Sala kɛnɛ kahombama aha la ntshimbatshimba

Ntatɛ lam’akatombe sitɛ kaso k’Ɛtɛrnɛtɛ, lofulo l’anto walɔmba wekelo wa Bible lɔkɔ lamboleka mfula. Anto akina wekɔ lo ntetemala nɔmba wekelo ɔsɔ diɛsɛ la yoho y’oyoyo ya esambishelo ka lo sɛkɛ. Kɔmite ka filialɛ salaka kɛnɛ kahombama aha la ntshimbatshimba. Ɛnyɛlɔ, naka onto ambɔlɔmba wekelo lo jw.org, kete mbala efula dikumanyi diele l’ɛtshi ka nkɛtɛ kɛnyisha onto nsaki nongolaka nɔtɛ k’oma le Bɛtɛlɛ l’ɔkɔngɔ wa nshi hiende tsho. Koko, alapɔlɔ w’oma lo bɛtshi dia nkɛtɛ mɛnyaka di’anto amɔtshi walɔmba wekelo wa Bible komembɔma l’edja ka mingu efula. Ngande wakokaso nshikikɛ ɔnɛ onto akɔ ambokondja ekimanyielo la ntondo ka nsaki kande mbɔla?—Makɔ 4:14, 15.

Naka onto lahadjasɛ lo ɛtshi kanyu ka nkɛtɛ ambɛnya nsaki, kete aha la tshimbatshimba nyolodia fɔrmilɛrɛ Veuillez suivre l’intérêt (S-43), ko mbisha sekeletɛlɛ la ntondo ka lushi lanyu la losanganya layelana koka. L’ɔkɔngɔ wa lushi ɔtɔi kana hiende, sekeletɛlɛ pombaka tomɛ etshumanelo kendana la dui sɔ kana Kɔmite ka filialɛ lo nkamba la adrɛsɛ w’etshumanelo wa jw.org. Dikumanyi pombaka mbɔtɔka lo adrɛsɛ ɔsɔ mbala la mbala. Naka vɔ wambolongola nɔtɛ kɛnya dia onto ɔmɔtshi ekɔ l’ohomba w’opandjudi ɔmɔtshi ntshɔ towembola, vɔ pombaka mboyanga aha la ntshimbatshimba. Opandjudi tshɛ wayolongola ɔkɛndɛ ɔsɔ pombaka mbetsha dui sɔ lo dihole dia ntondo. Naka onto bu la ngelo, ondo wɛ koka mbotshikɛ nɔtɛ kɛmɔtshi kaamɛ la adrɛsɛ ayɛ.