1 | Dɔmbɛlɔ “Nyokitsha ekiyanu anyu tshɛ le nde”

BIBLE MBUTAKA ƆNƐ: “Nyokitsha ekiyanu anyu tshɛ le [Nzambi], nɛ dia nde ndjakiyanyaka dikambo dianyu.”—1 PETERO 5:7.

Kɛnɛ kalembetshiya dui sɔ

Jehowa Nzambi tɔlɔmbaka dia sho sawolaka la nde awui wendana la wetsho tshɛ wele la so watokiyanya lo yimba ndo l’otema. (Osambo 55:22) Ndooko okakatanu wele woke kana tshitshɛ efula wahatakoke nɔmba lo dikambo diawɔ. Naka okakatanu akɔ wekɔ ohomba le so, kete vɔ wekɔ nto ohomba le Jehowa. Mbɔlɔmba ekɔ nna di’ohomba efula diatokimanyiya dia monga la wɔladi wa lo yimba.—Filipɛ 4:6, 7.

Woho wakoka dui sɔ tokimanyiya

Etena kalɔshanaso la hemɔ ka lo yimba, sho mbeyaka ndjaoka opoko. Aha mbala tshɛ mbatoshihodiaka anto akina woho wayaokaso kana ekakatanu wele la so. (Tokedi 14:10) Koko naka sho mbitɛ Nzambi l’otema ɔtɔi woho wayaokaso lo dɔmbɛlɔ, kete teye dia nde ayotohokamɛ ndo nde ayoyadja lo dihole diaso. Jehowa tɛnaka, nde mbeyaka paa yaso ndo ekakatanu walɔshana la so ndo nde nangaka dia sho mbɔɔlɔmba l’oseka dikambo tshɛ diatokiyanya.—2 Ɛkɔndɔ 6:29, 30.

Sawola la Jehowa lo dɔmbɛlɔ keketshaka wɛkamu aso dia nde ndjakiyanyaka lo dikambo diaso. Sho koka ndjaoka woho wakayaoke omembi w’esambo, lakalɔmbɛ ate: “Wɛ ambɛna sui diami; wɛ mbeyaka shɔkɔ yami y’efula.” (Osambo 31:7) Mbeya dia Jehowa shihodiaka okakatanu walɔshanaso la wɔ, koka tokimanyiya efula dia sho mbikikɛ ntena dia wolo dieso lo ntenyanya. Koko nde hakomɛ tsho lo mɛna ɔkɛyi aso. Nde ndeka oseka onto tshɛ nshihodia okakatanu wele la so, nde mbeyaka okakatanu wele la so ndo nde tokimanyiyaka dia ntana esambelo ndo ekeketshelo lo Bible.

Woho wakimanyiya Bible Julian

Woho wele ekiyanu la shɛngiya le mi

“Lekɔ lo ndɔshana l’ekiyanu ndo l’efukutanu wa lo wɔɔngɔ wahashile (Trouble obsessionnel compulsif, TOC). Ekiyanu ndjelɛkami lo ntena diahamalongamɛ. Etena kɛmɔtshi lekɔ yema dimɛna, koko etena kayela dimi mongaka l’ekiyanu efula aha l’ɔkɔkɔ ɔmɔtshi w’oshika. Dimi ndekaka ndjakiyanya efula djekoleko etena kemi l’atei w’anto akina. Dimi ndjakiyanyaka efula lo kɛnɛ kafɔnya anto lo dikambo diami.

“Wanɛ weya ekakatanu walɔshana la mi salaka kɛnɛ tshɛ kewɔ l’akoka wa nsala dia kimanyiyami. Dimi suyaka dia lo ntena dimɔtshi vɔ wakambitɛka awui amɔtshi wahamalongamɛ mpokamɛ. Koko lekɔ la lowando lewɔ lo welo wadjawɔ dia kimanyiyami.

“Lo ntena dimɔtshi, dimi mongaka l’okakatanu wa nɔmba l’ɔtɛ w’ekiyanu ami ndo l’ɔtɛ w’efukutanu wa lo wɔɔngɔ wahashile (Trouble obsessionnel compulsif, TOC). Dui sɔ nɔmbaka dia mbidja welo efula wa lo yimba ndo nsawola la Jehowa lo dɔmbɛlɔ. Yimba yami mbekekɔka esadi eto oma lo dikambo dimɔtshi otsha lo dikambo dikina ndo dui sɔ mbidjakami mbala efula l’okandokando. Etena kemi bu l’akoka wa mbahemɛ tokanyi tami, dimi mongaka l’okakatanu dia mbitɛ Jehowa kɛnɛ kakanyiyami ndo nsaki yami.”

Woho wakimanyiya Bible

“Lakeke lo wekelo ami wa Bible diaha paka alɔmbɛlɔ monga w’etale kana wa lɔtshɔbɔla ko Nzambi mbaoka. Ntena dimɔtshi naka handeye kɛnɛ ka mbuta, dimi nɔmbaka tsho ɔnɛ: ‘Jehowa, lam’alangayɛ okimanyiya.’ Kaanga lo ntena dia ngasɔ, dimi mbokaka dia Jehowa mbeyakami ndo mbishakami kɛnɛ kemi la tɔ ohomba lo etena kengo. Laadiko dia dɔmbɛlɔ, dimi nyangaka esakelo w’aseka enganga. Lekɔ l’ɔngɛnɔngɛnɔ dia mbuta dia diɛsɛ l’ekimanyielo ka Jehowa ndo k’aseka enganga, lamboleka ndjaoka dimɛna. Kaanga mbele nɔmbaka welo efula dia dimi nɔmba Shɔmi lele l’olongo ekimanyielo, dimi salaka dui sɔ nɛ dia lekɔ l’eshikikelo dia nde nangakami ndo kombolaka kimanyiyami.