Woho wa ntatɛ asawo lo nkamba la traktɛ

Ntatɛ lo Ngɔndɔ ka ntondo 2018, lohoso la Dikatshi dia losanganya la Lɔsɛnɔ ndo olimu aso W’Okristo lakatatɛ ndjaala la bɛnyɛlɔ di’asawo. Takakeketshama dia ndeka nsawola l’anto lo dihole dia mbashaka tsho ekanda. Dia nkimanyiya apandjudi dia ntshikitanya mbɔtwɛlɔ yawɔ, tovidɛo ta bɛnyɛlɔ di’asawo takɛnya woho wa ntatɛ sawo lo nkamba tsho la Bible. Ko onde kɛsɔ nembetshiyaka dia hatokoke nkamba l’ekanda etena kasambishaso lo luudu la luudu? Ndooko! Ɛnyɛlɔ, traktɛ koka monga yoho mɔtshi ya dimɛna ya ntatɛ la sawo. Sho koka nkamba la toho tayela tɔnɛ etena kakambaso la traktɛ tshɛ:

1. Oka dimbola diele l’ekadimwelo efula laadiko.

2. Ɛnyande okadimwelo washa Bible watanema lo divɛsa kana lo avɛsa wele la diko ka lɛkɛ la hende. Naka etena kekekɔ, adia ndo kɛtshanya la nde awui amɔtshi wele l’etei ka traktɛ.

3. Sha ompokami traktɛ ndo keketshande dia ndjadia awui akina wele lɔkɔ l’etena kalangande.

4. La ntondo ka nkakitɔna l’onto, ɛnyande dimbola dia “Nkana la diɔ yimba” ndo nyokane dia ndjɔkɛtshanya okadimwelo washa Bible mbala kayaye.

Etena kakalolayɛ, nyɔkɛtshanya okadimwelo ndo tshika dimbola dikina dia ndjɔkɛtshanya la nde mbala kayaye. Wɛ koka nsɔna dimbola dimɔtshi oma lo sitɛ kaso kana oma l’okanda wɛnyishawɔ lo lɛkɛ l’ekomelo la traktɛ. Oma laasɔ l’etena kahombama, ɔtshiya biukubuku Lokumu l’ɔlɔlɔ l’oma le Nzambi! kana okanda okina wekaso l’anto wele lo Ɛngɔ kombaso dihomɔ dia mbetsha.