Onde kalasa kana falanga koka kokimanyiya dia monga la nshi yayaye y’amɛna?

Anto efula fɔnyaka dia wanɛ wɔtɔ kalasa dimɛna ndo wele la ɛngɔnyi mbayonga la nshi yayaye y’amɛna. Vɔ fɔnyaka dia mbɔtɔ kalasa ya l’inivɛrsite koka nkimanyiya onto dia monga okambi w’olimu wa dimɛna monga la nkumbo ka dimɛna ndo monga onto l’oshika. Vɔ mbeyaka mfɔnya nto dia mbɔtɔ kalasa y’amɛna kimanyiyaka dia onto nkondja olimu w’ofutawɔ falanga efula ndo ɔnɛ wanɛ wele la falanga efula wayonga l’ɔngɛnɔngɛnɔ.

ƆSƆNWƐLƆ EFULA WALEKA ANTO NSALA

Tɔsɛdingole kɛnɛ kakate Zhang Chen, l’oma la Chine. Nde mbutaka ate: “Lakafɔnyaka dia ekɔ ohomba monga la dipɔlɔmɛ dia l’inivɛrsite ko mimɔ oma lo wola ndo nkondja olimu wafutawɔ falanga efula wayokimanyiya dia dimi monga la ɔngɛnɔngɛnɔ ndo monga la lɔsɛnɔ la dimɛna.”

Dia monga la lɔsɛnɔ la dimɛna, anto efula nomɔlomɔka dia mbɔtɔ wa inivɛrsite wa lokumu ondo lo wedja ekina. Anto wakasalaka dui sɔ efula polo lam’akayoyaka hemɔ ka COVID-19, laasɔ dui sɔ diamboyonga okakatanu le anto dia mɛngɔla. Alapɔlɔ wakasale tshunda dia Organisation de coopération et de développement économiques wa lo 2012 mbutaka ɔnɛ: “Ambeki w’ase Asie tshɛ weka lo wedja ekina wekɔ pursa 52.”

Mbala efula ambutshi ndjaahondjaka awui efula l’oyango wa anawɔ monga l’akoka wa mbɔtɔ kalasa l’inivɛrsite lo wedja ekina. Qixiang, l’oma la Taïwan, mbohɔka ɔnɛ: “Ambutshi aso komonga la falanga efula, koko waketawɔ dia sho ana akɔ anɛi tshɔ dia tɔtɔ kalasa lo États-Unis.” Dia mfuta kalasa shɔ, l’ɛnyɛlɔ ka nkumbo efula, nkumbo kande kakahombe mbɔtɔ abasa efula.

ETOMBELO AKƆNA WAMBONGA L’AWUI ASƆ?

Kalasa koka ndowanya lɔsɛnɔ lo toho tɔmɔtshi, koko yɔ hatelaka nshi tshɛ ambeki etombelo wa kɛnɛ kakawalongamɛka. Ɛnyɛlɔ, l’ɔkɔngɔ wa vɔ ndjahondja l’edja k’ɛnɔnyi efula ndo mbɔtɔ abasa efula wa mfuta kalasa, anto efula hawoyokondjaka olimu wa kɛnɛ kakawakombolaka. Alapɔlɔ ɔmɔtshi wakasale Rachel Mui lo jurnalɛ mɔtshi (Singapore’s Business times) mbutaka ɔnɛ: “Efula k’anto wakɔtɔ kalasa efula ya l’inivɛrsite hawotokondjaka elimu.” Jianjie l’oma la Taïwan, lakɔtɔ kalasa efula ya l’inivɛrsite mbutaka ɔnɛ: “Anto efula hawototanaka elimu wɔtɔnɛ la kalasa yakawɔtɔ.”

Wanɛ wakoka nkondja olimu lo ndjela kalasa yakawɔtɔ ndjɛnaka dia nsɛnɔ yawɔ hayotshikitana lo ndjela kɛnɛ kakawalongamɛka. L’ɔkɔngɔ wa nde nshidiya kalasa lo Royaume-Uni, Niran, l’oma la Thaïlande, akayotanaka olimu wɔtɔnɛ la kalasa yakandɔtɔ. Nde mbutaka ate: “Oko wakamalongamɛka, dipɔlɔmɛ diami diakakimanyiya dia dimi nkondja olimu wakawafutaka falanga efula. Koko, falanga efula yakawafutaka shɔ, yakanɔmbaka dia dimi nkamba olimu efula ndo mbetsha wenya efula. L’ekomelo, kɔpanyi kɛsɔ kakanya anto efula l’olimu mbidja ndo dimi. Lakayoshihodia dia ndooko olimu wakoka nkimanyiya onto dia monga la nshi yayaye y’amɛna.”

Oyadi wanɛ wele ɛngɔnyi kana wanɛ wɛna dia wambokondja lɔsɛnɔ la dimɛna, vɔ tetemalaka mpomana l’ekakatanu lo nkumbo, ekakatanu wendana la yoonge ndo ekakatanu wendana la ekondjelo. Katsutoshi, l’oma la Japon, mbetawɔka ɔnɛ: “Laki la falanga efula, koko dimi kotetemala monga l’ɔngɛnɔngɛnɔ, nɛ dia anto akina wakambokaka kandjema ndo wakasalɛka akambo wa kɔlɔ.” Lam, womoto ɔmɔtshi ladjasɛ la Vietnam, mbutaka ɔnɛ: “Dimi mɛnaka dia anto efula salaka la wolo dia nkondja elimu waafutawɔ falanga efula, dia monga l’ekokelo l’awui wendana l’ekondjelo, koko mbala efula vɔ ndjongaka l’ekiyanu efula, ndo ndjongaka kaanga la hemɔ ndo l’ɔkɔmwɛlɔ.”

L’ɛnyɛlɔ ka Franklin, anto efula wakayɛna dia lɔsɛnɔ ndeka mbesa kalasa ndo nkondja ɔngɔnyi. Lo dihole dia mbetsha nɛnɔ yawɔ tshɛ lo ndjasha l’oweso wa lomombo la l’emunyi, amɔtshi nyangaka dia monga la nshi yayaye y’amɛna lo nsala la wolo dia monga onto ɔlɔlɔ ndo nsalɛ anto akina ɔlɔlɔ. Onde mbesa yoho ya l’ɔsɛnɔ shɔ kokaka kokimanyiya dia monga la nshi yayaye y’amɛna? Sawo diayela diayosha okadimwelo wa dimbola sɔ.