Woho wa nkamba la bɛnyɛlɔ di’asawo

Ntatɛ lo Ngɔndɔ ka ntondo lo 2018, bɛnyɛlɔ di’asawo diakatondjama lo lohoso la Dikatshi dia Lɔsɛnɔ ndo olimu aso w’Okristo. Ngande wakokaso nkamba la diɔ?

Etena kashayɛ ombeki ɛkɛndɛ: Wɛ kokaka nkamba la dimbola, divɛsa ndo dimbola dia mbala kayaye dia lo ɛnyɛlɔ ka sawo. Koko, kɛsɔ halange nembetshiya dia sho pombaka nsangola tshɛkɛta lo tshɛkɛta oma lo vidɛo ya ɛnyɛlɔ ka sawo. Wɛ koka nkamba la toho totshikitanyi, mbɔtwɛlɔ, yoho ya kanyiya ndo toho tokina. Wɛ mbeyaka nto mbosha okanda ɔmɔtshi w’oma lo Ɛngɔ kombaso dihomɔ dia mbetsha, oyadi kaanga hawɔtɛkɛtshi lo alako wa lo etenyi kɛnɛ.

Etena k’eso lo esambishelo: Bɛnyɛlɔ di’asawo diakatondjama dia tosha tokanyi t’amɛna. Naka onto ɔmɔtshi ambɛnya nsaki ndo nde kombolaka mbeya awui efula, kete nyu mbeyaka ntetemala la sawo ondo lo nkamba l’awui w’oma lo ɛnyɛlɔ ka wendelo w’oyoyo. Wɛ mbeyaka ntshikitanya bɛnyɛlɔ di’asawo kana nkamba la dui dimɔtshi diotshikitanyi tshɛ lo tshɛ. Onde ɔtɛ a dui w’oma lo ɛnyɛlɔ ka sawo k’oma lo dikatshi dia losanganya di’etshi kana divɛsa diotshikitanyi diayokoka ngɛnyangɛnya anto wa l’ɛtshi kanyu ka nkɛtɛ? Onde anto wele lɛnɛ adjasɛyɛ ndjashaka efula l’awui weke katomba l’ɛtshi kanyu ka nkɛtɛ? Wɛ koka nkamba la bɛnyɛlɔ di’asawo lo toho totshikitanyi, koko oyango ayɛ pombaka monga wa ‘nsala akambo tshɛ lo wahɔ wa lo nkumu l’ɔlɔlɔ dia lisambisha anto akina’​—1 Kɔ 9:22, 23.