Tolowanya akoka aso wa nsambisha​—Lo ntatɛ sawo diakoka tokimanyiya dia nsambisha

Yeso akonge l’akoka wa nsambisha womoto l’ose Samariya lo tshakitudi l’ɔtɛ wakandatatɛ nsawola la nde. Ngande wakokaso mpamia akoka aso lo ntatɛ nsawola la angɛndangɛnda?

• Tɛkɛta la lɔngɛnyi ndo nsawola l’anto. Kaanga mbakandalɛmbɛ, Yeso akatatɛ sawo diande lo nɔmba tsho yema y’ashi wa nnɔ. Ɔnkɔnɛ, wɛ koka ntatɛ sawo lo mbisha onto mɔyɔ l’osalosalo tshɛ ndo oma laasɔ, wɛ koka kombotɛ ɛnyɛlɔ ɔnɛ nshi nyɛ tanyi kana amvula efula, kana dui dimɔtshi dieke katomba. Ohɔ dia oyango wa ntondo ekɔ wa ntatɛ sawo, laasɔ tɛkɛta dui tshɛ diakoka ngɛnyangɛnya onto. Naka nde hɛnyisha nsaki, kete ndooko kamboshishɔ. Hemba nsawola l’onto okina. Lɔmba Jehowa dia nde kosha dihonga.​—Nɛh 2:4; Ets 4:29.

• Kamba la diaaso tshɛ diatanayɛ dia nsambisha lokumu l’ɔlɔlɔ, koko tongake prɛse. Sawola la nde woho watoyosawolaka l’anto. Naka wɛ mbotshutshuya la wolo, kete nde mbeyaka momala ndo mpembola sawo. Tɔkɔmɔke naka sawo ambokomɛ la ntondo ka wɛ mbosambisha. Naka wɛ mbokaka wɔma mbɔtshiya lokumu l’ɔlɔlɔ, kete wɛ koka ntatɛ sawolaka l’anto aha la oyango wa nsambisha. [Ɛnya ndo nyɔkɛtshanya vidɛo ya 1.]

• Yanga diaaso dimɔtshi dia nsambisha lo mbuta dui dimɔtshi di’oma k’ɛse otema diendana la mbetawɔ kayɛ diakoka ntshutshuya ompokami dia nde mimbola woho wa nde nkondja elembetshielo. Yeso akate awui amɔtshi wa diambo wakatshutshuya womoto l’ose Samariya dia nde mboka ambola. Etena kakandayoosambishaka lokumu l’ɔlɔlɔ, Yeso aki tsho okadimolaka lo ambola ande. [Ɛnya ndo nyɔkɛtshanya vidɛo ya 2, oma laasɔ, ɛnya ndo nyɔkɛtshanya vidɛo ya 3.]