Kɛnɛ kalembetshiya dibuku dia Ɛnyɛlɔ lo dikambo dia nshi yayɛ yayaye

1. Naa yɛdikɔ y’ohomba yahomba anto tshɛ mbɔsa?

ƐLƆ kɛnɛ anto wekɔ la yɛdikɔ y’ohomba ya mbɔsa. Onde vɔ wayosukɛ Jehowa Nzambi oko wende Ɔnɔmbɔdi w’andja w’otondo w’ɔlɔlɔ, ko kana vɔ wayosukɛ Satana Diabolo lele otunyi wa kɔlɔ efula? Onto tshɛ pombaka mbeta wedi ɔmɔtshi ndo ndooko lahomba memala l’atei atei. Oyadi yɛdikɔ yakɔna tshɛ yakokawɔ mbɔsa dui sɔ diayonga la shɛngiya lo nshi yawɔ yayaye ya pondjo. (Mat. 25:31-33, 46) Lo “mfɔnu ka woke,” vɔ wayodjama djembetelo dia nshimbamɛ kana dia ndanyema.​—Ɛny. 7:14; 14:9-11; Ɛzk. 9:4, 6.

2. a) Kakɔna katokeketsha Hɛbɛru 10:35-39 dia nsala? b) Ngande wakoka dibuku dia Ɛnyɛlɔ tokimanyiya?

² Adia Hɛbɛru 10:35-39. Naka wɛ akasɔnɛ dia nsukɛ ɛlɔmbwɛlɔ ka Jehowa, kete wɛ akɔshi yɛdikɔ ya lomba. Laasɔ, nkimanyiya anto akina dia vɔ nsala ɔsɔnwɛlɔ wa lomba. Dia nsala dui sɔ, wɛ koka nkamba l’awui wele lo dibuku dia Ɛnyɛlɔ dia mbakimanyiya. Dibuku di’ohomba sɔ tɛnyaka kɛnɛ kayokomɛ atunyi wa Jehowa, koko diɔ tɔtɔmiyaka nto ɛtshɔkɔ wayokondja wanɛ wasukɛ ɛlɔmbwɛlɔ ka Jehowa la kɔlamelo tshɛ. Ekɔ dimɛna dia sho nsɛdingola awui w’ohomba asɔ. Nsala ngasɔ ayokeketsha yɛdikɔ yaso ya ntetemala kambɛ Jehowa. Laadiko dia laasɔ, sho koka nkamba la kɛnɛ kamboteka dia nkimanyiya anto akina dia vɔ mbɔsa yɛdikɔ ya dimɛna ndo ndjikukutɛ.

3. Kakɔna kayotɔsɛdingola lo sawo nɛ?

³ Lo sawo nɛ, tayɔsɛdingola ambola anɛ: Kakɔna kakongɛɛ wanɛ wasukɛ ɛlɔmbwɛlɔ ka Nzambi? Lo wedi okina, kakɔna kayokomɛ wanɛ wasɔna dia nsukɛ nyama ka ngala ka beela, katɛkɛtama lo dibuku dia Ɛnyɛlɔ?

KƐNƐ KAYOKOMƐ WANƐ WELE LA KƆLAMELO LE JEHOWA

4. Olui akɔna wakɛnyi ɔpɔstɔlɔ Joani wemadi kaamɛ la Yeso l’olongo?

⁴ Lo ɛnɛlɔ kɛmɔtshi, ɔpɔstɔlɔ Joani akɛnyi elui ehende wasukɛ ɛlɔmbwɛlɔ ka Jehowa ndo wakondja ɛtshɔkɔ wa lɔsɛnɔ la pondjo. Olui wa ntondo wekɔ l’anto 144 000. (Ɛny. 7:4) Vɔ wakɔsama oma la nkɛtɛ dia tokenga lowandji kana Diolelo kaamɛ la Yeso l’olongo. Kaamɛ la nde, vɔ wayɔlɔmbɔla nkɛtɛ. (Ɛny. 5:9, 10; 14:3, 4) Lo ɛnɛlɔ, Joani akawaɛnyi wemadi kaamɛ la Yeso lo dikona dia Siɔna l’olongo.​—Ɛny. 14:1.

5. Kakɔna kayanga nkomɛ atshikadi w’anto 144 000 keema edja?

⁵ Ntatɛ oma lo nshi y’apɔstɔlɔ polo ɛlɔ kɛnɛ, nunu di’anto diekɔ lo nsɔnama dia tonga l’atei w’anto 144 000. (Luka 12:32; Rɔmɔ 8:17) Koko wakatɛ Joani ɔnɛ paka atshikadi kana anto yema tshitshɛ, mbayonga la lɔsɛnɔ la nkɛtɛ lo nshi y’ekomelo. “Atshikadi” asɔ wayodjama “djembetelo” y’ekomelo yɛnya dia Jehowa ambowaetawɔ la ntondo ka mfɔnu ka woke ntatɛ. (Ɛny. 7:2, 3; 12:17) Oma laasɔ, l’etena kɛmɔtshi lo mfɔnu ka woke, atshikadi asɔ wayɔsama otsha l’olongo dia tonga kaamɛ 144 000, wakashile mvɔ la kɔlamelo. Lɛkɔ vɔ wayotolɛ kaamɛ la Yeso lo Diolelo dia Nzambi.​—Mat. 24:31; Ɛny. 5:9, 10.

6-7. a) Olui akɔna wakɛnyi Joani nto ndo kakɔna kekaso lo dikambo diawɔ? b) Lande na kahomba Ɛnyɛlɔ tshapita 7 mendana l’atshikadi w’akitami ndo la “olui a woke w’anto”?

⁶ L’ɔkɔngɔ wa nde mɛna olui w’anto wayotshɔ l’olongo, Joani akɛnyi “olui a woke w’anto.” Otshikitanyi l’anto 144 000, olui ɔsɔ haweyama mbadiema. (Ɛny. 7:9, 10) Kakɔna kekaso lo dikambo diawɔ? Joani akate ate: “Vɔ wele wanɛ wamboya oma lo mfɔnu ka woke ndo vɔ wakasole ekutu awɔ ndo wakawaɛdia la dikila dia Ɔna Ɔkɔkɔ.” (Ɛny. 7:14) L’ɔkɔngɔ wa vɔ nshimbamɛ lo mfɔnu ka woke, “olui a woke w’anto” ɔsɔ wayɔsɛna la nkɛtɛ ndo wayɔngɛnangɛna l’ɛtshɔkɔ w’amɛna efula.​—Os. 37:9-11, 27-29; Tok. 2:21, 22; Ɛny. 7:16, 17.

⁷ Oyadi takasɔnama dia ntshɔ l’olongo kana dia ntshikala la nkɛtɛ, onde tekɔ lo ndjaɛna l’atei w’anto wɔtɛkɛtami lo Ɛnyɛlɔ tshapita 7? Sho pombaka ndjaɛna. Ande etena k’ɔngɛnɔngɛnɔ kayonga l’elui akɔ ehende w’ekambi wa Nzambi lee! Tayonga l’ɔngɛnɔngɛnɔ w’efula l’ɔtɛ wakatasɔnɛ dia nsukɛ ɛlɔmbwɛlɔ ka Jehowa. Kakɔna nto katotɛ dibuku dia Ɛnyɛlɔ lo kɛnɛ kendana la mfɔnu ka woke?​—Mat. 24:21.

KƐNƐ KAYOKOMƐ WANƐ WALƆSHANA LA NZAMBI

8. Ngande wayotatɛ mfɔnu ka woke ndo kakɔna kayosala anto efula?

⁸ Oko wakadiatɛkɛtama lo sawo dietshi, keema edja atshunda wa pɔlitikɛ wa l’andja ɔnɛ wayokadimwɛ Babilɔna ka woke, tshunda di’ɛtɛmwɛlɔ wa kashi wa l’andja w’otondo. (Ɛny. 17:16, 17) Dui sɔ mbayonga etatelo ka mfɔnu ka woke. Onde dui sɔ diayokonya anto efula dia ntatɛ ntɛmɔla Jehowa? Ndooko. Lo dihole dia vɔ nsala ngasɔ, Ɛnyɛlɔ tshapita 6 mɛnyaka dia l’etena ka paa kɛsɔ, anto wahakambɛ Jehowa wayoyanga ekokelo oma le atshunda wa pɔlitikɛ ndo w’amundji w’okanda wa l’andja ɔnɛ wɛdikama l’akona. Lam’ele anto asɔ hawotosukɛ Diolelo dia Nzambi, Jehowa ayowaɔsa dia vɔ wekɔ andɔshi ande.​—Luka 11:23; Ɛny. 6:15-17.

9. Ngande wayotshikitana ekambi wa Jehowa l’anto akina lo mfɔnu ka woke ndo etombelo akɔna wayonga la dui sɔ?

⁹ Lo mɛtɛ, ekambi wa Jehowa wa kɔlamelo wayotshikitana l’anto akina l’etena ka paa ka mfɔnu kɛsɔ. Vɔ wayotshikala tshɔi y’olui w’anto wakambɛ Jehowa Nzambi lanɛ la nkɛtɛ ndo vɔ hawotosukɛ “nyama ka ngala.” (Ɛny. 13:14-17) Woho wayowotshikala nge ɔsɔ ayokonya wanɛ walɔsha Jehowa dia momala. Etombelo wayonga la dui sɔ ele, osanga wa wedja wayɔlɔsha ekambi wa Nzambi wa lo nkɛtɛ k’otondo. Bible mbelɛka ɔlɔshamelo ɔsɔ ta dia Ngɔngɔ ka la Mangɔngɔ.​—Ɛzk. 38:14-16.

10. Oko wadiɛnya Ɛnyɛlɔ 19:19-21, kakɔna kayosala Jehowa lo ta diayɔlɔshama ekambi ande?

¹⁰ Kakɔna kayosala Jehowa lo ta dia wolo sɔ? Nde totɛka ɔnɛ: “Nkɛlɛ kami k’efula kayodɔdɔ.” (Ɛzk. 38:18, 21-23) Ɛnyɛlɔ tshapita 19 mɛnyaka kɛnɛ kayosalema oma laasɔ. Jehowa ayotoma Ɔnande dia ndjoshimbɛ ekambi Ande ndo dia ndjɔlɛndja atunyi awɔ. “Alembe wa l’olongo” wayokengama l’andjelo wa kɔlamelo kaamɛ l’anto 144 000 dia ndɔsha Ngɔngɔ ka la Mangɔngɔ. (Ɛny. 17:14; 19:11-15) Ko etombelo akɔna wayonga la ta sɔ? Elanyelo k’anto tshɛ ndo k’atshunda walɔshana la Jehowa!​—Adia Ɛnyɛlɔ 19:19-21.

L’ƆKƆNGƆ WA TA, DIWALA DIAYOSALEMA

11. Naa dui dia laande di’ohomba diatɛkɛtama lo dibuku dia Ɛnyɛlɔ?

¹¹ Ohokanyiya woho wayoyaoka anto wele la kɔlamelo la nkɛtɛ etena kayowohandɔ lam’ayolanyema atunyi wa Nzambi tshɛ! Ande ɔngɛnɔngɛnɔ wayonga l’etena kɛsɔ lee! Kaanga mbele ayonga ekoko w’ɔngɛnɔngɛnɔ l’olongo lam’ayolanyema Babilɔna ka Woke, ekɔ dui dikina diayotosha ɔngɛnɔngɛnɔ woleki. (Ɛny. 19:1-3) Ɔsɔ ekɔ dui di’ɔngɛnɔngɛnɔ diatɛkɛtama lo dibuku dia Ɛnyɛlɔ, “diwala dia Ɔna Ɔkɔkɔ.”​—Ɛny. 19:6-9.

12. Oko wadiɛnya Ɛnyɛlɔ 21:1, 2, etena kakɔna kayosalema diwala dia Ɔna Ɔkɔkɔ?

¹² Etena kakɔna kayosalema diwala sɔ? Anto 144 000 tshɛ wayonga l’olongo yema la ntondo ka ta di’Aramangɛndɔna ntatɛ. Koko, aha l’etena kɛsɔ mbayosalema diwala dia Ɔna Ɔkɔkɔ. (Adia Ɛnyɛlɔ 21:1, 2.) Diwala dia Ɔna Ɔkɔkɔ diayosalema l’ɔkɔngɔ wa ta di’Aramangɛdɔna ndɔma ndo w’atunyi wa Nzambi tshɛ ndanyema.​—Os. 45:3, 4, 13-17.

13. Kakɔna mɛtɛ kalembetshiya diwala dia Ɔna Ɔkɔkɔ le wanɛ wendana la dui sɔ?

¹³ Kakɔna mɛtɛ kalembetshiya diwala dia Ɔna Ɔkɔkɔ le wanɛ wendana la dui sɔ? Eelo, oko watokakatanyaka diwala pami la womoto, mbele diwala dia didjidji sɔ diayokakatanya Yeso Kristo Nkumekanga la “otshukami” ande, mbuta ate anto 144 000. Dui sɔ mbayosala dia lowandji l’oyoyo layɔlɔmbɔla nkɛtɛ ɛnɔnyi 1 000 kengama.​—Ɛny. 20:6.

OSOMBA WA LOTOMBO NDO NSHI YAYƐ YAYAYE

14-15. Ɛnyɛlɔ tshapita 21 mbɛdikaka anto 144 000 la na? (Enda osato wele lo lohoso.)

¹⁴ Oma laasɔ, Ɛnyɛlɔ tshapita 21 mbɛdikaka anto 144 000 l’osomba woleki olangala tshɛ welɛwɔ “Jɛrusalɛma y’Oyoyo.” (Ɛny. 21:2, 9) Osomba ɔsɔ mpikama l’ave 12 w’ehikamelo “nkombo 12 y’apɔstɔlɔ 12 w’Ɔna Ɔkɔkɔ fundama lɔkɔ.” Lande na kele dui sɔ diakakutola yambalo yaki Joani? Nɛ dia nde akɛnyi lokombo lande fundama lo dive dimɔtshi l’atei w’ave akɔ. Ɔsɔ aki diɛsɛ dia woke efula mɛtɛ!​—Ɛny. 21:10-14; Ɛf. 2:20.

¹⁵ Osomba wa didjidji ɔsɔ bu oko osomba akɔna tshɛ. Vɔ wekɔ la shinga ya woke ya paonyi ka pudipudi, nkuke 12 y’adidi, mpele ndo dihikamelo diakalɛngama l’ave w’eshinga wolo la tɛdikɔ ta kokele. (Ɛny. 21:15-21) Koko, Joani akɛnyi di’ɛngɔ kɛmɔtshi kakahombamaka! Tolonge kɛnɛ katotɛ Joani oma laasɔ. Nde mbutaka ate: “Dimi kɔmɛna tɛmpɛlɔ lɔkɔ, nɛ dia Jehowa Nzambi Kanga-Wolo-Tshɛ ndo Ɔna Ɔkɔkɔ mbele tɛmpɛlɔ kawɔ. Ndo osomba komonga l’ohomba w’osase wa wonya kana wa ngɔndɔ mpɛta lɔkɔ, nɛ dia lotombo la Nzambi lakɔɔhɛtshɛka osase ndo Ɔna Ɔkɔkɔ mbaki tala diawɔ.” (Ɛny. 21:22, 23) Wanɛ wakenga Jɛrusalɛma y’Oyoyo wayonga la lotshungɔ la nkoma le Jehowa. (Hɛb. 7:27; Ɛny. 22:3, 4) Ɔnkɔnɛ, Jehowa nde la Yeso mbele tɛmpɛlɔ k’osomba ɔsɔ.

16. Kakɔna kayokomɛ anto l’Ɛlɔmbwɛlɔ k’ɛnɔnyi kinunu ka Diolelo dia Nzambi?

¹⁶ Akitami mongaka l’ɔngɛnɔngɛnɔ efula etena kakanyiyawɔ dikambo di’osomba ɔsɔ. Koko wanɛ wele l’elongamelo ka nsɛna la nkɛtɛ wekɔ vɔ lawɔ l’ɔkɔkɔ wa ndjasha lo dui sɔ. L’Ɛlɔmbwɛlɔ k’ɛnɔnyi kinunu ka Diolelo dia Nzambi, Jɛrusalɛma y’oyoyo yayela anto ɛtshɔkɔ waheyama mbuta. Joani akɛnyi ɛtshɔkɔ ɛsɔ wakɛla oko “ɔkɛdi w’ashi wa lɔsɛnɔ.” Ndo lo wedi akɔ ehende w’ɔkɛdi akɔ “esongo wa lɔsɛnɔ” wakatondjaka akatshi dikambo dia “ɛkɔnwɛlɔ ka wedja.” (Ɛny. 22:1, 2) Anto tshɛ wayonga la lɔsɛnɔ l’etena kɛsɔ wayokondja wahɔ oma lo diangɔ di’amɛna sɔ. Yema yema, anto tshɛ wakitanyiya Jehowa wayokoma kokele. Hemɔ hatoyala nto, kandji hatoyala nto ndo ndooko onto layɔkɛdia wasɔyi w’ɔkɛyi nto.​—Ɛny. 21:3-5.

17. Oko wadiɛnya Ɛnyɛlɔ 20:11-13, waa na wayokondja wahɔ oma lo Ɛlɔmbwɛlɔ k’ɛnɔnyi kinunu?

¹⁷ Waa na wayokondja wahɔ oma l’awui w’amɛna asɔ? Ntondotondo olui a woke w’anto wayohandɔ oma l’Aramangɛdɔna, ndo ana wakoka mbotɔ l’andja w’oyoyo. Koko Ɛnyɛlɔ tshapita 20 ndakaka nto di’anto wakavu wayolɔ. (Adia Ɛnyɛlɔ 20:11-13.) “Anto w’ɛlɔlɔ” waki la kɔlamelo wakavu lo nshi yakete ndo “anto wa kɔlɔ” waki kokondja diaaso dia mbeka akambo wa mɛtɛ wendana la Jehowa, vɔ tshɛ wayolɔ dia ndjɔsɛna lanɛ la nkɛtɛ. (Ets. 24:15; Jni. 5:28, 29) Onde dui sɔ nembetshiyaka di’onto tshɛ ayolɔ dia ndjɔsɛna la nkɛtɛ l’Ɛlɔmbwɛlɔ k’ɛnɔnyi kinunu? Ndooko. Wanɛ wakatone l’ohindodi tshɛ diaaso diakawakondja dia kambɛ Jehowa la ntondo ka vɔ mvɔ hawotolɔ dia ndjɔsɛna lanɛ la nkɛtɛ. Vɔ wakakondja diɛsɛ koko wakɛnya dia vɔ hawosungana dia ndjɔsɛna lo Paradiso ka lanɛ la nkɛtɛ.​—Mat. 25:46; 2 Tɛs. 1:9; Ɛny. 17:8; 20:15.

ETOMBELO W’EKOMELO

18. Ngande wayonga anto la nkɛtɛ l’ekomelo k’ɛnɔnyi 1 000?

¹⁸ L’ekomelo k’ɛnɔnyi 1 000, wanɛ tshɛ wayɔsɛna la nkɛtɛ wayokoma kokele. Ndooko onto layɔsɛna la nkɛtɛ layonga la shɛngiya ya pɛkato kakatahowɔ oma le Adama. (Rɔmɔ 5:12) Mananu ka pɛkato k’oma le Adama kayonyɛma tshɛ lo tshɛ. Lo yoho shɔ mbele, wanɛ wayodjasɛ la nkɛtɛ ‘wayonga la lɔsɛnɔ’ nɛ dia vɔ wayonga anto wa kokele l’ekomelo k’ɛnɔnyi 1 000.​—Ɛny. 20:5.

19. Lande na kele ekɔ ohomba di’ohemba w’ekomelo monga?

¹⁹ Sho mbeyaka dia Yeso akashike ntanga la ntondo ka welo wakadje Satana dia mbokonya dia nde nshisha olowanyi ande. Nde akatshikala la kɔlamelo la ntondo k’ehemba ɛsɔ. Ko onde anto wa kokele tshɛ wayosala ngasɔ etena kayokondja Satana diaaso dia mbahemba? Onto tshɛ ayonga l’akoka wa nkadimola lo dimbola sɔ ndamɛ etena kayotshungɔ Satana oma lo difuku diaha l’ekomelo, l’ekomelo k’ɛnɔnyi 1 000. (Ɛny. 20:7) Wanɛ wayotshikala la kɔlamelo l’ohemba w’ekomelo ɔsɔ wayokondja lɔsɛnɔ la pondjo ndo l’ekomelo a shimu wayokondja lotshungɔ la mɛtɛ. (Rɔmɔ 8:21) Wanɛ wayɔtɔmbɔkɔ wayolanyema pondjo kaamɛ la Diabolo nde la ɛdiɛngɛ ande.​—Ɛny. 20:8-10.

20. Ngande wayaokayɛ lo kɛnɛ kendana la prɔfɛsiya y’amɛna yatanema lo dibuku dia Ɛnyɛlɔ?

²⁰ Ngande wayaokayɛ l’ɔkɔngɔ w’ɔsɛdingwelo wa lo tshena pe wa dibuku dia Ɛnyɛlɔ? Onde wɛ bu l’ɔngɛnɔngɛnɔ dia ndjaɛna lo prɔfɛsiya y’amɛna shɔ? Onde dui sɔ hakotshutshuya dia mbelɛ anto akina dia vɔ monga kaamɛ laso l’ɔtɛmwɛlɔ wa pudipudi wa Nzambi kaso? (Ɛny. 22:17) Etena kɛnɛ kambotɔsɛdingola awui asɔ wayosalema lo nshi yayaye, tekɔ l’ɔngɛnɔngɛnɔ ndo sho nangaka mbuta oko wakate ɔpɔstɔlɔ Joani ate: “Amɛɛ. Nkumadiɔndjɔ Yeso yaka.”​—Ɛny. 22:20.