Tokambe dimɛna la awui wa lo dibuku Bible etshatɔ

Etena keka ombeki wa Bible kɛnɛ ketsha Bible mɛtɛ ndo kakambande la akambo wekande, nde pamaka ndo tɔɔka elowa wa lo nyuma. (Osam. 1:1-3) Sho koka nkimanyiya ombeki aso wa Bible dia nde mpama lo nkamba dimɛna la awui amɔtshi w’ohomba wa lo dibuku Bible etshatɔ.

Ambola wa lo mbɔtwɛlɔ: Tshapita tshɛ tatɛka la ambola wele ekadimwelo awɔ tanemaka lo wekelo. Wɛ koka mboka ambola akɔ aha la nongamɛ dia nde nkadimola dia nomialomia nsaki k’ombeki lo awui wayanganyu nkɛtshanya. Kana wɛ koka mbɔlɔmba dia nde mbisha elembetshiyelo wa lo tshena pe lo dimbola tshɛ. Naka nde ambosha lokanyi la kɔlɔ, honga ohomba dia wɛ mbɔlɔngɔsɔla lo etena kengo. Elembetshiyelo ande wayokokimanyiya dia wɛ mbeya awui wahombayɛ mbidja yimba lɔkɔ ndo mbatɔtɔmiya.—Tuk. 16:23; 18:13.

Okotsha: Naka ombeki amboshihodia ndo ambetawɔ awui wa lo tshapita ndjo, wɛ koka tsho mbookeketsha dia ndamɛ tovusola awui wele l’okotsha wɔtɔnɛ la kɛnɛ kekinyu. Lo wekelo wa mbala kayela, wɛ mbeyaka mbɔsa minitɛ ngana dia nshikikɛ kana nde akashihodia dimɛna awui wa lo okotsha akɔ. Koko naka awui akɔ wayonga la wahɔ le nde, wɛ pombaka mbɔsa etena wonya wekanyu dia nkɛtshanya la nde awui wele l’okotsha akɔ kana etenyi kɛmɔtshi k’okotsha lo mbadia edingɔ ndo lo mimbola ambola wakayalɔngɔsɔdi la ntondo.

Kiombo y’ovuswelo: Kiombo y’ovuswelo ya lo ekomelo ka tshapita tshɛ yekɔ l’awui wakadimola ambola wa lo mbɔtwɛlɔ. Wɛ koka nkamba la kiombo yakɔ dia nshikikɛ kana ombeki ayɛ amboshihodia awui woleki ohomba ndo kana nde koka mbalembetshiya. Nyadia dui tshɛ kaamɛ la dui dia wolo ndo divɛsa kana avɛsa woyelani la dui diakɔ. Oma laasɔ lɔmba ombeki ayɛ dia nkamba la divɛsa kana avɛsa dia nde nembetshiya bonde kele awui akɔ wekɔ mɛtɛ.—Ets. 17:2, 3.