Ekadimwelo Lo Ambola anyu

◼ Onde apandjudi koka nkamba la Ɛtɛrnɛtɛ lo yoho yamboleka dia nsambisha kana mbeka Bible l’anto wa lo wedja ekina?

Apandjudi amɔtshi wakakambe la Ɛtɛrnɛtɛ dia mbeka l’anto Bible lo wedja wele olimu aso wakasekɛma kana lɛnɛ ele apandjudi yema tshitshɛ. Lo ahole amɔtshi, etombelo w’ɛlɔlɔ wakonge. Koko, ekɔ waale efula etena kayasha apandjudi lo otomanelo wa waa mesajɛ kana lo ɔkɛtshayelo wa l’Ɛtɛrnɛtɛ l’anto wa lo wodja okina. (Enda Olimu aso wa Diolelo wa Ngɔndɔ k’esambele 2007, lɛkɛ 3.) Kaanga mbele oyango ele wa nsambisha anto w’etema ɛlɔlɔ losango la Diolelo, ɔkɛtshanyelo wa ngasɔ koka nkonya ɔnangɛso kana kadiyɛso le anto wa kɔlɔ mbidja ndo waa apɔsta. (1 Kɔr. 1:19-25; Kɔl. 2:8) Laadiko wa laasɔ, lo wedja wele olimu aso sekɛma, ewandji wa lɛɛta koka sɛdingola mikanda. Dui sɔ koka mbidja anangɛso l’akadiyɛso wa lo wedja akɔ lo waale. Ɔnkɔnɛ, apandjudi hawokoke ntshɔ lo Ɛtɛrnɛtɛ dia nyanga anto wa lo wodja okina dia mbaasambisha lokumu l’ɔlɔlɔ.

Onyake paka ɛlɔmbwɛlɔ koshami oma le filialɛ kanyu, ko naka tambosambisha lo tshakitudi onto ɔmɔtshi latembola oma lo wodja okina, tatolomialomiake nsaki kande l’ɔkɔngɔ wa nde nkalola lakande. Kɛnɛ kakokaso nsala ele, sho koka mbɛnya woho wakokande nkamba la jw.org dia nde mbeya awui efula kana sho koka mbɛnya woho wakokande mɛnana la filialɛ ka lo wodja wende. Lo mɛtɛ, lo wedja ɛmɔtshi Mbalasa ya Diolelo bu. Ko naka nde kombolaka dia Ɛmɛnyi wa Jehowa djowembola lo dihole diende, sho koka ndodia fɔrmilɛrɛ Veuillez suivre l’intérêt (S-43) ndo mbisha sekeletɛlɛ ɔnɛ layokilodia lo nkamba la jw.org. Bɛtɛlɛ kalɔmbɔla olimu lo wodja wadjasɛ onto lɛnyisa nsaki mbeeya diaaso ndo mbakoka dia mbisha ekimanyielo ka lo nyuma. Enda Olimu aso wa Diolelo wa Ngɔndɔ ka samalo 2014 lɛkɛ 7 ndo Olimu aso wa Diolelo wa Ngɔndɔ ka dikumi l’ɔtɔi 2011 lɛkɛ 2.

Naka onto lembolaso nshi nyɛ ambonɔ lo wodja okina kana naka tekɔ lo mbeka Bible nshi nyɛ l’onto la lo wodja okina lele sho mbeeyaka tsho paka oma lo tshimbo y’Ɛtɛrnɛtɛ, kete sho pombaka ndjela ɛlɔmbwɛlɔ koshami ladiko. Koko, sho koka ntetemala mpamia nsaki kele l’onto polo nde ambɛnana la apandjudi wa lo dihole diende. Aha la taamu, naka onto ekɔ lo mbidjasɛ lo wodja wele olimu aso sekɛma, kete pombaka monga la yeewo y’efula lo ɔkɛtshanyelo w’awui wa lo Bible lo tshimbo ya mukanda, telefɔnɛ kana diangɔ dikina.—Mat. 10:16.