Tolowanya akoka aso wa nsambisha​—Lo nsambisha onto tshɛ la l’ɛtshi kaso ka nkɛtɛ

OHOMBA WA DUI SƆ: Zɛkariya akatatshi prɔfɛsiya dia anto wa l’ɛtɛkɛta tshɛ wa wedja wayohokamɛ lokumu l’ɔlɔlɔ. (Zɛk 8:23) Ko waa na wayowaetsha? (Rɔm 10:13-15) Tekɔ la diɛsɛ ndo l’ɔkɛndɛ wa nsambisha lokumu l’ɔlɔlɔ le onto tshɛ la l’ɛtshi kaso ka nkɛtɛ.—od 84 od. 10-11.

WOHO WA NSALA DUI SƆ:

• Yalɔngɔsɔla. Onde wɛ pomanaka l’anto watɛkɛta ɔtɛkɛta okina? Wɛ koka nkamba la JW Language app dia mbeka mbɔtwɛlɔ kɛmɔtshi ka wɔdu. Kana oma lo telefɔnɛ, tablɛtɛ kana ɔrdinatɛrɛ ayɛ, wɛ koka mɛnya onto woho wakokande ntana awui akina lo ɔtɛkɛta ande lo jw.org

• Onga onto lasɛdingola akambo. Naka wɛ ekɔ lo tasambisha lo luudu la luudu, kete tohandjake waaso wa nsambisha. Sambisha ambetshetshi kana wanɛ wemadi lo ahole wakongawɔ mituka. Naka wɛ ekɔ lo esambishelo ka lo sɛkɛ, kete tonyake yimba lo oyango ayɛ wa nsambisha

• Onga l’etete. Sala la wolo dia nsambisha anto wahatanema lawakawɔ l’etatelo. Dja welo dia nsambisha anto lo ahole tshɛ wadjasɛ anto, ondo lo wenya wotshikitanyi wa lo lushi kana lo nshi yotshikitanyi ya lo lomingu. Koka monga ohomba nsambisha ampokami amɔtshi lo tshimbo ya mukanda, telefɔnɛ kana esambishelo ka lo shinga

• Tetemala polo l’ekomelo. Aha la ntshimbatshimba, kalola le onto lakɛnya nsaki. Naka onto ɔmɔ ekɔ lo ntɛkɛta ɔtɛkɛta wotshikitanyi, sala la wolo dia mbotanɛ onto lele l’akoka lakoka mbokimanyiya lo ɔtɛkɛta ande. Wɛ pombaka ntetemala membolaka onto akɔ polo nde ambokondja opandjudi watɛkɛta ɔtɛkɛta ande.—od 94 od. 39-40

NYENDE VIDƐO YELE L’ƆTƐ A DUI ƆNƐ: ESAMBISHELO “LO AHOLE WOLEKI ETALE WA LO NKƐTƐ” NDO OMA LAASƆ NYOKADIMOLE LO AMBOLA WAYELA ANƐ:

• 

  Ngande wakayalɔngɔsɔla anangɛso l’akadiyɛso dia tosambisha l’ɛtshi kɛmɔtshi ka nkɛtɛ ka l’etale? (1Kɔ 9:22, 23)

• 

  Wekamu akɔna wakawahombe mbekola?

• 

  Ɛtshɔkɔ akɔna wakawakondja?

• Welo akɔna wakokayɛ mbidja dia nyomoleka nsambisha anto l’ɛtshi kayɛ ka nkɛtɛ?