Tokambe la tovidɛo dia mbetsha ambeki aso wa Bible

Diangɔ diɛnama nkutolaka yambalo y’onto ladiɛna ndo mbokimanyiyaka dia nde nshihodia ndo mbohɔ kɛnɛ kakandeke. Ombetsha aso a Woke, mbuta ate Jehowa akakambe la diangɔ diɛnama dia mbisha wetshelo efula w’ohomba. (Eta 15:5; Jɛr 18:1-6) Ndo Yeso laki Ombetsha a Woke nde la wɔ akakambe la diɔ. (Mat 18:2-6; 22:19-21) Ehomɔ kɛmɔtshi kɛnama kambonga l’etombelo w’amɛna l’ɛnɔnyi weke ka mbeta ɛnɛ ele tovidɛo. Onde wɛ kambaka dimɛna la tovidɛo etena ketshayɛ ambeki ayɛ Bible?

Tovidɛo dikumi takalɔngɔswama dia tokimanyiya dia mbetsha wetshelo wa lo biukubuku Lokumu l’ɔlɔlɔ l’oma le Nzambi! Ɔtɛ a dui wa vidɛo tshɛ mbɔtɔnɛka la dimbola dimɔtshi diofundami l’alɛta w’edima diele lo biukubuku yakɔ. Biukubuku yakɔ yele lo jw.org yekɔ ndo la tolembetelo tatohola etena kahombaso mɛnya vidɛo tshɛ naka tekɔ lo nkamba la yɔ lo telefɔnɛ kana lo tablɛtɛ. Laadiko dia laasɔ, tovidɛo tokina mbɔtɔnɛka la ekanda ekina wekaso l’anto watanema lo ɛngɔ kombaso dihomɔ dia mbetsha.

Onde wɛ ekɔ lo kɛtshanya l’ombeki ayɛ wa Bible dui dimɔtshi diakoka monga wolo le nde dia nshihodia? Kana onde ombeki ayɛ ekɔ lo ndɔshana l’okakatanu ɔmɔtshi wa laande? Yanga lo tovidɛo tele lo jw.org® ndo tele lo JW Televiziɔ® dia ntana vidɛo mɔtshi yakoka mbokimanyiya. Ondo wɛ l’ombeki ayɛ kokaka menda vidɛo mɔtshi l’atei atɔ ko oma laasɔ, nyu ndjɔkɛtshanya.

Tovidɛo t’eyoyo tekɔ lo tondjama ngɔndɔ tshɛ. Etena kendayɛ tovidɛo takɔ, kanyiya woho wakokayɛ nkamba la tɔ etena ketshayɛ anto akina.