Yalɔngɔsɔla kakianɛ dikambo di’esakelo wa wanyandja

Lande na ndjalɔngɔsɔla? Hemɔ kalɔmba esakelo wa wanyandja kokaka kokomɛ la shashimoya ndo vɔ koka tokokimɛ lo lopitadi. Diakɔ diele, ntondo ka wɛ ntata hemɔ kalɔmba esakelo wa wanyandja, nsala la wolo dia nkondja wahɔ oma lo tɛdikɔ tatanema kakianɛ tayokokimanyiya dia nkodja esakelo woleki amɛna naka kokaka. Lo nsala ngasɔ wɛ mɛnyaka dia wɛ mbɔsaka lɔsɛnɔ ndo ɔlɛmbɛ wa Jehowa wendana la dikila la nɛmɔ.​​—Ets 15:28, 29.

Kakɔna kakokayɛ nsala dia ndjalɔngɔsɔla?

• Lɔmba ndo lodia la yambalo tshɛ kartɛ kendana la otonelo wa dikila (DPA).a Apandjudi wambobatizama koka nkondja kartɛ ka DPA oma le okambi wakamba l’ekanda lo dikambo diawɔ vɔamɛ mbidja ndo document d’identité médical lo dikambo dia anawɔ weke akɛnda

• Naka wɛ aya la diemi, lɔmba dikumanyi dianyu kɔpi kɛmɔtshi ka Informations pour les femmes enceintes (S-401). Dɔkima nɛ diayokokimanyiya dia mbɔsa tɛdikɔ t’amɛna lo dikambo di’ekakatanu wendana l’esakelo wakoka ntomba etena keyɛ la diemi ndo kotayɛ.

• Naka wɛ ekɔ l’ohomba w’ekimanyelo lo dikambo di’esakelo walɔmba mbidja dikila kana totshikala lo lopitadi, ewoya dikumanyi diayɛ la ntondo ndo ewoya ase lopitadi di’Ɔmɛnyi wa Jehowa ɔmɔtshi ayoya ndjokenda.

Ngande wakoka dikumanyi kokimanyiya? Vɔ koka kokimanyiya dia ndodia kartɛ ka DPA. Koko dikumanyi hawotokɔsɛ tɛdikɔ tendana l’esakelo kana mbisha kanyi yawɔ hita l’awui walɔmba di’onto ndamɛ mbɔsa yɛdikɔ. (Rɔm 14:12; Nga 6:5) Etena kewoyayɛ dikumanyi dia l’etshumanelo kayɛ dia wɛ ekɔ l’okakatanu wendana l’esakelo wakoka nɔmba dia mbidja dikila, aha la ntshimbatshimba vɔ wayewoya ase Kɔmite ka diɔtɔnganelo la pitadi lo dikambo dia wahɔ ayɛ.

Ngande wakoka wanɛ wakamba lo Kɔmite ka diɔtɔnganelo la pitadi kokimanyiya? Anangɛso wakamba lo Kɔmite ka diɔtɔnganelo la pitadi wakalowanyema dia nkimanyiya aseka enganga ndo aseka lɛɛta dia vɔ nshihodia yɛdikɔ yele l’ɔtɛmwɛlɔ aso lo kɛnɛ kendana la dikila. Vɔ kokaka nkɛtshanya l’onganga wakosakɛ toho tɔmɔtshi t’esakelo tayokokimanyiya diaha vɔ kodja dikila. Naka dui sɔ diekɔ ohomba, kete vɔ wayokokimanyiya dia ntana onganga walɛmiya yɛdikɔ yayɛ yaha mbidja dikila.

NYENDE VIDƐO YELE L’ƆTƐ A DUI ƆNƐ: WOHO WA MBƆSA TƐDIKƆ TENDANA L’ESAKELO WAKAMBAWƆ LA DIKILA NDO OMA LAASƆ, NYOKADIMOLE LO DIMBOLA DIAYELA NƐ:

• Wetshelo akɔna wamboyokondja oma lo vidɛo nyɛ wakoka kokimanyiya dia ndjalɔngɔsɔla lo dikambo di’esakelo wa wanyandja walɔmba dia mbidja dikila?

  textarea-1