Tokambe la diangɔ diɛnama dia mbetsha
1. Ngande wakakambe Jehowa la diangɔ diɛnama dia mbetsha ekambi ande wa lo nshi y’edjedja, ndo etombelo akɔna wakayala la dikambo sɔ?
1 Dia nde mbewoya ekambi ande wa lo nshi y’edjedja akambo, Jehowa akakambaka tena dimɔtshi la waɛnɛlɔ ndo la alɔ. Ohokanyiya dikambo dia ɛnɛlɔ ka Ezekiyɛlɛ ka pusupusu ka Jehowa ka l’olongo. (Ezek. 1:1-28) Ohokanyiya woho wakayaoke Danyɛlɛ l’ɔkɔngɔ wa nde nongola ɛnɛlɔ ka diambo ka prɔfɛsiya kakɛnyaka wahɔnelo wa mandji yakayahemɛka andja w’otondo. (Dan. 7:1-15, 28) Ndo kayotota lo kɛnɛ kendana la ɛnɛlɔ ka diambo kakawɛnya ɔpɔstɔlɔ Joani lo ‘tolembetelo’ dia akambo wakahombe salema “lu lushi la Khumadiondjo”? (Eny. 1:1, 10) Jehowa aketsha Ezekiyɛlɛ, Danyɛlɛ, ndo Joani lo kamba la akambo wa diambo ndo wa wolo, ndo kɛsɔ akakakatshiya awui lo timba tawɔ.
2. Diangɔ diakɔna diɛnama diakokaso kamba ladiɔ dia mbetsha anto akina akambo wa mɛtɛ wa lo Bible?
2 Naka sho nangaka nembetshiya anto akina akambo wa mɛtɛ w’oma lo Bible lo yoho yahawakoke mbohɛ esadi, kete sho lawɔ koka kamba la bandɛ vidɛo yaso dia mbetsha. Bandɛ vidɛo yaso yekɔ la asawo efula wotshikitanyi ndo fudiaka wɛkamu lo Bible, l’okongamelo wa Jehowa ndo lo atɔndɔ watokonya Akristo w’eshika. Tɔsɛdingole toho tɔmɔtshi takokaso kamba la bandɛ vidɛo yaso dia mbetsha. Vidɛo yayela nyɛ mbele mɔtshi yakoka kamba laso.
3. Kakɔna kakokayɛ kamba latɔ dia nɔmbɔla ombeki wa Bible oya lo okongamelo?
3 L’olimu w’esambishelo: Onde wɛ ambotɛka ombeki wa Bible awui wendana la nkumbo kaso k’Akristo ka l’andja w’otondo? Ɛnyande nkumbo kakɔ lo bandɛ vidɛo Toute la communauté de frères. Kana andjandetɔ dia nde tokienda la ntondo ka nyu ndjeka mbala kayela kana kanyokiende kâmɛ lo wekelo wa mbala kayaye. Oma lâsɔ, nyɔkɛtshanya ambola wa ovuswelo wele lo Olimu aso wa Diolelo wa Ngɔndɔ ka samalo 2002.
4. Dihomɔ diakɔna dia wetshelo diakoka ɛlɔngɔlɔngɔ ndo esekaseka kamba ladiɔ la kalasa?
4 Ɛlɔngɔlɔngɔ la esekaseka, nyu mbeyaka nɔmba embetsha anyu dia kana nyu koka mɛnya ase kalasa yanyu bandɛ vidɛo La fermeté des Témoins de Jéhovah face à la persécution nazie kana Fidèles dans les épreuves — Les Témoins de Jéhovah en Union soviétique. Lɔngɔsɔla dia kɛtshanya l’asekayɛ wa la kalasa ambola wele lo Olimu aso wa Diolelo wa Ngɔndɔ ka samalo 2001 kana wa Ngɔndɔ ka hende 2003, lo Falase lo mbɔtɔnganyiya ambola akɔ l’asekayɛ wa la kalasa.
5. Ehomɔ kakɔna kele laso kakoka ambutshi kamba latɔ lo wekelo wa nkumbo?
5 La ase nkumbo ndo angɛnyi: Ambutshi nyokanyiya woho wambohama ananyu oma lo mbala k’ekomelo kakanyende bandɛ vidɛo Le jeunes s’interrogent. . . Comment se faire de vrais amis ? Lande na kahanyakiende nto lo wekelo anyu wa nkumbo wa mbala kayaye? Olimu aso wa Diolelo wa Ngɔndɔ ka dikumi 2002 wekɔ la ambola wakimanyiya dia sala ɔkɛtshanyelo wahɛtahɛta ndo wa dimɛna efula.
6. Ngande wakokayɛ nɔngɔsɔla etena k’ɔkɛtshanyelo wakeketsha wɛ l’angɛnyi ayɛ?
6 Onde wɛ ekɔ l’angɛnyi l’etshumanelo kanyu wakombolayɛ mbelɛ la ngelo? Menda kâmɛ bandɛ vidɛo Respectons l’autorité de Jehovah ayetɛ dikɔlɔ ɔmɔtshu, djekoleko naka l’ɔkɔngɔ wa menda vidɛo kakɔ ko nyu vusola wetshelo wakondjaso, lo kamba la ambola watanema lo Olimu aso wa Diolelo wa Ngɔndɔ ka divwa 2004.
7. Waaso akɔna wakokayɛ kamba la bandɛ vidɛo yaso?
7 Waaso akina: Lo toho takɔna tokina nto takokayɛ kamba dimɛna la bandɛ vidɛo yaso 20 yotshikitanyi? Onde mɛnya onto ɔmɔtshi latoyendaka mbala la mbala bandɛ vidɛo ɔtɔi kana hiende ayowokimanyiya dia nde pama lo nyuma? Onde wɛ koka mɛnya bandɛ vidɛo yakɔ lo mvudu yakimanyiyawɔ esombe kana anto wele la pâ? Onde bandɛ vidɛo ayonga la shɛngiya ya dimɛna le ewotɔ ayɛ wele kema Ɛmɛnyi, asukanyi ayɛ ndo asekayɛ wa l’olimu? Bandɛ vidɛo yaso yekɔ diangɔ diɛnama dia diambo, diasha wetshelo, ndo di’amɛna efula. Tokambake layɔ dia mbetsha.