’ohomba dia mbetsha anto akambo wa mɛtɛ. (Zek. 4:6; 2 Kɔr. 4:7) Sho koka nɔmba dia nkondja “nsaki ndo wolo wa” nkamba olimu w’ohomba efula.—Flpɛ. 2:13.
4. Lande na kahombaso ndjasha dia mbetɛ anto ambeki?
4 Nsambisha lokumu l’ɔlɔlɔ la Diolelo toshaka ɔngɛnɔngɛnɔ w’efula. Koko, ɔngɛnɔngɛnɔ aso fulaka etena ketshaso onto akambo wa mɛtɛ ndo kookimanyiyaso dia nde monga la so lo ‘mboka ka tshitshɛ katɔla lo lɔsɛnɔ la pondjo.’ (Mat. 7:14; 1 Tɛs. 2:19, 20) Kɛnɛ koleki ohomba ele, etena katetemalaso ndjasha dia mbetɛ anto ambeki, sho ngɛnyangɛnyaka Jehowa ɔnɛ lele “nde halange di’onto ɔmɔtshi ndanyema, koko nde nangaka dia anto tshɛ nkondja diaaso dia ndjatshumoya.”—2 Pet. 3:9.