Tolowanya akoka aso wa nsambisha—Lo mbisha anto dibuku Bible etshatɔ

Ohomba wa dikoka sɔ: Dibuku Bible etshatɔ mbele ehomɔ kalekaso nkamba la tɔ lo wetshelo aso. Koko, la ntondo ka sho nkamba la diɔ dia mbeka l’onto ɔmɔtshi, sho pombaka tokowoshadiɔ. Ɔnkɔnɛ, sho tshɛ pombaka nsala la wolo dia ndeka monga l’akoka wa mbisha anto dibuku Bible etshatɔ l’esambishelo. (Tuk. 22:29) Ekɔ toho efula ta mbisha anto dibuku sɔ, koko apandjudi pombaka nkamba la yoho yakondjiyɛ etombelo w’amɛna.

Woho wa nsala dui sɔ:

Onyiya dimbola dimɔtshi diemula nsaki diakoka nkamba la yɛ dia nkotola yambalo y’ompokami ayɛ lo tshapita mɔtshi ya shikaa ya lo dibuku. Wɛ koka kaanga nsɔna dimbola dimɔtshi l’atei wa ambola wa l’etatelo ka tshapita tshɛ. L’ɔkɔngɔ wa mpokamɛ okadimwelo w’ompokami ayɛ, adia divɛsa dimɔtshi diakoka ndo oma laasɔ ɛnyande odingɔ wendana la dikambo diakɔ ndo wɛ koka nkɛtshanya la nde odingɔ akɔ lo tshena pe.
Dui dikina ele nkamba la ndjɛkɛ ya mbɔtwɛlɔ dia memula nsaki kande ndo oma laasɔ ɛnya ompokami ayɛ lɛnɛ asha dibuku okadimwelo w’oma lo Bible. Ɛnyɛlɔ, wɛ koka ntɛkɛta dia mpokoso kɛmɔtshi keke katomba kɔtɛkɛtshiwɔ lo tita nsango ndo mboletshiya dia anto efula wakambiyama lo kɛnɛ kendana la ekadimwelo wa ambola wa lo lɛkɛ 3. Kana wɛ koka mbuta ɔnɛ wɛ ekɔ lo ndjembola asukanyi ayɛ dia mbatɛ kanyi mɔtshi ya dimɛna yendana la nshi yayaye. Oma laasɔ, ɛnyande esato wele lo lɛkɛ 4-5 ndo mbolande ɔnɛ: “Lo alaka anɛ tshɛ, diakɔna diakombolayɛ mɛna okotshamelo adiɔ?” Kana wɛ kokaka mbatɛ dia wɛ ekɔ lo ndjembola anto dia mbakimanyiya dia vɔ nkondja ekadimwelo lo ambola w’ohomba wa lo lɔsɛnɔ aha la mbaɔsɛ wenya efula. Oma laasɔ, ɛnya ompokami ayɛ ambola wele l’ɛse ka lɛkɛ 6, ndo mbolande dimbola diakɔna dialeka nkotola yambalo yande.
Kamba la yoho yendana la ntatɛ wekelo wa Bible mbala kakɔ ɔtɔi. Wɛ mbeyaka mbuta wate: “Tekɔ lo ndjɛnya asukanyi aso ehomɔ kɛnɛ katokimanyiya dia mbeka l’anto Bible. Onde wɛ ambokiɛnaka? [Tshikande akadimole.] Naka wɛ ekɔ kaanga la minitɛ ngana tsho, dimi nangaka kɛnya woho wakokaso nkamba la dibuku nɛ ndo la Bible kayɛ.”

Hemba nsala nganɛ lo ngɔndɔ kɛnɛ:

Nyosale wɛnyɛlɔ etena kasalanyu Ɔtɛmwɛlɔ anyu wa lo nkumbo.
Etena keyɛ l’olimu w’esambishelo, tɛ apandjudi akina kɛnɛ kakayalɔngɔsɔdi dia mbuta. (Tuk. 27:17) Tshikitanya mbɔtwɛlɔ kayɛ naka tɔ bu l’etombelo w’amɛna.