Ndjalɔngɔsɔla ekɔ sheke ya sala waendelo w’eyoyo w’amɛna
1. Lo yoho yakɔna yakahombe olimu w’esambishelo wa Akristo wa ntondo pama?
1 Yeso akalɔngɔsɔla ambeki ande dimɛna dimɛna dia vɔ monga esambisha wa tomanamana wa “lukumu l’ololo la diulelu.” (Mat. 4:23; 9:35) Yeso akawalowanya etena kakawasambishaka paka la Palɛstinɛ. Koko, la ntondo ka nde ntshɔ l’olongo, Yeso akate dia esambishelo k’Akristo kakahombe pama polo lo yɛdikɔ ya ‘mbetɛ anto wa lo wedja tshɛ ambeki.’—Mat. 28:19, 20.
2. Kakɔna kahombaso sala dia kitanyiya didjango diaki Yeso dia ‘mbetɛ anto ambeki’?
2 Olimu ɔsɔ mendanaka la kalolaka mbala la mbala le wanɛ wakɛnya nsaki lo lokumu l’ɔlɔlɔ la Diolelo diaki Nzambi ndo mbaetsha kɛnɛ tshɛ kakadjanga Kristo. Dia sala waendelo w’eyoyo w’amɛna wa ngasɔ, sho pombaka ndjalɔngɔsɔla dimɛna.
3. Kakɔna kakokaso sala kânga mbala ka ntondo kahomanaso l’onto dia ndjosala wendelo w’oyoyo?
3 Totakonge akambo la ntondo: Apandjudi amɔtshi salaka la wolo dia monyiya dimbola dimɔtshi l’ekomelo ka sawo mbala ka ntondo kahomanawɔ l’onto ko oma lâsɔ mbolaka dia kalola ndjowenda dia ndjɔkɛtshanya okadimwelo wa dimbola diakɔ. Vɔ wambɛna dia tɛkɛta awui wele lo dibuku Bible etshatɔ etena kasalawɔ waendelo w’eyoyo mbâkimanyiyaka dia vɔ tatɛ wekelo wa Bible mbala kakɔ ɔtɔi.
4. Lande na kahatahombe konga dia paka tambolongola periodikɛ y’eyoyo ko sho ndjosala waendelo w’eyoyo?
4 Woho wongaso la periodikɛ ɔtɔi ɔtɔi lo ngɔndɔ dia mbisha anto halembetshiya ɔnɛ sho pombaka konga edja ndo etena kayotolongola periodikɛ ya ngɔndɔ kayaye dia sho kalola dia tosala waendelo w’eyoyo. Sho kokaka nomialomia nsaki k’onto lo tɛkɛta awui wele lo periodikɛ kele la nde.
5. Monga la oyango shikaa lo yimba ekɔ la wahɔ akɔna?
5 Tonge la oyango: La ntondo ka wɛ tosala wendelo w’oyoyo, ɔsa minitɛ ngana dia mvusola awui wakayafunde ndo dia wɛ shikikɛ kɛnɛ kalangayɛ sala. Ɛnyɛlɔ, tɛkɛta dui dimɔtshi di’oma lo okanda wakayotshikɛ. Kana tshikɛnde okanda okina wɔtɔnɛ la dui diakanyakɛtshanya mbala ketshi. Naka wɛ akoke dimbola mbala ketshi, kete oyango ayɛ wayonga mɛtɛ wa kadimola dimbola diakɔ. Etena kalembetshiyayɛ divɛsa dimɔtshi dia lo Bible diatɛkɛta dia dui diakɛtshanyanyu, sala la wolo dia mbadia divɛsa diakɔ oma lo Bible.
6. Naa oyango wele laso etena kasalaso waendelo w’eyoyo?
6 Oyango aso woleki woke: Lo mɛtɛ, oyango aso ele wa tatɛ mbeka Bible l’onto. Ɔnangɛso ɔmɔtshi akalɔmbɛ onto ɔmɔtshi dia mbeka lande Bible lo wendelo w’oyoyo, koko nde akatone. Ɔnangɛso akakalola la periodikɛ y’eyoyo ndo akawotɛ ate: “Tekɔ lo takadimola dimbola dimɔtshi di’oma lo Bible diayaoka anto ɛlɔ kɛnɛ.” L’ɔkɔngɔ wa pami kakɔ mbokadimola, ɔnangɛso akadia divɛsa dimɔtshi dia lo Bible ndo odingɔ w’oma lo dibuku dimɔtshi diakamba laso dia nɔmbɔla wekelo wa Bible wakɔtɔnɛka la divɛsa diakɔ. Dui sɔ diakakonya dia vɔ tatɛ mbeka Bible.
7. Ngande wele ndjalɔngɔsɔla dimɛna akakokimanyiya dia tatɛ wekelo wa Bible?
7 Sunganaka mɛtɛ dia sho mbɔsaka etena ka ndjalɔngɔsɔla dia tosala waendelo w’eyoyo! Lo sala ngasɔ, tayonga l’ɔngɛnɔngɛnɔ ndo la diɛsɛ dia kimanyiya ‘anto wakoka’ dia vɔ mbɔtɔ lo mboka ka lɔsɛnɔ.—Etsha 13:48.