Tolowanya akoka aso wa nsambisha—Lo ntatshiya sawo dimɔtshi l’oyango wa nsambisha lo tshakitudi

Ohomba wa dikoka sɔ: Etena katotosambishaka lo luudu la luudu, mbala efula hatototanaka anto efula lawakawɔ. Koko, sho koka mbasambisha etena katotohomanaka la wɔ lo mituka wɛmba anto tshɛ, etena kewɔ lo nkonga dia mɛnana la dɔkɔtɛlɛ, etena ka diomuyelo l’olimu kana la kalasa ndo lo tena dikina. Jehowa nangaka dia anto tshɛ nkondja diaaso dia mpokamɛ losango la Diolelo. (1 Tim. 2:3, 4) Mbala efula dia nsambisha, sho pombaka ntatɛ nsawola la wɔ sawo dimɔtshi.

Woho wa nsala dui sɔ:

• Sɔna onto la wɛ nsawola la nde. Onde mɛnamaka di’onto akɔ mbidjaka anto lo demba ndo nangaka nsawola? Onde akambo wele laawɔ nyoshaka diaasɔ dia nsawola dimɛna? Apandjudi amɔtshi mendaka ompokami awɔ ntondo okoko l’okoko, oma laasɔ ko vɔ mɔnamɔna yema. Naka onto akɔ ambɔmɔnamɔna ndo nde, vɔ tatɛka la sawo dimɔtshi.

• Sala dɔmbɛlɔ dia mondo dia l’etei k’otema naka wɛ bu la dihonga dia ntɛkɛta.—Neh. 2:4; Ets. 4:29.

• Tatɛ la dui dimɔtshi dia wɔdu, ondo lo mbosha mɔyɔ. Lo sawo diakandasawola la womoto l’ose Samariya, Yeso kotatɛ sawo diande lo ntɛkɛta akambo wendana la Diolelo. (Jni. 4:7) Lo tena dimɔtshi, sho koka ntatshiya sawo lo mandola ompokami ɔnɛ: “Anayɛ wekɔ la lɔkɛwɔ la dimɛna efula.” Mboka dimbola ekɔ nto yoho kina ya ntatshiya sawo, ɛnyɛlɔ lo mombola ɔnɛ: “Onde wɛ akoke kɛnɛ kakasalema l’otsho wa loyi?”

• Kam’atatɛ sawo, yanga diaaso dia mbosambisha lokumu l’ɔlɔlɔ, koko totshɔke lowango lowango. Sala dia sawo mbeta dimɛna. Ondo wɛ koka mbuta dui dimɔtshi diayɔngɛnyangɛnya ompokami ayɛ ndo diayowotshutshuya dia kooka dimbola dimɔtshi. Ɛnyɛlɔ, naka sawo dianyu mendanaka l’awui wa lo nkumbo, wɛ koka mbotɛ ɔnɛ: “Lakatane dako dimɔtshi di’ohomba efula diendana la woodielo w’ana.” Naka nyekɔ lo nsawola lo kɛnɛ kenda l’awui wakatombi, wɛ koka mbotɛ ɔnɛ: “Laki oma la mbadia losango lɔmɔtshi l’ohomba lakokami nkahana la yɛ.” Toyakɔmɔlake naka sawo dianyu diambokomɛ la ntondo ka wɛ mbosambisha.

• Kotshɔke la traktɛ kana ekanda ekina walembetshiya Bible wakokayɛ tosha onto ɔmɔtshi layɛnya nsaki.

Hemba nsala nganɛ lo ngɔndɔ kɛnɛ:

• Lomingu tshɛ, kohembake ntatshiya kaanga sawo ɔtɔi l’oyango wa nsambisha lo tshakitudi.