Ɔlɔlɔ la kɔlɔ: Sho koka ndjaɛkɛ lo kɛnɛ kata Bible

Hatokoke ndjashikikɛ di’ɛsɔnwɛlɔ aso wendana la lɔkɛwɔ wayonga l’etombelo w’amɛna naka sho mbasala tsho lo ndjela woho wayaokaso kana wayaoka anto akina. Bible tosholɛka lande na ndo totɛka awui akina efula. Tɔ kekɔ l’atɔndɔ w’eshika wendana la lɔkɛwɔ watokimanyiya dia monga l’ɔngɛnɔngɛnɔ.

ƐLƆMBWƐLƆ KESO L’OHOMBA

Lo Bible, Jehowaa Nzambi nembetshiyaka dia nde nongamɛka di’anto nɔmbwama oma le nde koko aha dia vɔ ndjalɔmbɔla vɔamɛ. (Jɛrɛmiya 10:23) L’ɔtɛ ɔsɔ mbakandatosha atɔndɔ wendana la lɔkɛwɔ watanema lo Bible. Nde mbokaka anto ngandji ndo nangaka dia mbahandola oma l’etombelo wa kɔlɔ waya lo mbɔsa tɛdikɔ ta kɔlɔ. (Eohwelo k’Ɛlɛmbɛ 5:29; 1 Joani 4:8) Laadiko dia laasɔ, oko wende Otungi aso nde ekɔ la lomba ndo ewo kahombama dia tosha alako w’amɛna wendana la lɔkɛwɔ. (Osambo 100:3; 104:24) Koko, Nzambi hatshutshuya pondjo anto la wolo dia nsɛna lo ndjela atɔndɔ ande.

Jehowa akasha pami ka ntondo la womoto la ntondo, Adama l’Eva, ɛngɔ tshɛ kaki lawɔ ohomba dia vɔ monga mɛtɛ l’ɔngɛnɔngɛnɔ. (Etatelo 1:28, 29; 2:8, 15) Nde akawasha nto ɛlɛmbɛ wa wɔdu wakandalongamɛka dia vɔ nkitanyiya. Koko, nde akaatshike dia vɔamɛ nsɔna dia kana wayowakitanyiya kana bu. (Etatelo 2:9, 16, 17) Lonyangu ko, Adam l’Eva wakasɔnɛ dia nsɛna lo ndjela ɛlɛmbɛ awɔ hita lo dihole dia nsɛna lo ndjela ɛlɛmbɛ wa Nzambi. (Etatelo 3:6) Etombelo akɔna waki la dui sɔ? Onde ekɔ dimɛna di’anto nshikikɛ vɔamɛ kɛnɛ kele ɔlɔlɔ la kɛnɛ kele kɔlɔ? Ndooko. Ɔkɔndɔ mɛnyaka dia ntona nkitanyiya ɛlɛmbɛ wa Nzambi hela wɔladi ndo ɔngɛnɔngɛnɔ wa pondjo.—Ondaki 8:9.

Bible toshaka ɛlɔmbwɛlɔ keso l’ohomba dia nsala ɛsɔnwɛlɔ wa lomba wendana la lɔkɛwɔ oyadi dihole tshɛ dieso kana woho w’onto weso. (2 Timɔte 3:16, 17; enda kiombo yele l’ɔtɛ a dui ɔnɛ: “Dibuku di’anto tshɛ.”) Sɛdingola woho wasala Bible dui sɔ.

Eka awui efula wendana l’ɔkɔkɔ wakoka Bible mbelamɛ “Ɔtɛkɛta wa Nzambi.”—1 Tɛsalɔnika 2:13. Enda vidɛo Ele Kiɔkɔ ya Bible? lo jw.org.

ƆKƆKƆ WAFƆNYA ANTO AMƆTSHI DIA BIBLE HAKOKE MBAKIMANYIYA

Anto amɔtshi sɛmaka dia Bible hakoke monga kiɔkɔ y’oshika y’atɔndɔ wendana la lɔkɛwɔ. Vɔ mbishaka tɛkɛ nɛndɛ tele oko tɔnɛ.

Onto ɔmɔtshi mbeyaka mbuta ɔnɛ: “Bible ndjanyaka.”

Mɛtɛ: Avɛsa amɔtshi mɛnamaka oko hawɔtɔnɛ l’avɛsa akina, koko naka wɛ mbeka woho ndo etena kakawafundama kete we ayɛna dia vɔ mɛtɛ mbɔtɔnɛka.

Dia mɛna bɛnyɛlɔ dimɔtshi, adia sawo diele l’ɔtɛ a dui ɔnɛ: “Y a-t-il des contradictions dans la Bible?” lo jw.org.

Onto ɔmɔtshi mbeyaka mbuta ɔnɛ: “Anto wayata dia wekɔ lo ndjela Bible wekɔ lo nsala awui wa kɔlɔ, laasɔ Bible hahombe monga ɔnɔmbɔdi w’oshika wendana la lɔkɛwɔ.”

Mɛtɛ: Bible bu l’onongo wa nkɛwɔ ya kɔlɔ ya wanɛ wahakambe la wetshelo atɔ. Tɔ kakatewoyisha di’anto, mbidja ndo ewandji w’ɛtɛmwɛlɔ wayasɛma dia wekɔ lo ndjela Bible, wayosala akambo wahɔtɔnɛ la kɛnɛ katatɔ. Tɔ mbutaka nto di’etombelo wayonga la dui sɔ ele “anto wayɔtɛkɛta kɔlɔ” dia wetshelo wa lo Bible.—2 Petero 2:1, 2.

Dia mɛna ɛnyɛlɔ kɛmɔtshi ka woho wakangana ewandji w’ɛtɛmwɛlɔ la kɛnɛ ketsha Bible mɛtɛ, adia sawo diele l’ɔtɛ a dui ɔnɛ: “La religion n’est-elle qu’une entreprise commerciale de plus?” lo jw.org.

Onto ɔmɔtshi mbeyaka mbuta ɔnɛ: “Anto wayela Bible hawɔlɛmiya anto wele bu oko vɔ.”

Mɛtɛ: Bible keketshaka dia salɛ anto akina akambo la dilɛmiɛlɔ. Tɔ hetawɔ . . .

ndjaɔsa dia sho ndeka anto akina.—Filipɛ 2:3.
ntona dia nɛmiya anto wotshikitanyi la so waetawɔ.—1 Petero 2:17.
ntshutshuya anto akina dia vɔ mbetawɔ kanyi yaso.—Mateo 10:14

Bible mɛnyaka dia Nzambi salɛka nshi tshɛ anto akambo l’ɔlɔlɔ ndo la losembwe ndo Nzambi nangaka dia sho nsala woho akɔ waamɛ.—Rɔmɔ 9:14.

Dia mbeya awui akina efula, adia sawo diele l’ɔtɛ a dui ɔnɛ: “La tolérance— Quelle aide la Bible peut-elle apporter?” lo jw.org.

WOHO WATOSHOLƐ BIBLE ƐLƆMBWƐLƆ KA NZAMBI

Bible ekɔ ɔkɔndɔ wa mɛtɛ wa woho wasalɛ Jehowa anto akambo. Kɛnɛ katanema lɔkɔ tokimanyiyaka dia nshihodia kɛnɛ kɔsa Nzambi oko ɔlɔlɔ la kɔlɔ, kɛnɛ kakoka monga la wahɔ kana kakoka tosalɛ kɔlɔ. (Osambo 19:7, 11) Sho mbekaka atɔndɔ ande watokimanyiya dia nsala ɛsɔnwɛlɔ wa lomba wendana la lɔkɛwɔ lo lɔsɛnɔ laso la lushi la lushi.

Ɛnyɛlɔ, tɔsɛdingole dako diatanema lo Tokedi 13:20: “Ɔnɛ latɛngɔlaka kaamɛ la akanga wa lomba ayonga kanga lomba, koko ɔnɛ lekesanɛ la akanga wa dinginya ayokomɛ lo kɔlɔ.” Tɔndɔ sɔ diekɔ ohomba lo nshi yaso nyɛ paka oko wakidiɔ ohomba lo nshi y’edjedja. Bible ndola l’atɔndɔ w’amɛna ndo wakoka tokimanyiya.—Enda kiombo yele l’ɔtɛ a dui ɔnɛ: “Lomba la lo Bible lahete loowe.”

Koko wɛ mbeyaka ndjambola ɔnɛ, ‘Ngande wakokami ndjashikikɛ di’atɔndɔ wa lo Bible wendana la lɔkɛwɔ wekɔ ohomba ɛlɔ kɛnɛ?’ Sawo diayela diayotɛnya bɛnyɛlɔ dia mɛtɛ mɛtɛ.

a Jehowa ekɔ lokombo la Nzambi.—Osambo 83:18.

LOMBA LA LO BIBLE LAHETE LOOWE

Kaanga kamboshilaka Bible fundama ambeta ɛnɔnyi oko 2000, tɔ tetemalaka tokimanyiya ɛlɔ kɛnɛ. Kɛnɛ kakombola anto katatshikitana, tekɔ lo ntetemala nyanga lɔsɛnɔ la dimɛna ndo l’ɔngɛnɔngɛnɔ. (Ondaki 1:9) Lomba la lo Bible lahete loowe koka tokimanyiya dia nkotsha oyango ɔsɔ.

Losembwe

“Sho kombolaka monga la losembwe lo akambo tshɛ.”—Hɛbɛru 13:18.
“Ɔnɛ latovaka atovake nto; koko nde akambe efula.”—Ɛfɛsɔ 4:28.

Diɔtɔnganelo dia l’anto akina

“Onto l’onto atetemale nyanga wahɔ w’onto okina, koko aha wahɔ ande hita.” —1 Kɔrɛtɔ 10:24.
“Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu.”—Kɔlɔsayi 3:13.

Woho wa mbɔsa tɛdikɔ

“Kanga enginya atetawɔka ɛtɛkɛta tshɛ, koko kanga kɛsɔ atokanaka yimba lo ena tshɛ katakolande.”—Tokedi 14:15.
“Kanga yewo atɛnaka waale, ko nde atoyashɛka, koko onto lahatahokɔ akambo atotshɔka tsho, ko atodiɛnɛka la etombelo wa kɔlɔ.” —Tokedi 22:3.