Ekadimwelo Lo Ambola Anyu
◼ Ahomba ndodia ɛtshi ka dikatshi kalɔmbawɔ adrɛsɛ w’onto kele l’ekomelo ka periodikɛ kana adrɛsɛ w’Ɛtɛrnɛtɛ?
Mbala efula ekanda aso wekɔ la ɛtshi ka dikatshi l’ekomelo kakoka onto ndodia ndo ntomɛ Bɛtɛlɛ dia nɔmba ekanda kana nɔmba dia Ɔmɛnyi wa Jehowa ɔmɔtshi ntshɔ dia towembola. Lâdiko dia lâsɔ, anto kokaka nkamba la sitɛ kaso k’Ɛtɛrnɛtɛ www.watchtower.org dia nɔmba dia onto ɔmɔtshi ndjeka lawɔ Bible. Dihɔmɔ sɔ diambokimanyiya anto efula dia mbeka akambo wa mɛtɛ. Koko, ekakatanu wakatombe etena kakakambe apandjudi la dihomɔ sɔ dia nɔmbɛ ewotɔ awɔ kana anto akina ekanda kana di’onto ɔmɔtshi ntshɔ dia towaembola.
Anto amɔtshi wele Bɛtɛlɛ akâtomɛ ekanda aha la vɔ nɔmba wakakiyana lo mbɔsa di’ɔnɛ okongamelo aso ekɔ lo mbahɛnyahɛnya ndo wambofundaka nkombo yawɔ lo listɛ dia mbatomɛka ekanda la wolo. Apandjudi amɔtshi wakawatomɛ mikanda dia vɔ ntshɔ dia tembola anto amɔtshi waki kɔnɔmba ekanda aso wakatongaka la sɔnyi etena kakatowaomalɛka anto asɔ. Ɔnkɔnɛ, onto lakɛnya nsaki ndâmɛ mbahomba nɔmba lo sitɛ kaso k’Ɛtɛrnɛtɛ kana ndodia dikatshi dialodiawɔ dia nɔmba ekanda kana di’onto ndjowenda, koko aha apandjudi mbahomba nsala dui sɔ dia wahɔ w’anto akina. Naka Bɛtɛlɛ ambeya dia opandjudi mbakalodia dikatshi sɔ dia wahɔ w’anto akina, kete Bɛtɛlɛ hatetawɔ kɔmandɛ kɛsɔ.
Ko ngande wakokaso nkimanyiya owotɔ aso kana onto ɔmɔtshi leyaso lo nyuma? Naka wɛ nangaka dia nde nkondja ekanda, lande na kahayotomɛwɔ mbala kakɔ ɔtɔi oko woshasha? Naka nde akɛnya nsaki ndo nangaka dia Ɔmɛnyi wa Jehowa ɔmɔtshi ndjowenda ko wɛ heye woho wa mbɔtɔnɛ la dikumanyi dia l’etshumanelo ka lo ngelo kende, kete wɛ pombaka ndodia fɔrmilɛrɛ Veuillez suivre l’intérêt (S-43), ko mbisha sekeletɛlɛ ka l’etshumanelo kayɛ layɔsɛdingola ko nde tomɛ Bɛtɛlɛ. Koko naka onto lakɛnya nsaki ɔsɔ ekɔ lo lokanu, lo mvudu yalamawɔ anto wakasale akambo wa kɔlɔ efula, kana lo lopitadi la lo wodja okina, kete tofundɛke Bɛtɛlɛ dia dikambo diande. Koko, wɛ kokaka mbokeketsha dia nde nyanga woho wa ɔnangɛso ɔmɔtshi ndjowembola kana nde ndamɛ fundɛ Bɛtɛlɛ.