Kɛnɛ kalembetshiya dibuku dia Ɛnyɛlɔ le yɛ ɛlɔ kɛnɛ

1-2. L’ɔtɛ w’ɔkɔkɔ akɔna ɔmɔtshi wahombaso ndjasha lo dibuku di’Ɛnyɛlɔ?

ONDE wambokɔlɔmbaka lushi lɔmɔtshi dia menda albumu wa foto w’onto ɔmɔtshi? Etena katayende foto shɔ, wɛ ekɔ lo taleke mɛna dungi di’anto wahayeye. Koko foto kɛmɔtshi ka laande kambokotola yambalo yayɛ. Lande na? Nɛ dia wɛ ekɔ lo foto kɛsɔ. Etena kakiendayɛ, wɛ osala la wolo dia mbohɔ etena ndo dihole diakɔsama foto kakɔ. Wɛ osala nto la wolo dia mbeya onto tshɛ lele lo foto kakɔ. Foto kɛsɔ kaya ohomba efula le yɛ.

² Dibuku di’Ɛnyɛlɔ diekɔ oko foto kɛsɔ. Lande na? L’ɔtɛ w’ɛkɔkɔ ehende. Ntondotondo, dibuku dia lo Bible sɔ diakafundama lo dikambo diaso. Lo divɛsa dia ntondo dia dibuku sɔ, sho mbadiaka ɔnɛ: “Woshwelo wa Yeso Kristo wakawosha Nzambi dia mɛnya ekambi ande akambo wahomba salema keema edja.” (Ɛny. 1:1) Ɔnkɔnɛ, kɛnɛ kofundami lo dibuku sɔ hendana l’anto lo tshɛ kawɔ, koko tɔ mendanaka la so, sho ekambi wa Nzambi wakayakimɔ le nde. Oko weso ekambi wa Nzambi, sho hatambe dia mbishola dia tekɔ lo mbisha lonya l’okotshamelo wa prɔfɛsiya yatanema lo dibuku dia diambo sɔ. L’ɛtɛkɛta ekina, sho ndjaɛnaka dia tekɔ lo foto.

3-4. Lo ndjela dibuku di’Ɛnyɛlɔ, etena kakɔna kakahombe kotshama prɔfɛsiya ya lɔkɔ ndo dui sɔ pombaka totshutshuya sho tshɛ onto l’onto dia nsala na?

³ Ɔkɔkɔ wa hende mendanaka la etena kakotshama prɔfɛsiya shɔ. Ɔpɔstɔlɔ Joani laki aya osombe akɛnya etena kakahombe kotshama prɔfɛsiya shɔ lo mbuta ate: “Lo wolo wa nyuma dimi kakatanema lo lushi la Nkumadiɔndjɔ.” (Ɛny. 1:10) Etena kakafunde Joani ɛtɛkɛta ɛsɔ oya lo 96 T.D., ko “lushi la Nkumadiɔndjɔ” laki leke etale. (Mat. 25:14, 19; Luka 19:12) Koko lo ndjela prɔfɛsiya ya lo Bible, lushi lɔsɔ lakatatɛ lo 1914 etena kakonge Yeso Nkumekanga l’olongo. Ntatɛ oma l’ɔnɔnyi ɔsɔ, prɔfɛsiya ya l’Ɛnyɛlɔ, yendana l’ekambi wa Nzambi yakatatɛ kotshama. Eelo, tekɔ lo nsɛna kakianɛ lo “lushi la Nkumadiɔndjɔ”!

⁴ Lam’ele tekɔ lo nsɛna l’etena kasalema akambo wa diambo, sho tekɔ anto wahomba mbidja yimba lo yoho ya laande lo dako dioludi la ngandji dia lo Ɛnyɛlɔ 1:3 diata ɔnɛ: “Ɔngɛnɔngɛnɔ le ɔnɛ ladia la dui dia wolo ndo wanɛ woka ɛtɛkɛta wa prɔfɛsiya kɛnɛ ndo wakitanyiya akambo wofundami lɔkɔ, nɛ dia etena kakashikikɛma kaya suke.” Lo mɛtɛ, sho pombaka ‘mbadia la dui dia wolo,’ ‘mboka ɛtɛkɛta wa prɔfɛsiya kɛnɛ,’ ndo ‘mbaakitanyiya.’ Naa ɛtɛkɛta ɛmɔtshi l’atei w’ɛtɛkɛta ɛsɔ wahombaso nkitanyiya?

YASHIKIKƐ DI’ƆTƐMWƐLƆ AYƐ MBETAWƆMAKA

5. Ngande watɔtɔmiya dibuku di’Ɛnyɛlɔ ohomba wa ntetemala ndjashikikɛ di’ɔtɛmwɛlɔ aso mbetawɔmaka le Jehowa?

⁵ Oma ko tshapita ya ntondo y’Ɛnyɛlɔ, sho mbekaka dia Yeso mbeyaka dimɛna dimɛna kɛnɛ kasalema lo tshumanelo di’ekambi ande. (Ɛny. 1:12-16, 20; 2:1) Yeso akɛnya dikambo sɔ oma lo awui wakandatomɛ tshumanelo esambele dia l’Asie mineure. Lo awui wakandaatomɛ asɔ, nde akasha ɛlɔmbwɛlɔ ka shikaa dia nkimanyiya Akristo wa lo ntambe ka ntondo dia vɔ ndjashikikɛ ɔnɛ ɔtɛmwɛlɔ awɔ mbetawɔmaka le Jehowa. Ndo nto, kɛnɛ kotami l’awui asɔ mendanaka l’ekambi tshɛ waki Nzambi wa nshi nyɛ. Naa wetshelo wakondjaso? Ɔnɔmbɔdi aso Yeso Kristo mbeyaka dimɛna woho wele lonyuma laso. Nde tɔlɔmbɔlaka ndo tokokɛka ndo nde mɛnaka awui tshɛ. Nde mbeyaka kɛnɛ kahombaso nsala dia sho ntetemala mbetawɔma le Jehowa. Ɛlɔmbwɛlɔ kakɔna kakandasha kahombaso ndjela ɛlɔ kɛnɛ?

6. a) Oko wadiɛnya Ɛnyɛlɔ 2:3, 4, naa okakatanu wa woke wakɛnya Yeso lo losango lakandatomɛ etshumanelo ka l’Ɛfɛsɔ? b) Wetshelo akɔna wakondjaso oma lo dikambo sɔ?

⁶ Adia Ɛnyɛlɔ 2:3, 4. Hatohombe nshisha ngandji kaso ka ntondo kakatoke Jehowa. Losango laki Yeso le etshumanelo ka l’Ɛfɛsɔ lakɛnya dia vɔ waki la ekikelo ndo wakatetemala kambɛ Jehowa aha la mpekɔ kaanga l’atei w’ekakatanu wotshikitanyi. Kaanga mbakidiɔ ngasɔ, vɔ wakashisha ngandji kawɔ ka ntondo. Vɔ wakahombe nkaloya ngandji kɛsɔ diaha ɔtɛmwɛlɔ awɔ ndjoonga ko hetawɔma nto. Woho akɔ waamɛ mbele ɛlɔ kɛnɛ, sho pombaka nsala akambo efula, koko aha mbikikɛka tsho. Sho pombaka mbikikɛ l’ɛkɔkɔ w’amɛna. Nzambi kaso ndjashaka aha tsho lo kɛnɛ kasalaso, koko ndo lo ɔkɔkɔ wakisalaso. Eyango aso wekɔ ohomba efula le nde nɛ dia nde nongamɛka di’ɔtɛmwɛlɔ aso mpikama lo ngandji k’efula kawokaso ndo lo lowando l’efula lele laso le nde.​—Tok. 16:2; Makɔ 12:29, 30.

7. a) Oko wadiɛnya Ɛnyɛlɔ 3:1-3, okakatanu akɔna wakɛnyi Yeso le etshumanelo ka la Saradi? b) Kakɔna kahombaso nsala?

⁷ Adia Ɛnyɛlɔ 3:1-3. Sho pombaka ntetemala nsungukala ndo mambalɛ. Ase etshumanelo ka la Saradi waki l’okakatanu wotshikitanyi. Kaanga mbakawahɛtahɛtaka lo nyuma lo nshi yakete, vɔ wakayotatɛ mbɔla l’olimu wakawakambɛka Nzambi. Ɔnkɔnɛ, Yeso akawatɛ dia vɔ ‘memɔ.’ Wetshelo akɔna wakondjaso? Lo mɛtɛ, Jehowa hatohɛ olimu aso. (Hɛb. 6:10) Koko, hatokoke tsho ndjaɛkɛ lo kɛnɛ kakatasale l’olimu wa Jehowa lo nshi yakete. Kaanga mbakokaso monga l’elelo efula nshi nyɛ oleki nshi ya ntondo, sho pombaka ntetemala monga l’akambo efula wa nsala “l’olimu wa Nkumadiɔndjɔ,” lo ntetemala nsungukala ndo mambalɛ polo l’ekomelo.​—1 Kɔr. 15:58; Mat. 24:13; Makɔ 13:33.

8. Wetshelo akɔna wakondjaso oma l’ɛtɛkɛta wakawatɛ anangɛso waki la Laodikiya watanema lo Ɛnyɛlɔ 3:15-17?

⁸ Adia Ɛnyɛlɔ 3:15-17. Sho pombaka monga l’ohetoheto ndo ntɛmɔla Jehowa l’otema aso tshɛ. Losango laki Yeso otsha le Akristo wa la Laodikiya lakɛnya okakatanu wotshikitanyi waki la wɔ. Vɔ waki “djungudungu” l’ɔtɛmwɛlɔ awɔ. L’ɔtɛ wa wendjudi awɔ, Yeso akawatɛ dia vɔ waki ‘ase paa ndo ase kɛtshi.’ Vɔ wakahombe monga l’ohetoheto w’efula lo dikambo dia Jehowa ndo di’ɔtɛmwɛlɔ ande. (Ɛny. 3:19) Wetshelo akɔna wakondjaso? Naka tamboshisha ohetoheto aso, kete sho pombaka monga la lowando lo diangɔ tshɛ di’amɛna diatosha Jehowa ndo okongamelo ande. (Ɛny. 3:18) Hatohombe pondjo nkombola dia oyango wa monga la lɔsɛnɔ la dimɛna mbekola timba taso, lo tokonya dia sho mbetsha awui wa lo nyuma lo dihole dia hende.

9. Oko wadiɛnya nsango yakatomɛ Yeso Akristo wa la Pɛrgamɛ ndo wa la Tiyatira, waale akɔna wahombaso mbewɔ?

⁹ Sho pombaka ntona wetshelo wa waa apɔsta. Yeso akahangwɛ Akristo amɔtshi wa la Pɛrgamɛ lo woho wakawadjaka diatɔnelo ndo wakawatonge taato t’ɛtɛmwɛlɔ. (Ɛny. 2:14-16) Nde akaandola Akristo wa la Tiyatira wakewɔka “akambo wa lotshimola wa Satana” ndo nde akaakeketsha dia ‘nkukutɛ’ akambo wa mɛtɛ. (Ɛny. 2:24-26) Akristo wa lɛkɔ wanɛ waki wɔdu lo nyuma ndo wakatatɛ ndjela wetshelo wa kashi wakahombe ndjatshumoya. Ko kayotota dikambo diaso ɛlɔ kɛnɛ? Sho pombaka ntona wetshelo tshɛ walɔshana la tokanyi ta Jehowa. Waa apɔsta mbeyaka monga la “ɛnamelo k’anto wayasha l’awui wa Nzambi,” koko vɔ ‘mangunaka wolo ande.’ (2 Tim. 3:5) Bu wolo mbeya wetshelo wa kashi ndo ntona wetshelo akɔ naka tekɔ ambeki w’eshika w’Ɔtɛkɛta wa Nzambi.​—2 Tim. 3:14-17; Judɛ 3, 4.

10. Naa wetshelo okina wakokaso nkondja oma lo kɛnɛ kakatɛ Yeso etshumanelo ka la Pɛrgamɛ ndo ka la Tiyatira?

¹⁰ Sho hatohombe ndjasha lo weho tshɛ w’awui wa mindo, mbasukɛ kana mbaetawɔ. Etshumanelo ka la Pɛrgamɛ ndo ka la Tiyatira waki la okakatanu okina. Yeso akaanya anto amɔtshi wa lo tshumanelo sɔ l’ɔtɛ wakiwɔ kotona awui wa mindo. (Ɛny. 2:14, 20) Wetshelo akɔna wakondjaso? Tatolongamɛke dia Jehowa ayetawɔ dia sho ndjakimɔ lo weho ɛmɔtshi w’awui wa mindo, oyadi tambookambɛ l’edja k’ɛnɔnyi efula kana tekɔ l’ɛkɛndɛ l’etena kɛnɛ. (1 Sa. 15:22; 1 Pe. 2:16) Nde nongamɛka dia sho ntetemala nɛmiya atɔndɔ ande wa laadiko wendana la lɔkɛwɔ oyadi polo lo yɛdikɔ yakɔna yambolana atɔndɔ wendana la lɔkɛwɔ l’andja ɔnɛ.​—Ɛf. 6:11-13.

11. Kakɔna kambotɛna polo lanɛ? (Enda ndo kiombo yele l’ɔtɛ a dui ɔnɛ: “Wetshelo le so ɛlɔ kɛnɛ.”)

¹¹ Lo tshena pe, awui akɔna wambotɛna polo lanɛ? Tambɛna ohomba wa ndjashikikɛ di’ɔtɛmwɛlɔ aso mbetawɔmaka le Jehowa. Naka tekɔ lo nsala dui dimɔtshi diakoka nkonya diaha ɔtɛmwɛlɔ aso mbetawɔma le Jehowa, kete sho pombaka mbɔsa yɛdikɔ aha la ntshimbatshimba dia mbidja akambo l’ɔnɔngɔ. (Ɛny. 2:5, 16; 3:3, 16) Koko, Yeso akate dui dikina lo nsango yande otsha le tshumanelo. Naa dui diakɔ?

ONGA SUKE DIA MBIKIKƐ ƐHƐNYƆHƐNYƆ

12. Kakɔna kakatɛ Yeso anangɛso wa la Simirnɛ ndo wa la Filadɛlfiya kahomba monga la wahɔ le so ɛlɔ kɛnɛ? (Ɛnyɛlɔ 2:10)

¹² Nyɛsɔ tɔsɛdingole kakianɛ losango la Yeso otsha le etshumanelo ka la Simirnɛ ndo ka la Filadɛlfiya. Nde akatɛ Akristo wa lo tshumanelo sɔ diaha mboka ɛhɛnyɔhɛnyɔ wɔma, nɛ dia vɔ wayofutama l’ɔtɛ wa kɔlamelo yawɔ. (Adia Ɛnyɛlɔ 2:10; 3:10) Wetshelo akɔna wakondjaso ɛlɔ kɛnɛ? Sho pombaka nongamɛ ɛhɛnyɔhɛnyɔ ndo monga suke dia mbikikɛ ɛhɛnyɔhɛnyɔ akɔ. (Mat. 24:9, 13; 2 Kɔr. 12:10) Lande na kele ɔhɛmwɛlɔ ɔnɛ ohomba?

13-14. Shɛngiya yakɔna yambonga l’awui wɔtɛkɛtami lo Ɛnyɛlɔ tshapita 12 le ekambi wa Nzambi?

¹³ Dibuku di’Ɛnyɛlɔ tewoyaka di’ekambi wa Nzambi wayɔhɛnyahɛnyama lo nshi yaso nyɛ, mbuta ate lo “lushi la Nkumadiɔndjɔ.” Ɛnyɛlɔ tshapita 12 tɛkɛtaka dia ta diakonge l’olongo mbala kakɔ ɔtɔi l’ɔkɔngɔ wa eotwelo ka Diolelo dia Nzambi. Mikayɛlɛ, mbuta ate Yeso Kristo la alembe ande wakalɔ la Satana nde la ɛdiɛngɛ ande. (Ɛny. 12:7, 8) Etombelo wakayala ele, atunyi wa Nzambi asɔ wakalɛndjama ndo wakakashema l’emamu wa nkɛtɛ, ndo dui sɔ diakela asui waheyama mbuta la nkɛtɛ ndo le anto wa la nkɛtɛ. (Ɛny. 12:9, 12) Ko shɛngiya yakɔna yele la dikambo sɔ le ekambi wa Nzambi?

¹⁴ Oma laasɔ, dibuku di’Ɛnyɛlɔ totɛka kɛnɛ kakasale Satana. Nde aya bu l’akoka wa mbɔtɔ l’olongo, laasɔ nde ambotshola nkɛlɛ kande tshɛ le atshikadi w’akitami, wanɛ wele enyimpala wa Diolelo dia Nzambi lanɛ la nkɛtɛ ndo wanɛ “wakamba olimu wa nsambisha dikambo dia Yeso.” (Ɛny. 12:17; 2 Kɔr. 5:20; Ɛf. 6:19, 20) Ngande wakakotshama prɔfɛsiya kɛnɛ?

15. Waa na wele didjidji dia “ɛmɛnyi 2” wɔtɛkɛtami lo Ɛnyɛlɔ tshapita 11 ndo kakɔna kakaakomɛ?

¹⁵ Satana akasale di’anangɛso w’akitami walɔmbɔla olimu w’esambishelo ka Diolelo ndɔshama. Apami asɔ waki didjidji dia “ɛmɛnyi 2” wɔtɛkɛtami lo dibuku di’Ɛnyɛlɔ watawɔ ɔnɛ wakadiakema.b (Ɛny. 11:3, 7-11) Lo 1918, wakasɔngwɛ anangɛso enanɛi waki la ɛkɛndɛ awui wa kashi ndo wakafundɛ ɔmɔmɔ wa l’atei awɔ lokanu l’ɛnɔnyi efula. Lo kanyi y’anto, akɛnama di’olimu w’akitami asɔ ‘wambodiakema.’

16. Dui diakɔna diaki konongamɛka anto diakasalema lo 1919, ko kakɔna kakatetemala Satana nsala ntatɛ oma k’etena kɛsɔ?

¹⁶ Prɔfɛsiya ka lo Ɛnyɛlɔ tshapita 11 kakate nto dia “ɛmɛnyi 2” wayolwama l’ɔkɔngɔ wa tshanda ya tshitshɛ. L’okotshamelo wa dikambo sɔ, dui dimɔtshi dia diambo diakasalema ɔnɔnyi wakayele wodjamelo awɔ lo lokanu. L’etatelo ka 1919, anangɛso w’akitami asɔ wakatondjama oma lo lokanu ndo l’ɔkɔngɔ diko wakanya kibawo kakawawadje. Mbala kakɔ ɔtɔi, anangɛso wakakalolɛ olimu awɔ, mbuta ate olimu wa Diolelo. Koko dui sɔ koshimba Satana dia ndɔsha ekambi wa Nzambi. Oma k’etena kɛsɔ, Satana akatsholɛ ekambi wa Nzambi tshɛ ɛhɛnyɔhɛnyɔ oko “ɔkɛdi.” (Ɛny. 12:15) Lo mɛtɛ, “dui sɔ nɔmbaka [ɔmɔmɔ wa l’atei aso dia] monga la ekikelo ndo la mbetawɔ.”​—Ɛny. 13:10.

TOYASHA TSHƐ L’OLIMU WAKATOSHA JEHOWA

17. Naa ekimanyielo kaki konongamɛka ekambi wa Nzambi kakawalongola, kaanga mbakasɔmanaka Satana la wɔ dia mbalɔsha?

¹⁷ Oma laasɔ, Ɛnyɛlɔ tshapita 12 mɛnyaka di’ekambi wa Nzambi wakahombe nongola yema y’ekimanyielo oma lo kiɔkɔ mɔtshi yakiwɔ konongamɛka. Akahombe monga oko “nkɛtɛ” yambɔmɛna “ɔkɛdi” w’ɛhɛnyɔhɛnyɔ. (Ɛny. 12:16) Kɛsɔ mɛtɛ mbakasalema. Lo tena dimɔtshi, akongɛ amɔtshi wamboshikimala wolo l’andja wa Satana, ɛnyɛlɔ oko akongɛ amɔtshi w’awui wa dombo, wakakimanyiya ekambi wa Nzambi. Mbala ko mbala, ekambi wa Jehowa wakadje etshumba lo dombo ndo wakayokondja yema ya lotshungɔ la nsala awui amɔtshi. Ngande wakawakambe la lotshungɔ lakɔ? Vɔ wakakambe la diaaso tshɛ diakawakondjaka dia nkamba olimu wakawasha Jehowa. (1 Kɔr. 16:9) Ko olimu ɔsɔ wakendanaka la dui diakɔna?

18. Naa olimu wa ntondo wakambaso lo nshi y’ekomelo nyɛ?

¹⁸ Yeso akatatshi di’ekambi ande wayewoya “lokumu l’ɔlɔlɔ lɔnɛ la Diolelo [dia Nzambi]” lo nkɛtɛ k’otondo la ntondo k’ekomelo ndja. (Mat. 24:14) Lo nsala ngasɔ, vɔ kondjaka wahɔ oma l’osukɔ w’ondjelo kana w’olui w’andjelo wele la “lokumu l’ɔlɔlɔ la pondjo lakandahombe mbewoya wanɛ wodjashi la nkɛtɛ, wedja tshɛ ndo waoho tshɛ ndo ɛtɛkɛta tshɛ ndo weho w’anto tshɛ.”​—Ɛny. 14:6.

19. Naa losango lokina lahomba wanɛ woka Jehowa ngandji nsambisha?

¹⁹ Lokumu l’ɔlɔlɔ la Diolelo bu tsho losango laamɛ lahomba ekambi wa Nzambi mbewoya. Vɔ pombaka nto nsukɛ olimu waki andjelo watɛkɛtawɔ dikambo diawɔ lo Ɛnyɛlɔ tshapita 8 polo 10. Andjelo asɔ wekɔ lo mbewoya mananu efula yayokomɛ wanɛ watona Diolelo dia Nzambi. Ɔnkɔnɛ, Ɛmɛnyi wa Jehowa wekɔ lo mbewoya losango la kilombo, lɛdikama la “mvula ka mbɔkɔ ndo ka dja,” lo mɛnya dombwelo diaki Nzambi otsha le akongɛ wotshikitanyi wa l’andja ɔnɛ waki Satana. (Ɛny. 8:7, 13) Anto pombaka mbeya di’ekomelo kaya suke dia vɔ monga l’akoka wa nsala etshikitanu wahombama lo nsɛnɔ yawɔ dia vɔ ndjoshimbamɛ lo lushi la nkɛlɛ ka Jehowa. (Zɛf. 2:2, 3) Koko anto efula hawɔngɛnangɛna losango lɔsɔ. Dia liewoya, paka sho monga la dihonga. Lo mfɔnu ka woke, losango la kilombo k’ekomelo layoleka nyangiya anto.​—Ɛny. 16:21.

TOKITANYIYA ƐTƐKƐTA WA PRƆFƐSIYA

20. Kakɔna kayotɔsɛdingola l’asawo ahende wayela?

²⁰ Ekɔ mɛtɛ ohomba dia sho nkitanyiya “ɛtɛkɛta wa prɔfɛsiya kɛnɛ,” nɛ dia sho mendanaka l’okotshamelo wa kɛnɛ kadiaso lo dibuku di’Ɛnyɛlɔ. (Ɛny. 1:3) Ko ngande wakokaso mbikikɛ ɛhɛnyɔhɛnyɔ la kɔlamelo tshɛ ndo ntetemala nsala kɛnɛ kakokaso nsala dia mbewoya nsango shɔ la dihonga? Tayokeketshama oma l’akambo ahende anɛ: Ntondotondo, oma lo kɛnɛ katosholɛ dibuku di’Ɛnyɛlɔ lo dikambo di’atunyi wa Nzambi. Dikambo dia hende, oma lo ɛtshɔkɔ wa lo nshi yayaye wayotolongola naka sho ntshikala la kɔlamelo. Tayɔsɛdingola awui asɔ l’asawo ahende wayela.