Kakɔna kakoka tokimanyiya dia monga la nshi yayaye y’amɛna?

Oko wakatadiɛnyi lo sawo dietshi, anto salaka la wolo dia monga l’ɔngɛnɔngɛnɔ lo nshi yayaye lo ndjaɛkɛ lo awui wele oko, mbetawɔ ɔnɛ awui wakakongɛma la ntondo, mbɔtɔ kalasa ya laadiko, ɔngɔnyi ndo monga onto ɔlɔlɔ. Koko naka wɛ nsala la wolo dia monga la nshi yayaye lo nkamba l’awui asɔ, kete ayonga oko onto latande lɔkɛndɔ otsha lo dihole dimɔtshi diende heye lo nkamba la kartɛ ka kɔlɔ. Onde kɛsɔ nangaka nembetshiya dia ndooko ɔnɔmbɔdi w’oshika wakoka tɔlɔmbɔla dia monga la nshi yayaye y’amɛna? Ndooko!

ƐLƆMBWƐLƆ K’OMA LO KIƆKƆ YOLEKI TSHƐ DIMƐNA

Etena kɔsaso tɛdikɔ, tena efula sho tombolaka onto ɔmɔtshi lotole ndo lele la lomba toleka. Woho akɔ waamɛ mbele, sho koka ntana ɛlɔmbwɛlɔ k’oshika kendana la nshi yaso yayaye oma le onto ɔmɔtshi lotole ndo lotoleki lomba etale. Sho koka mbadia dako diande oma lo dibuku diakatatɛ fundama ambeta ɛnɔnyi oko 3 500. Dibuku sɔ ko Bible.

Lande na kakokayɛ ndjaɛkɛ lo Bible? Nɛ dia Kiɔkɔ yatɔ ndja oma le Onto lotole etale ndo loleki lomba l’andja w’otondo. Nde mbelamɛka ɔnɛ “Ntango andja” ɔnɛ lele “oma ko mɔmbɔkɔmbɔla ndo pondjo pondjo.” (Danyɛlɛ 7:9; Osambo 90:2) Nde mbele “Otungi w’olongo, Nzambi ka mɛtɛ, Ɔnɛ lakasale nkɛtɛ.” (Isaya 45:18) Nde totɛka dia lokombo lande ko, Jehowa.—Osambo 83:18.

Lam’ele Bible ndja oma le Otungi w’anto tshɛ, Bible hate dia mbekelo kana lokoho la demba ndeka lokina. Alako wa lɔkɔ hawetaka loowe ndo wambokondjiyɛ anto wa lo wedja tshɛ wahɔ. Tɔ tanemaka l’ɛtɛkɛta efula ndo kambokahanyema l’andja w’otondo oleki dibuku diakɔna tshɛ.a Dui sɔ nembetshiyaka dia onto tshɛ kokaka kishihodia aha l’okakatanu ndo nɔmbɔma la tɔ. Awui anɛ shikikɛka kɛnɛ kata Bible tɔamɛ:

“Nzambi keema la shɔnɔdi, koko lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde.”—ETSHA 10:34, 35.

Oko watoyakiyanyaka ombutshi dia mbisha anande ɛlɔmbwɛlɔ ka dimɛna, mbele Jehowa Nzambi ekɔ Shɛso ka ngandji latokimanyiya lo tshimbo y’Ɔtɛkɛta ande, Bible. (2 Timɔte 3:16) Wɛ koka ndjaɛkɛ l’Ɔtɛkɛta ande; laadiko dia laasɔ, nde mbakatotonge ndo nde mbeyaka kɛnɛ kayotosha ɔngɛnɔngɛnɔ.

SHO KOKA NDJAƐKƐ LO BIBLE

Sho koka ndjaɛkɛ lo kɛnɛ kata Bible lo dikambo dia nshi yayaye, nɛ dia ɛlɔ kɛnɛ tekɔ lo mɛna awui wakatatshi Bible ambeta ɛnɔnyi oko 2 000.

KƐNƐ KAKATE BIBLE ƆNƐ KAYOSALEMA

“Wodja wayɔlɔsha wodja okina ndo diolelo diayɔlɔsha diolelo dikina. Adidimu wa nkɛtɛ wa wolo wayoyala, ndjala ya kasha ndo elando lo dihole la dihole.”—LUKA 21:10, 11.

NKƐWƆ YAKATATSHI BIBLE YAYONGA L’ANTO

“Eya dia lo nshi y’ekomelo, tena dia paa dia wolo mbikikɛ diayoyala. Nɛ dia anto wayoyalanga, wayolanga falanga, wayonga akanga w’etako, akanga wa lotamanya, atɛnganyi, wahakitanyiya awui w’ambutshi awɔ, akanga wa lɔhɛndɛ, waha la kɔlamelo, waha la ngandji ka lam’asa ase nkumbo, wahalange mbokana, amamanyishi, waha la ndjakimɛ, akanga w’ekonda, waha la ngandji k’akambo w’ɛlɔlɔ, afungi, akanga w’ɛtɛ wolo, akanga wa ndjadiya, anangi w’ɛngɛnɔngɛnɔ lo dihole dia monga anangi wa Nzambi.”—2 TIMƆTE 3:1-4.

Kakɔna kayoyota etena kɛnayɛ awui wakatatshi Bible ambeta edja wasalema ɛlɔ kɛnɛ? Aha la taamu wɛ ayetawɔ kɛnɛ kakate Leung, l’oma la Hong Kong, ate: “Prɔfɛsiya ya lo Bible yambofundamaka edja efula. Ndooko onto lakoka mbuta awui asɔ ko vɔ monga mɛtɛ tshɛ lo tshɛ. Bible ndja oma le onto ɔmɔtshi lotoleki lomba etale.”

Bible kekɔ la nkama ya prɔfɛsiya yamboshilaka la kotshama.b Awui asɔ mɛnyaka dia Bible kekɔ mɛtɛ Ɔtɛkɛta wa Nzambi. Jehowa mbutaka ɔnɛ: “Dimi kele Nzambi, ndooko okina, oma k’etatelo, dimi lakatatshi akambo wakahombe ndjosalema.” (Isaya 46:9, 10) Diakɔ diele, la ɛkɔkɔ w’eshika, wɛ koka ndjaɛkɛ lo kɛnɛ kata Bible lo kɛnɛ kendana la nshi yayaye.

ƐLƆMBWƐLƆ KAYOKOKIMANYIYA DIA WƐ NKONDJA WAHƆ OMA KO KAKIANƐ NDO PONDJO PONDJO

Etena kayelayɛ ɛlɔmbwɛlɔ katanema l’Afundelo w’ekila, wɛmɛ ayokondja wahɔ. Tɔsɛdingole bɛnyɛlɔ dimɔtshi.

ONGA LA WƐDIMO LO DIKAMBO DIA FALANGA NDO OLIMU

“Ndeka dimɛna monga la yema ya diomuyelo tshitshɛ lo dihole dia monga la olimu efula wa wolo ko tatshanyaka lɔpɛpɛ.”—ONDAKI 4:6.

LƆSƐNƆ LA LO NKUMBO

“Pami tshɛ l’atei anyu pombaka nanga wadɛnde oko wayalangande, ndo wadi lo wedi ande pombaka monga la dilɛmiɛlɔ di’efula otsha le omɛnde.”—ƐFƐSƆ 5:33.

DIƆTƆNGANELO DIA L’ANTO AKINA

“Kimɔ nkɛlɛ ndo tshika odudu; totshimbake wɔɔngɔ ko nkadimɔ dia nsala kɔlɔ.”—OSAMBO 37:8.

Naka wɛ nkamba la kɛnɛ kata Bible kete wɛ ayokondja wahɔ oma ko kakianɛ ndo kayokodiholɛ mboka otsha lo nshi yayaye y’amɛna. Lo Bible, sho tanaka alaka wa Nzambi wendana la nshi yayaye y’amɛna efula

WƆLADI NDO LOTUI TSHITSHI

“Vɔ wayɔngɛnangɛnaka heyama la wɔladi w’efula.”—OSAMBO 37:11.

ONTO TSHƐ AYONGA LA DIHOLE DIA MBIDJASƐ NDO MBO YA NDƐ EFULA

“Vɔ wayoka mvudu ko wayodjasɛka lɔkɔ, ndo vɔ wayokamba dikambɔ dia vinyɔ ko wayɔlɛka elowa w’oma lɔkɔ.”—ISAYA 65:21.

HEMƆ KANA NYƆI HATOYALA NTO

“Nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”—ƐNYƐLƆ 21:4.

Akokayɛ nsala dia wɛ monga l’eshikikelo dia wɛ ayoyokondja nshi yayaye shɔ? Tɔsɛdingole sawo diayela.

a Dia mbeya awui akina wendana l’okadimwelo ndo l’okahanyelo wa Bible, ɔtɔ lo www.jw.org ndo enda lam’ofundjiwɔ WETSHELO WA LO BIBLE > ƆKƆNDƆ & BIBLE.

b Dia mbeya awui efula, enda tshapita 9 ya dibuku La Bible : Parole de Dieu ou des hommes? diakatondjama oma le Ɛmɛnyi wa Jehowa. Diɔ tanemaka l’Ɛtɛrnɛtɛ lo www.jw.org. Ɔtɔ lam’ofundjiwɔ BIBLIƆTƐKƐ > ABUKU & TOBUKUBUKU.